ନୂଆଦିଲ୍ଲୀ,୧୬/୦୭: ବଦଳିଲା ୮ମ ଶ୍ରେଣୀର ଏନସିଇଆରଟି ବହି । ନୂଆ ସାମାଜିକ ବିଜ୍ଞାନ ପୁସ୍ତକରେ ମୋଗଲ ଶାସକମାନଙ୍କ ବିଷୟରେ କିଛି କଠୋର କଥା ଉଲ୍ଲେଖ । ପୁସ୍ତକରେ ବାବରଙ୍କୁ ଜଣେ 'ଅତ୍ୟନ୍ତ ନିଷ୍ଠୁର ଏବଂ କ୍ରୁର ଶାସକ' ଭାବରେ ବର୍ଣ୍ଣନା କରାଯାଇଛି। ଯିଏ ଅନେକ ସହରର ଲୋକକୁ ହତ୍ୟା କରିଥିଲେ। ସେହିପରି, ଆକବରଙ୍କ ଶାସନ ଗୋଟିଏ ପଟେ ସହିଷ୍ଣୁ ଥିଲା କିନ୍ତୁ ଏଥିରେ ନିଷ୍ଠୁର ନିଷ୍ପତ୍ତି ମଧ୍ୟ ଥିଲା। ଏହା ବ୍ୟତୀତ, ଔରଙ୍ଗଜେବଙ୍କ ମଧ୍ୟ କ୍ରୁର ଶାସକର ଆଖ୍ୟା ଦିଆଯାଇଛି । ସେ ଅନେକ ମନ୍ଦିର ଏବଂ ଗୁରୁଦ୍ୱାର ଭାଙ୍ଗି ଦେଇଥିଲେ। ଏହା ସହିତ, ପୁସ୍ତକରେ ଏକ ଗୁରୁତ୍ୱପୂର୍ଣ୍ଣ ଚେତାବନୀ ମଧ୍ୟ ଦିଆଯାଇଛି ଯେ, ଇତିହାସରେ ଘଟିଥିବା ଭୁଲ କିମ୍ବା ଘଟଣା ପାଇଁ କାହାକୁ ଦାୟୀ କରାଯିବା ଉଚିତ୍ ନୁହେଁ, ଅର୍ଥାତ୍ ଆଜିର ପିଢ଼ୀ ଅତୀତର ଲଢ଼େଇକୁ ପୁନରାବୃତ୍ତି କରିବା ଉଚିତ୍ ନୁହେଁ।
ମୋଗଲ ଏବଂ ଦିଲ୍ଲୀ ସୁଲତାନ ସମୟକୁ 'ଧାର୍ମିକ ଅସହିଷ୍ଣୁତା' ଏବଂ ହିଂସାର ସମୟ ଭାବରେ ବର୍ଣ୍ଣନା କରାଯାଇଛି । ଯେଉଁଥିରେ ଗ୍ରାମ ଏବଂ ସହରଗୁଡ଼ିକୁ ଅନେକ ଥର ଲୁଟ୍ କରାଯାଇଥିଲା, ମନ୍ଦିର ଏବଂ ଜ୍ଞାନ କେନ୍ଦ୍ରଗୁଡ଼ିକୁ ଧ୍ୱଂସ କରାଯାଇଥିଲା। ପୁସ୍ତକରେ କୁହାଯାଇଛି ଯେ, ଏହି ସମୟ ଇତିହାସର ଏକ 'ଅନ୍ଧକାର ଯୁଗ' ଥିଲା। ଏହା ସହିତ, ଏକ ବିଶେଷ ଟିପ୍ପଣୀରେ କୁହାଯାଇଛି ଯେ,'ଇତିହାସକୁ ବୁଝିବା ଗୁରୁତ୍ୱପୂର୍ଣ୍ଣ, କିନ୍ତୁ ଏଥିପାଇଁ ଆଜିର ଲୋକଙ୍କୁ ଦୋଷ ଦିଆଯିବା ଉଚିତ୍ ନୁହେଁ'। ତେବେ ଏହି ପୁସ୍ତକର ନାମ 'ଏକ୍ସପ୍ଲୋରିଂ ସୋସାଇଟି: ଇଣ୍ଡିଆ ଆଣ୍ଡ୍ ବିୟଣ୍ଡ' ଏବଂ ଏହାକୁ ଏହି ସପ୍ତାହରେ ସ୍କୁଲଗୁଡ଼ିକରେ ପାଠପଢ଼ା ପାଇଁ ଜାରି ହୋଇଛି । ପୂର୍ବରୁ ମୋଗଲ ଏବଂ ଦିଲ୍ଲୀ ସୁଲତାନଙ୍କ ବିଷୟରେ ୭ମ ଶ୍ରେଣୀରେ ସୂଚନା ଦିଆଯାଉଥିଲା, କିନ୍ତୁ ଏବେ ନୂତନ ପାଠ୍ୟକ୍ରମରେ ଏସବୁ ୮ମ ଶ୍ରେଣୀରେ ଅଣାଯାଇଛି।
