ନୂଆଦିଲ୍ଲୀ,୩୦/୦୬: ଇସ୍ରାଏଲ-ଇରାନ ଯୁଦ୍ଧ ସମୟରେ ଗୋଟିଏ ପଟେ ଡ୍ରୋନ, କ୍ଷେପଣାସ୍ତ୍ର ଏବଂ ଯୁଦ୍ଧ ବିମାନ ବ୍ୟବହାର କରି ଦୁଇ ଦେଶ ମଧ୍ୟରେ ଆକ୍ରମଣ କରାଯାଉଥିବା ବେଳେ ଅନ୍ୟପଟେ ଏକ ଗୁଜବ ଖବରର ଯୁଦ୍ଧ ମଧ୍ୟ ଚାଲିଛି। ଇସ୍ରାଏଲ-ଇରାନ ଯୁଦ୍ଧ ସହିତ ଜଡ଼ିତ କିଛି ଗୁଜବ ଖବର ଏବଂ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଥିଲା। ଏକ ସୁଚିନ୍ତିତ ଷଡ଼ଯନ୍ତ୍ରର ଅଂଶ ଭାବରେ, କିଛି ପଡ଼ୋଶୀ ଦେଶ, ବିଶେଷକରି ପାକିସ୍ତାନ, ସୋସିଆଲ ମିଡିଆରେ ବଡ଼ ପରିମାଣରେ ନକଲି ଖବର ଏଜେଣ୍ଡା ଚଲାଉଛି। ପ୍ରତିରକ୍ଷା ଏବଂ ସାଇବର ବିଶେଷଜ୍ଞମାନେ କହିଛନ୍ତି ଯେ ଦୁଇ ଦେଶ ମଧ୍ୟରେ ଚାଲିଥିବା ଯୁଦ୍ଧକୁ ଭିନ୍ନ ଦୃଷ୍ଟିକୋଣରୁ ଦେଖାଇବା ଏବଂ ନକଲି ଖବର ଏବଂ ଭୁଲ ସୂଚନା ମାଧ୍ୟମରେ ଭାରତର ଲୋକମାନଙ୍କୁ ଭ୍ରମିତ କରିବା ପାଇଁ ଏପରି ଅଭିଯାନ ଚଳାଯାଉଥିଲା।
ଆମେରିକା ଇରାନ ଉପରେ ବିମାନ ଆକ୍ରମଣ କରିବା ପରେ, ସୋସିଆଲ ମିଡିଆରେ ଏକ ଗୁଜବ ମେସେଜ୍ ଭାଇରାଲ ହେବା ଆରମ୍ଭ ହୋଇଥିଲା ଯେ ଭାରତ ଇରାନ ଉପରେ ଆକ୍ରମଣ କରିବା ପାଇଁ ଆମେରିକାକୁ ତାର ଏୟାରବେସ୍ ଦେଇଛି। ପାକିସ୍ତାନ ପକ୍ଷରୁ ମଧ୍ୟ ସୋସିଆଲ ମିଡିଆରେ ଏହି ସମ୍ପର୍କରେ ଅନେକ ଦାବି କରାଯାଇଥିଲା, କିନ୍ତୁ ବାସ୍ତବ ଘଟଣା ହେଉଚି, ଆମେରିକା ଇରାନ ଉପରେ ବିମାନ ଆକ୍ରମଣ ପାଇଁ ଭାରତର କୌଣସି ଏୟାରବେସ୍ ବ୍ୟବହାର କରିନଥିଲା। ଇସ୍ରାଏଲ-ଇରାନ ଯୁଦ୍ଧ ସମୟରେ ଭାରତ ବିମାନ ଆକ୍ରମଣରେ କୌଣସି ଭୂମିକା ଗ୍ରହଣ କରିନାହିଁ।
ସୋସିଆଲ ମିଡିଆରେ ଏକ ନକଲି ମେସେଜ୍ ପ୍ରସାରିତ ହେବା ଆରମ୍ଭ ହୋଇଥିଲା ଯେଉଁଥିରେ ଦାବି କରାଯାଇଥିଲା ଯେ ଆମେରିକା ଇରାନ ବିରୁଦ୍ଧରେ ତାଙ୍କର ସାମରିକ କାର୍ଯ୍ୟାନୁଷ୍ଠାନ 'ଅପରେସନ୍ ମିଡନାଇଟ୍ ହାମର୍' ପାଇଁ ଭାରତୀୟ ବାୟୁସେନା ବ୍ୟବହାର କରିଥିଲା। ଏହି ମେସେଜ୍ ସହିତ ଭାରତୀୟ ପତାକା, ମିଡନାଇଟ୍ ହାମର୍ ଏବଂ ପ୍ରଧାନମନ୍ତ୍ରୀଙ୍କ ଫଟୋ ମଧ୍ୟ ଥିଲା। ଇରାନ ଟାଇମ୍ସର ସୋସିଆଲ ମିଡିଆ ହ୍ୟାଣ୍ଡେଲରୁ କରାଯାଇଥିବା ଏହି ନକଲି ଦାବିକୁ ପାକିସ୍ତାନ ଭାଇରାଲ କରିବା ଆରମ୍ଭ କରିଥିଲା। କେନ୍ଦ୍ର ସରକାରଙ୍କ ତଥ୍ୟ ଯାଞ୍ଚ ୟୁନିଟ୍ ପିଆଇବି ଏହି ମେସେଜ୍ର ତଦନ୍ତ କରି କହିଛି ଯେ ଏହି ଦାବି ସମ୍ପୂର୍ଣ୍ଣ ମିଥ୍ୟା। ଇରାନ ଉପରେ ବିମାନ ଆକ୍ରମଣ ପାଇଁ ଆମେରିକା କୌଣସି ଭାରତୀୟ ବାୟୁସେନା ଘାଟି ବ୍ୟବହାର କରିନାହିଁ। ଏହା ସମ୍ପୂର୍ଣ୍ଣ ମିଛ ଖବର ଅଟେ।
ଜୁନ୍ ୨୩ ତାରିଖରେ ସୋସିଆଲ ମିଡିଆରେ ପ୍ରକାଶିତ ଏକ ପୋଷ୍ଟରେ ଏକ ମେସେଜ୍ ଭାଇରାଲ ହେଉଥିଲା, ଯେଉଁଥିରେ ଲେଖାଥିଲା ଯେ ଇସ୍ରାଏଲୀ ସଂସଦରେ ଖୋଲା ଲଢ଼େଇ ଚାଲିଛି। ଇସ୍ରାଏଲୀ ସାଂସଦମାନେ ନିଜେ ଯାୟୋନିଷ୍ଟ ସରକାରଙ୍କୁ ସମର୍ଥନ କରନ୍ତି ନାହିଁ ଏବଂ ଭାରତର ଗୋ-ପୂଜକମାନେ ଇସ୍ରାଏଲ ତୁମ ସଂଘର୍ଷ କରୋ, ହମ୍ ତୁମ୍ହାରେ ସାଥ୍ ହୈ ସ୍ଲୋଗାନ ଦେଇ ସେମାନଙ୍କର ଗୋ-ଗୋବର କର୍ତ୍ତବ୍ୟ ପାଳନ କରୁଛନ୍ତି। ଏହି ଗୋ-ପୂଜକମାନେ ଦେଶର ଶାନ୍ତି ପାଇଁ ସେତିକି ବିପଦ ଯେପରି ଯାୟୋନିଷ୍ଟମାନେ ବିଶ୍ୱ ଶାନ୍ତି ପାଇଁ।" ଜାତୀୟ ଗଣମାଧ୍ୟମର ପକ୍ଷରୁ ଜଣାପଡ଼ିଛି ଯେ, ଏହି ବାର୍ତ୍ତା ସମ୍ପୂର୍ଣ୍ଣ ଗୁଜବ।
