ଡେରାଡୁନ, ୨୦/୦୧: ଜାନୁଆରୀ ୨୮ ତାରିଖରୁ ଉତ୍ତରାଖଣ୍ଡରେ ଆରମ୍ଭ ହେବାକୁ ଯାଉଛି ୩୮ତମ ଜାତୀୟ କ୍ରୀଡ଼ା । କ୍ରୀଡ଼ାର ସବୁ ପରିଚାଳନା ନିମନ୍ତେ ଆୟୋଜକ ୧୨୦୦ କ୍ରୀଡ଼ା ସ୍ୱେଚ୍ଛା ସେବୀଙ୍କୁ ନିୟୋଜିତ କରିବେ । ସ୍ୱେଚ୍ଛାସେବୀଙ୍କୁ କ୍ରୀଡ଼ା ଏବଂ ସାଧରଣ ବର୍ଗରେ ଏଭଳି ଦୁଇ ଭାଗରେ ବିଭକ୍ତ କରାଯାଇ ପ୍ରଶିକ୍ଷଣ ପ୍ରଦାନ କରାଯିବ । ସାଧାରଣ ସ୍ୱେଚ୍ଛାସେବୀ ହେବା ପାଇଁ ୩୦ ହଜାର ଅନ୍ଲାଇନରେ ନାମ ପଞ୍ଜୀକରଣ କରିଥିଲେ । ସେମାନଙ୍କୁ ଅନ୍ଲାଇନରେ ପ୍ରଶିକ୍ଷଣ ପ୍ରଦାନ କରାଯାଇଛି । ସେହିପରି ଅନ୍ଲାଇନରେ ପରୀକ୍ଷା କରାଯାଇ ସେମାନଙ୍କ ମଧ୍ୟରୁ ୨୩୦୦ ଜଣଙ୍କୁ ଚୟନ କରାଯିବ । ଯେଉଁମାନେ କ୍ରୀଡ଼ା ସ୍ୱେଚ୍ଛାସେବୀ ହେବେ ସେମାନଙ୍କୁ ନ୍ୟାସନାଲ ଫେଡେରେସନ୍ ସ୍ପୋର୍ଟ୍ସ ଅଫ୍ ଇଣ୍ଡିଆ ଚୟନ କରିବ । କ୍ରୀଡ଼ା କ୍ଷେତ୍ରରେ ସେମାନଙ୍କ ଅଭିଜ୍ଞତା ଥିବ କିମ୍ବା ସେମାନେ କ୍ରୀଡ଼ାବିତ ହୋଇଥିବେ ।
ଜାତୀୟ କ୍ରୀଡ଼ାର ଅତିରିକ୍ତ ସିଇଓ ପ୍ରଶାନ୍ତ ଆର୍ଯ୍ୟ କହିଛନ୍ତି, ‘କ୍ରୀଡ଼ା ସ୍ୱେଚ୍ଛାସେବୀଙ୍କୁ ଦୈନିକ ୧ ହଜାର ଏବଂ ସାଧାରଣ ସ୍ୱେଚ୍ଛାସେବୀଙ୍କୁ ୫୦୦ ଟଙ୍କା ପ୍ରଦାନ କରାଯିବ ।’ ‘ଉତ୍ତରାଖଣ୍ଡ ୩୮ତମ କ୍ରୀଡ଼ା ଆୟୋଜନ ନେଇ ପୂରା ପ୍ରସ୍ତୁତ ରହିଛି । ଏହା ରାଜ୍ୟବାସୀଙ୍କ ପାଇଁ ଗର୍ବର ବିଷୟ । ଆଶା କ୍ରୀଡ଼ାର ସଫଳ ଆୟୋଜନ ରାଜ୍ୟରେ କ୍ରୀଡ଼ାକୁ ନୂଆ ଦୀଶା ପ୍ରଦାନ କରିବ ବୋଲି ମୁଖ୍ୟମନ୍ତ୍ରୀ ପୁଷ୍କର ସିଂ ଧାମି ପ୍ରକାଶ କରିଛନ୍ତି ।
