ନୂଆଦିଲ୍ଲୀ: ଭାରତର ଜଣାଶୁଣା ମସଲା ବ୍ରାଣ୍ଡ ଉପରେ ଆସିଥିବା ବିବାଦ ଦିନକୁ ଦିନ ଘନେଇବାରେ ଲାଗିଛି । ଭାରତୀୟ ମସଲାକୁ ନେଇ ଗତ ମାସରୁ ଆରମ୍ଭ ହୋଇଥିବା ବିବାଦ ଏପର୍ଯ୍ୟନ୍ତ ଥମିବାର ସଙ୍କେତ ଦେଉନାହିଁ । ଏହି ବିବାଦ ଏବେ ସିଙ୍ଗାପୁର ଏବଂ ହଂକଂ ଦେଇ ନେପାଳରେ ପହଞ୍ଚିଛି । ଭାରତର ପଡୋଶୀ ଦେଶ ନେପାଳ ଭାରତୀୟ ବ୍ରାଣ୍ଡ ଦ୍ୱାରା ନିର୍ମିତ କେତେକ ମସଲା ବିକ୍ରୟ ଏବଂ ଆମଦାନୀ ଉପରେ ପ୍ରତିବନ୍ଧକ ଲଗାଇଛି ।
ନେପାଳର ଖାଦ୍ୟ ପ୍ରାଦ୍ୟୋଗିକ ଏବଂ ଗୁଣବତ୍ତା ନିୟନ୍ତ୍ରଣ ବିଭାଗ ୧୦୦ ବର୍ଷରୁ ଅଧିକ ପୁରୁଣା ଭାରତୀୟ ମସଲା କମ୍ପାନୀ ଏଭରେଷ୍ଟ ଏବଂ ଏମଡିଏଚ (MDH) ର ଆମଦାନୀ, ବ୍ୟବହାର ଏବଂ ବିକ୍ରୟ ଉପରେ ପ୍ରତିବନ୍ଧକ ଲଗାଇଛି । ଏହା ବ୍ୟତୀତ ଇଥିଲିନ ଅକ୍ସାଇଡ ପରିମାଣର ଯାଞ୍ଚ ମଧ୍ୟ ଆରମ୍ଭ ହୋଇଛି । ସୂଚନାଥାଉକି ଯେ MDH ଏବଂ ଏଭରେଷ୍ଟର ଚାରୋଟି ଉତ୍ପାଦକୁ ଅଧିକ ପରିମାଣର ଇଥିଲିନ୍ ଅକ୍ସାଇଡ୍ ଦର୍ଶାଇ ନିଷେଧ କରାଯାଇଛି ।
ନିଷିଦ୍ଧ ହୋଇଥିବା ମସଲା ମଧ୍ୟରେ ମଡ୍ରାସ କରି ପାଉଡର, ସମ୍ବର ମିକ୍ସ ମସାଲା ପାଉଡର, MDH ର ମିକ୍ସଡ ମସାଲା କରି ପାଉଡର ଏବଂ ଏଭରେଷ୍ଟର ଫିସ୍ କରି ମସାଲା ଅନ୍ତର୍ଭୁକ୍ତ ।
ନେପାଳର ଖାଦ୍ୟ ଗୁଣବତ୍ତା ନିୟନ୍ତ୍ରଣ ବିଭାଗର ଜଣେ ଅଧିକାରୀ କହିଛନ୍ତି, 'ଗଣମାଧ୍ୟମ ରିପୋର୍ଟରେ ଆମର ଧ୍ୟାନ ଆକର୍ଷଣ କରାଯାଇଛି ଯେ ଏହି ଅବ୍ୟବହୃତ ଦ୍ରବ୍ୟ ବଜାରରେ ବିକ୍ରି ହେଉଛି ଏବଂ ବ୍ୟବହାର ପାଇଁ କ୍ଷତିକାରକ । ଏହି ଚାରୋଟି ଦ୍ରବ୍ୟରେ ଅଧିକ ପରିମାଣର ଇଥିଲିନ ଅକ୍ସାଇଡ୍ ମିଳିଛି । ତେଣୁ ଦେଶ ମଧ୍ୟରେ ଏହି ଉତ୍ପାଦଗୁଡିକର ଆମଦାନୀ ଏବଂ ବିକ୍ରୟ ଉପରେ ପ୍ରତିବନ୍ଧକ ଲଗାଯାଇଛି ।
