ପୁରୀ ୦୪/୦୧: ସାମ୍ନାକୁ ଆସିଲା ବଡ଼ଦେଉଳର ନାଟମଣ୍ଡପରେ ଶ୍ରଦ୍ଧାଳୁଙ୍କୁ ସୁଲଭ ଜଗା ଦର୍ଶନ ବ୍ୟବସ୍ଥା ନିମନ୍ତେ ତିଆରି ହୋଇଥିବା ର୍ୟାମ୍ପ ଓ ବ୍ୟାରିକେଡ୍ ବ୍ୟବସ୍ଥାର ଫଟୋ ଓ ଭିଡିଓ । ଏହି ବ୍ୟାରିକେଡ୍ରେ ଠିଆ ହୋଇ ଶ୍ରଦ୍ଧାଳୁମାନେ କିପରି ଆଖି ପୂରାଇ ଠାକୁର ଦର୍ଶନ କରିପାରିବେ ତାହାର ପରୀକ୍ଷଣ ମଧ୍ୟ ଏହାର ନିର୍ମାଣ କାର୍ଯ୍ୟ ଭାର ନେଇଥିବା ଦିଲ୍ଲୀପ କନଷ୍ଟ୍ରକସନ ପକ୍ଷରୁ କରାଯାଇଛି । ଶ୍ରୀମନ୍ଦିର ପ୍ରଶାସନର ଚାହିଦା ମୁତାବକ ଓବିସିସି ପକ୍ଷରୁ ଦିଲ୍ଲୀପ କନଷ୍ଟ୍ରକସନକୁ ଏହି ବ୍ୟାରିକେଡ୍ ନିର୍ମାଣ ଦାୟିତ୍ୱ ଦିଆଯାଇଥିଲା । ଉକ୍ତ ସଂସ୍ଥା ଏହାର କାର୍ଯ୍ୟାଳୟ ଭୁବନେଶ୍ୱର ନୂଆପଲ୍ଲୀଠାରେ ଠାକୁର ଦର୍ଶନ ର୍ୟାମ୍ପ ଓ ବ୍ୟାରିକେଡ୍ ନିର୍ମାଣ କରାଯାଇଛି ।
ଏନେଇ ଦିଲ୍ଲୀପ କନଷ୍ଟ୍ରକସନର ମାଲିକ ଦିଲୀପ ଖଟେଇ ସୂଚନା ଅନୁସାରେ, ଏହି ର୍ୟାମ୍ପ ଓ ବ୍ୟାରିକେଡ୍ରେ ମହାପ୍ରଭୁଙ୍କ ଦର୍ଶନ ଖୁବ୍ ଭଲ ଭାବେ ହୋଇପାରିବ । ଆଉ ବଡ଼ଦେଉଳ ବାହାର କାଠ ପାଖରୁ ଶ୍ରଦ୍ଧାଳୁଙ୍କୁ ପାଦ ଟିପରେ ଟେକି ହୋଇ ମହାପ୍ରଭୁଙ୍କ ଦର୍ଶନ କରିବା ଲାଗି ଭିଡ଼ରେ ଦୁର୍ଦ୍ଦଶା ଭୋଗିବାକୁ ପଡ଼ିବନି । ବ୍ୟାରିକଡ୍ରେ ଯାଇ ର୍ୟାମ୍ପ ଉପରେ ଠିଆ ହୋଇଗଲେ ମହାପ୍ରଭୁଙ୍କ ଦୁର୍ଲ୍ଲଭ ଦର୍ଶନ ମିଳିଯିବ । ଆଗରେ ଥିବା ଶ୍ରଦ୍ଧାଳୁ ଓ ପଛରେ ଥିବା ଶ୍ରଦ୍ଧାଳୁ ସମସ୍ତେ ମହାପ୍ରଭୁଙ୍କ ଆଖି ପୂରାଇ ବାହାର କାଠ ପାଖରୁ ଠାକୁର ଦର୍ଶନ କରିପାରିବେ । ପ୍ରାୟ ୧୫ରୁ ୧୩ ଫୁଟ ପର୍ଯ୍ୟନ୍ତ ଲମ୍ବା ୬ ଥାକିଆ ର୍ୟାମ୍ପ ଯୁକ୍ତ ବ୍ୟାରିକେଡ୍ କରାଯାଇଛି । ଯେପରି ପ୍ରେକ୍ଷାଳୟରେ ସିଟ୍ଗୁଡ଼ିକ ପଛକୁ ଉଚ୍ଚ ହୋଇଥାଏ ଠିକ୍ ସେହିପରି ଏହି ର୍ୟାମ୍ପ ପଛକୁ ପଛ ୪ଇଞ୍ଚ ଲେଖାଏଁ ଉଚ୍ଚ ହୋଇ ୬ ଥାକରେ ରହିଛି ।
ର୍ୟାମ୍ପର ଦୁଇପାଶ୍ୱର୍ ନୁଆଁଣିଆ ଓ ମଝି ଢ଼ାଲୁଆ । ଫଳରେ ଶ୍ରଦ୍ଧାଳୁଙ୍କୁ ର୍ୟାମ୍ପ ଉପରେ ଚଢ଼ିବାରେ ଠାକୁର ଦର୍ଶନ କରିବେ ସୁବିଧା ହେବ । ଥରକରେ ପ୍ରାୟ ୧୫୦ରୁ ୨୦୦ ଶ୍ରଦ୍ଧାଳୁ ଏହି ର୍ୟାମ୍ପରେ ଚଢ଼ି ବ୍ୟାରିକେଡ୍ ଭିତରେ ଠାକୁର ଦର୍ଶନ କରିପାରିବେ । ଏଠାରେ ଠେଲାପେଲା ହେବାକୁ ପଡ଼ିବନି । ଆଗ ଲୋକ ଯେପରି ଭଲଭାବେ ଠାକୁର ଦର୍ଶନ କରିବ, ପଛରେ ରହିଥିବା ଲୋକମାନେ ମଧ୍ୟ ଠିକ୍ ସେହିପରି ଠାକୁର ଦର୍ଶନ କରିବେ । ଏହି ବ୍ୟାରିକେଡ୍ ଓ ର୍ୟାମ୍ପ ବର୍ମାଟିକ୍ କାଠରେ ନିର୍ମିତ ହୋଇଛି । ଏହି କାଠ ପୂରା ହାଲୁକା । ଭିତର କାଠ ସନ୍ନିକଟ ପ୍ରଥମ ୩ ର୍ୟାମ୍ପ ସଂଯୁକ୍ତ ଧାଡ଼ିରେ ଶିଶୁ, ମହିଳା, ବୟସ୍କମାନେ ଯିବେ ବାକି ୩ଟିରେ ସର୍ବସାଧାରଣ ସମସ୍ତେ ଯାଇପାରିବେ ।
ସୂଚନା ଥାଉକି, ଶ୍ରଦ୍ଧାଳୁମାନେ ବାହାର କାଠ ଠାରୁ ଜଗା ଦର୍ଶନ ବେଳେ ସବୁଠାରୁ ଅଧିକ ଠେଲାପେଲାରେ ଯାଉଛନ୍ତି । ଅନେକ ସମୟରେ ଦଳାଚକଟା ଭଳି ସ୍ଥିତି ଉପୁଜୁଛି । ତେଣୁ ଶ୍ରଦ୍ଧାଳୁଙ୍କ ସୁରକ୍ଷାକୁ ଲକ୍ଷ୍ୟରେ ରଖି ପ୍ରଶାସନ ପକ୍ଷରୁ ନାଟମଣ୍ଡପର ବାହାର କାଠ ପାଖରେ ୬ ଥାକିଆ ର୍ୟାମ୍ପ ଥିବା ବ୍ୟାରିକେଡ୍ ଦର୍ଶନ ବ୍ୟବସ୍ଥା ଆସନ୍ତା ୨୦ରୁ ୨୨ ତାରିଖ ଭିତରେ କରିବାକୁ ଯୋଜନା ରହିଛି । ଏହି ବ୍ୟାରିକେଡ୍ ଓ ର୍ୟାମ୍ପ ନିର୍ମାଣ ସରିଥିବା ମଧ୍ୟ ସରକାର ସୂଚନା ଦିଆଯାଇଛି । ଶ୍ରଦ୍ଧାଳୁଙ୍କ ଭିଡ଼ ପ୍ରବଳ ହେବା ଅନୁମାନ କରି ନୂଆବର୍ଷ ପୂର୍ବରୁ ଏହି ବ୍ୟାରିକେଡ୍ରେ ପରୀକ୍ଷାମୂଳକ ଦର୍ଶନ ବ୍ୟବସ୍ଥା ହୋଇପାରିନଥିଲା । ଏହାକୁ ପ୍ରଶାସନ ପକ୍ଷରୁ ଆଗକୁ କାର୍ଯ୍ୟାକାରୀ କରିବାକୁ ସମୟ ଧାର୍ଯ୍ୟ ହୋଇଛି ।
ଶ୍ରୀମନ୍ଦିରକୁ ପ୍ରତି ସପ୍ତାହରେ ପ୍ରାୟ ଦେଢ଼ ଲକ୍ଷ ଶ୍ରଦ୍ଧାଳୁ ଜଗା ଦର୍ଶନ ନିମନ୍ତେ ଆସୁଛନ୍ତି । ଯାହା ଭିତରେ କେବଳ ଶନିବାର ଓ ରବିବାର ପ୍ରାୟ ଲକ୍ଷେ ଶ୍ରଦ୍ଧାଳୁଙ୍କ ଆଗମନ ହେଉଛି । ପର୍ବପର୍ବାଣୀ ଦିନମାନଙ୍କରେ ଭିଡ଼ ଖୁବ୍ ଅଧିକ ରହୁଛି । ଶ୍ରୀମନ୍ଦିରରେ ସର୍ବଦା ଭିତର କାଠ ଦର୍ଶନ ସୁବିଧା ଶ୍ରଦ୍ଧାଳୁଙ୍କ ମିଳିପାରୁନି । ଅନ୍ୟପଟେ ବାହାର କାଠ ଓ ଭିତର କାଠ ଦର୍ଶନ ବେଳେ ଶ୍ରଦ୍ଧାଳୁଙ୍କୁ ଠେଲାପେଲା ଭଳିଅପ୍ରୀତିକର ପରିସ୍ଥିତିର ସାମ୍ନା କରିବାକୁ ପଡ଼ୁଛି । ତେଣୁ ପ୍ରଥମେ ବାହାର କାଠଠାରେ ପରୀକ୍ଷାମୂଳକ ଦର୍ଶନ ବ୍ୟବସ୍ଥା କରାଯାଉଛି । ପ୍ରଶାସନ ପକ୍ଷରୁ ଶ୍ରଦ୍ଧାଳୁଙ୍କୁ ସ୍ଲଟ୍ ବୁକିଂ କରି ଠାକୁର ଦର୍ଶନର ସୁବିଧା ଦେବାକୁ ଆଗକୁ ଯୋଜନା ମଧ୍ୟ ରହିଛି । ତେଣୁ ନୀତି ବହୁଳ ଶ୍ରୀମନ୍ଦିର ଭିତରେ ସେବାୟତ ଓ ସର୍ବସାଧାରଣଙ୍କୁ ବୁଝାଇ ଏସବୁ ବ୍ୟବସ୍ଥା କରିବା ଏବେ ପ୍ରଶାସନ ନିମନ୍ତେ ଚ୍ୟାଲେଞ୍ଜ ସୃଷ୍ଟି କରିଛି ।
