ନୂଆଦିଲ୍ଲୀ,୦୬/୦୬: ଅଗଷ୍ଟ ୩ ତାରିଖରେ ନିଟ୍ ପିଜି ଅନୁଷ୍ଠିତ ହେବ । ନ୍ୟାସନାଲ ବୋର୍ଡ ଅଫ୍ ଏକ୍ଜାମିନେସନ୍ ମେଡିକାଲ ସାଇନ୍ସ (ଏନ୍ବିଇଏମ୍ଏସ୍ ) ପକ୍ଷରୁ ପ୍ରସ୍ତାବିତ ପରୀକ୍ଷାକୁ ସ୍ଥଗତି ରଖାଯାଇଥିଲା । ନୂଆ ପରୀକ୍ଷା ତାରିଖକୁ ନେଇ ସୁପ୍ରିମକୋର୍ଟ ସହମତି ପ୍ରକାଶ କରିଛନ୍ତି । ଏନ୍ବିଇକୁ ସର୍ବୋଚ୍ଚ ନ୍ୟାୟାଳୟ ସମୟ ଦେଇଛନ୍ତି । ପରୀକ୍ଷା ତାରିଖକୁ ଆଗକୁ ନେବାକୁ ଏନବିଇ ପକ୍ଷରୁ ଦାୟର ହୋଇଥିବା ଯାଚିକାକୁ ସ୍ୱୀକାର କରିଛନ୍ତି ସୁପ୍ରିମକୋର୍ଟ । ଆଗକୁ ଆଉ ସମୟ ଦିଆଯିବ ନାହିଁ ବୋଲି କହିଛନ୍ତି ସର୍ବୋଚ୍ଚ ଅଦାଲତ । ଜୁନ୍ ୧୫ରେ ପରୀକ୍ଷା ପାଇଁ ଦିନ ଧାର୍ଯ୍ୟ ହୋଇଥିଲା ।
ପରୀକ୍ଷା ତାରିଖକୁ ଆଗକୁ ନେବାକୁ ଏନବିଇ ପକ୍ଷରୁ ଦାୟର ହୋଇଥିବା ଯାଚିକାର ଶୁଣାଣି କରି ସୁପ୍ରିମକୋର୍ଟ କହିଛନ୍ତି, 'ଆମେ ଏହି କଥାରେ ସନ୍ତୁଷ୍ଟ କି ଅଗଷ୍ଟ ୩ରେ ପରୀକ୍ଷା ପୁର୍ନନିର୍ଦ୍ଧାରଣ କରିବାକୁ ସମୟ ବଢାଇବାକୁ ଆବେଦନ ଠିକ୍ । ହେଲେ ଏତେ ଲମ୍ବା ସମୟ କାହିଁକି ଦରକାର ? ତୁମେ ପ୍ରକ୍ରିୟାରେ ବିଳମ୍ବ କରୁଛ ଏହା ଛାତ୍ରଙ୍କ ଉପରେ ଅତିରିକ୍ତ ଚାପ ପରି ହେବ । ଅଗଷ୍ଟ ୩ରେ ପରୀକ୍ଷା ପାଇଁ ସମୟ ଦେଉଛୁ । ଆଗକୁ କୌଣସି ସମୟ ଦିଆଯିବ ନାହିଁ ।'
ଏନ୍ବିଇ କହିଥିଲା,'' ଆମେ ଚାହୁଁନଥିଲୁ କି ପରୀକ୍ଷାରେ କୌଣସି ପ୍ରକାର ବୁଝାମଣା ହେଉ । ମୋଟ୍ ୨.୫ ଲକ୍ଷ ପରୀକ୍ଷାର୍ଥୀ ଆବେଦନ କରିଛନ୍ତି । ୪୫୦ ପରୀକ୍ଷା କେନ୍ଦ୍ର ରହିଛି । ଗୋଟିଏ ସିପ୍ଟରେ ପରୀକ୍ଷା ଆୟେଜିତ କରିବାକୁ ଅତିକମ୍ରେ ୫୦୦ ପରୀକ୍ଷା କେନ୍ଦ୍ର ଦରକାର । ପରୀକ୍ଷା କେନ୍ଦ୍ର ଚିହ୍ନଟ, ସୁରକ୍ଷା ବ୍ୟବସ୍ଥା ଓ ଛାତ୍ରଙ୍କୁ ପରୀକ୍ଷା କେନ୍ଦ୍ର ଚୟନ କରିବାର ଅନୁମତି ଦେବାକୁ ସମୟ ଲାଗିବ ।''
ଗତ ୨ ତାରିଖରେ ନିଟ୍ ପିଜି ସ୍ଥଗିତ ରହିଥିଲା । ଏନ୍ବିଇଏମ୍ଏସ୍ ପକ୍ଷରୁ ପ୍ରସ୍ତାବିତ ପରୀକ୍ଷାକୁ ସ୍ଥଗିତ ରଖାଯାଇଛି । ଆସନ୍ତା ୧୫ ତାରିଖରେ ଏହି ପରୀକ୍ଷା ହେବାର ଥିଲା । ଏ ନେଇ ୧୧ ତାରିଖରୁ ଆଡମିଟ୍ କାର୍ଡ ଜାରି କରାଯାଇଥାନ୍ତା । ସୁପ୍ରିମକୋର୍ଟଙ୍କ ନିର୍ଦ୍ଦେଶକୁ ଦୃଷ୍ଟିରେ ରଖି ଏନ୍ଇବି ପକ୍ଷରୁ ପରୀକ୍ଷା ସ୍ଥଗତି ନେଇ ପଦକ୍ଷେପ ନିଆଯାଇଥିଲା । ଗତ ମେ ୩୦ରେ ସୁପ୍ରିମକୋର୍ଟ ଗୋଟିଏ ସିପ୍ଟରେ ପରୀକ୍ଷା କରାଇବାକୁ ଏନ୍ବିଇକୁ ନିର୍ଦ୍ଦେଶ ଦେଇଥିଲେ । ଦରକାର ପଡିଲେ ପରୀକ୍ଷା କେନ୍ଦ୍ର ସଂଖ୍ୟା ବଢାଇବାକୁ ବି କହିଥିଲେ । ୨ଟି ସିପ୍ଟରେ ପରୀକ୍ଷାକୁ ବିରୋଧ କରି କିଛି ଛାତ୍ରଛାତ୍ରୀ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ ।
