ନୂଆଦିଲ୍ଲୀ: ଉତ୍ତରାଖଣ୍ଡ ସରକାର ରାଜ୍ୟର ସ୍କୁଲଗୁଡ଼ିକ ପାଇଁ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛନ୍ତି। ରାଜ୍ୟର ସମସ୍ତ ସ୍କୁଲରେ ପ୍ରାର୍ଥନା ସଭାରେ ଭଗବଦ୍ ଗୀତାର ଶ୍ଳୋକ ପାଠ କରିବା ବାଧ୍ୟତାମୂଳକ  କରିଛନ୍ତି ସରକାର । ଏହି ନିଷ୍ପତ୍ତି ସଂପର୍କରେ ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମି କହିଛନ୍ତି  ଯେ, ଭଗବଦ୍ ଗୀତାର ଜ୍ଞାନ କେବଳ ଧାର୍ମିକ ନୁହେଁ ବରଂ ଏହା ନୈତିକତା ଓ ଜୀବନର ମୂଲ୍ୟବୋଧ ଶିଖାଏ । ଏହି ପଦକ୍ଷେପ ଛାତ୍ରଛାତ୍ରୀମାନଙ୍କୁ ଭଲ ମଣିଷ ଏବଂ ଦାୟିତ୍ୱବାନ ନାଗରିକ କରିବାରେ ମଧ୍ୟ ସାହାଯ୍ୟ କରିବ ।  

ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ (CMO) ଦ୍ୱାରା ଜାରି ଏକ ବିବୃତ୍ତିରେ ସ୍ପଷ୍ଟ କରାଯାଇଛି ଯେ, ଏହି ନିଷ୍ପତ୍ତି କୌଣସି ଗୋଟିଏ ଧର୍ମକୁ ପ୍ରୋତ୍ସାହିତ କରିବା ପାଇଁ ନିଆଯାଇନାହିଁ । ମୁଖ୍ୟମନ୍ତ୍ରୀ ଧାମି କହିଛନ୍ତି ଯେ, ‘ଗୀତାର ଶ୍ଳୋକଗୁଡ଼ିକରେ ଜୀବନକୁ ସଠିକ୍ ଦିଗଦର୍ଶନ ଦେଉଥିବା ଶିକ୍ଷା ରହିଛି। ଏହା ଛାତ୍ରଛାତ୍ରୀମାନଙ୍କୁ ନୈତିକତା, ଆତ୍ମ-ଅନୁଶାସନ ଏବଂ ସମାଜ ପ୍ରତି ଦାୟିତ୍ୱର ପାଠ ପଢ଼ାଇବ।’

ଏହି ନିଷ୍ପତ୍ତି ସରକାରୀ ଏବଂ ବେସରକାରୀ ସ୍କୁଲ ପାଇଁ ସମାନ ଭାବରେ ଲାଗୁ ହେବ। ଶିକ୍ଷା ବିଭାଗ ଖୁବଶୀଘ୍ର ଏ ସମ୍ପର୍କରେ ନିର୍ଦ୍ଦେଶାନାମା ଜାରି କରିବ। ଗୀତାର ଶ୍ଳୋକ ପାଠ ଛାତ୍ରଛାତ୍ରୀମାନଙ୍କର ଚରିତ୍ର ଗଠନରେ ସାହାଯ୍ୟ ହେବ । ପିଲାମାନଙ୍କୁ ଭାରତୀୟ ସଂସ୍କୃତିର ଉପଯୁକ୍ତ ଧାରଣା ମିଳିବ । ସେପଟେ ସରକାରଙ୍କ ଏହି ନିଷ୍ପତ୍ତି ଉପରେ ମିଶ୍ରିତ ପ୍ରତିକ୍ରିୟା ପ୍ରକାଶ ପାଇଛି । କିଛି ଲୋକ ଏହାକୁ ଭାରତୀୟ ସଂସ୍କୃତିକୁ ପ୍ରୋତ୍ସାହିତ କରିବା ପାଇଁ ଏକ ପଦକ୍ଷେପ ବୋଲି ବିବେଚନା କରୁଥିବା ବେଳେ କିଛି ଲୋକ ଏହାକୁ ବିରୋଧ ମଧ୍ୟ କରୁଛନ୍ତି । ସରକାର ସ୍ପଷ୍ଟ କରିଛନ୍ତି ଯେ, ଏହି ପଦକ୍ଷେପ କେବଳ ଶିକ୍ଷା ଉଦ୍ଦେଶ୍ୟରେ ନିଆଯାଇଛି ଏବଂ ସମସ୍ତ ଧର୍ମକୁ ସମ୍ମାନ ମଧ୍ୟ ଦିଆଯାଇଛି। 

ସେପଟେ ଉତ୍ତରାଖଣ୍ଡ ୟୁସିସି ଲାଗୁ କରିବାରେ ପ୍ରଥମ ରାଜ୍ୟ । ଜାନୁଆରୀ ୨୭, ୨୦୨୫ ରୁ ଉତ୍ତରାଖଣ୍ଡରେ ୟୁନିଫର୍ମ ସିଭିଲ୍ କୋଡ୍ (UCC) ଲାଗୁ ହୋଇଛି । ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମି ମଧ୍ୟ ସେହି ଦିନ ଏହାର ସରକାରୀ ପୋର୍ଟାଲ୍ ଲଞ୍ଚ କରିଥିଲେ । ଗୋଆରେ ପର୍ତ୍ତୁଗୀଜ୍ ସିଭିଲ୍ କୋଡ୍ ପୂର୍ବରୁ ବଳବତ୍ତର ଅଛି । କିନ୍ତୁ ଉତ୍ତରାଖଣ୍ଡ ହେଉଛି ସ୍ୱାଧୀନ ଭାରତର ପ୍ରଥମ ରାଜ୍ୟ ଯେଉଁଠି ନିଜ ପାଇଁ ଏକ ନୂତନ UCC ମାର୍ଗଦର୍ଶିକା ତିଆରି ଏବଂ କାର୍ଯ୍ୟକାରୀ ହୋଇଛି । ଏହି ଆଇନ ବିବାହ, ଛାଡପତ୍ର, ପୋଷ୍ୟ ସନ୍ତାନ ଗ୍ରହଣ, ଉତ୍ତରାଧିକାରୀ ଏବଂ ଲିଭ-ଇନ୍ ସମ୍ପର୍କ ଭଳି ବ୍ୟକ୍ତିଗତ ବିଷୟଗୁଡ଼ିକୁ ନିୟନ୍ତ୍ରଣ କରେ ।

 ସମସ୍ତ ନାଗରିକଙ୍କ ପାଇଁ ସମାନ ଅଧିକାର ଏବଂ ନିୟମ ସୁନିଶ୍ଚିତ କରେ ୟୁସିସି । ଏହି ଆଇନ ଅନୁଯାୟୀ ବହୁବିବାହ ଏବଂ ଏକପାଖିଆ ଛାଡପତ୍ରକୁ ନିଷିଦ୍ଧ କରାଯାଇଛି ।  ଝିଅ ଏବଂ ପୁଅମାନଙ୍କୁ ସମ୍ପତ୍ତିରେ ସମାନ ଅଧିକାର ଦିଆଯାଇଛି । ଏହି ପଦକ୍ଷେପ ରାଜ୍ୟରେ ଲିଙ୍ଗ, ଜାତି ଏବଂ ଧର୍ମ ଆଧାରରେ ଯେକୌଣସି ପ୍ରକାରର ଭେଦଭାବକୁ ସମାପ୍ତ କରିବ ଏବଂ ଏକ ସମନ୍ୱିତ ସମାଜର ମୂଳଦୁଆ ସ୍ଥାପନ କରିବ ବୋଲି ସରକାର ପକ୍ଷରୁ କୁହାଯାଇଛି ।