ନୂଆଦିଲ୍ଲୀ, ୪।୨: ଆର୍କଟିକ୍ ଅଞ୍ଚଳରେ ଏକ ସମ୍ଭାବ୍ୟ ସାମରିକ ମିଶନ ପାଇଁ ପରିକଳ୍ପନା ଆରମ୍ଭ କରିଛି ନାଟୋ । ‘ଆର୍କଟିକ୍ ସେଣ୍ଟ୍ରି’ ନାମକ ଏହି ମିଶନ ନାଟୋର ଏକ “ଏନ୍ହାନ୍ସଡ୍ ଭିଜିଲାନ୍ସ ଆକ୍ଟିଭିଟି” ଭାବେ ପରିଚିତ ହେବ ବୋଲି ନାଟୋର ସାମରିକ ମୁଖ୍ୟାଳୟ SHAPEର ପ୍ରବକ୍ତା କର୍ଣ୍ଣେଲ୍ ମାର୍ଟିନ୍ ଓ’ ଡୋନେଲ୍ ମଙ୍ଗଳବାର କହିଛନ୍ତି । ଯୁକ୍ତରାଷ୍ଟ୍ର ଓ ୟୁରୋପୀୟ ମିତ୍ରଦେଶମାନଙ୍କ ମଧ୍ୟରେ ଗ୍ରୀନଲ୍ୟାଣ୍ଡକୁ ନେଇ ଉତ୍ତେଜନା ବଢ଼ୁଥିବା ପରିପ୍ରେକ୍ଷିତରେ ଏହି ପରିକଳ୍ପନା ଆରମ୍ଭ ହୋଇଛି । ଯୁକ୍ତରାଷ୍ଟ୍ର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଗ୍ରୀନଲ୍ୟାଣ୍ଡ ଅଧିଗ୍ରହଣ କରିବା ନେଇ ପୁନଃ ମତ ପ୍ରକାଶ କରିବା ସହ ୟୁରୋପୀୟ ମିତ୍ରଦେଶମାନେ ରୁଷିଆ କିମ୍ବା ଚୀନରୁ ଏହି ବିଶାଳ ଆର୍କଟିକ୍ ଦ୍ୱୀପକୁ ସୁରକ୍ଷା ଦେବାରେ ବିଫଳ ହେଉଛନ୍ତି ବୋଲି ଅଭିଯୋଗ କରିଛନ୍ତି । ଏହାକୁ ନେଇ ଡେନମାର୍କ ସହ ଏବଂ ନାଟୋ ସହ ମତଭେଦ ସୃଷ୍ଟି ହୋଇଛି ।
କର୍ଣ୍ଣେଲ୍ ଓ’ ଡୋନେଲ୍ କହିଛନ୍ତି, “ନାଟୋର ‘ଆର୍କଟିକ୍ ସେଣ୍ଟ୍ରି’ ନାମକ ଏକ ଏନହାନ୍ସଡ୍ ଭିଜିଲାନ୍ସ କାର୍ଯ୍ୟକଳାପ ପାଇଁ ପରିକଳ୍ପନା ଚାଲିଛି ।” ଜାନୁଆରୀରେ ଡାଭୋସ୍ରେ ଟ୍ରମ୍ପଙ୍କ ସହ ସାକ୍ଷାତକାର ପରେ ନାଟୋ ସଚିବ ସାଧାରଣ ମାର୍କ ରୁଟେ କହିଥିଲେ ଯେ, ଆର୍କଟିକ୍ ସୁରକ୍ଷା ସୁନିଶ୍ଚିତ କରିବା ପାଇଁ ନାଟୋ ସଦସ୍ୟ ଦେଶମାନେ କିପରି ସମୁହଗତ ଭାବେ କାମ କରିପାରିବେ, ସେଥିପାଇଁ ଆଲୋଚନା ହୋଇଥିଲା । ଏଥିରେ ଗ୍ରୀନଲ୍ୟାଣ୍ଡ ସହ ଆର୍କଟିକ୍ ଅଞ୍ଚଳରେ ଥିବା ୭ଟି ନାଟୋ ଦେଶ ମଧ୍ୟ ସାମିଲ । ଡେନମାର୍କର ରକ୍ଷାମନ୍ତ୍ରୀ ଟ୍ରୋଏଲ୍ସ ଲୁଣ୍ଡ ପୋଲସେନ୍ କହିଛନ୍ତି ଯେ, ନାଟୋ ମିଶନ ପାଇଁ ସାମରିକ ପରିକଳ୍ପନା ଆରମ୍ଭ ହେବା ଏକ ସନ୍ତୋଷଜନକ ପଦକ୍ଷେପ । “ଆର୍କଟିକ୍ ଏବଂ ଉତ୍ତର ଆଟଲାଣ୍ଟିକ୍ ଅଞ୍ଚଳରେ ସୁରକ୍ଷା ବଢ଼ାଇବା ପାଇଁ ଆମେ ନାଟୋ ମିତ୍ରଦେଶମାନଙ୍କ ସହ ମିଶି କାମ କରିବା ଅତ୍ୟନ୍ତ ଆବଶ୍ୟକ,” ବୋଲି ସେ ଏକ୍ସରେ ଲେଖିଛନ୍ତି । ଫେବୃଆରୀ ୧୨ ତାରିଖରେ ବ୍ରୁସେଲ୍ସରେ ହେବାକୁ ଥିବା ନାଟୋ ରକ୍ଷାମନ୍ତ୍ରୀମାନଙ୍କ ବୈଠକରେ ଏହି ବିଷୟ ଉପରେ ଆଲୋଚନା ହେବ କି ନାହିଁ, ସେନେଇ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ । ନାଟୋର ନିୟମାନୁସାରେ, ସମସ୍ତ ସଦସ୍ୟ ଦେଶଙ୍କ ସମ୍ମତି ଛଡ଼ା ମଧ୍ୟ ନାଟୋ ସୁପ୍ରିମ୍ ଏଲାଇଡ୍ କମାଣ୍ଡର୍ ଇଉରୋପ୍—ଯୁକ୍ତରାଷ୍ଟ୍ରର ଜେନେରାଲ୍ ଏଲେକ୍ସସ୍ ଗ୍ରିନକେଭିଚ୍—ଏପରି “ଏନହାନ୍ସଡ୍ ଭିଜିଲାନ୍ସ ଆକ୍ଟିଭିଟି” ପରିକଳ୍ପନା କରିବାର ଅଧିକାର ରଖନ୍ତି ।
ଆହୁରି ପଢ଼ନ୍ତୁ... ଆରବ ସାଗରରେ ଇରାନ-ଆମେରିକା ମୁହାଁମୁହିଁ, ଇରାନର 'ସାହିଦ-୧୩୯' ଡ୍ରୋନ୍ ମାରି ଖସାଇଲା ୟୁଏସ୍
