ନୂଆଦିଲ୍ଲୀ,୮।୯: ନେପାଳରେ ହିଂସାକାଣ୍ଡ ପରେ ପଦରୁ ଇସ୍ତଫା ଦେଲେ ଗୃହମନ୍ତ୍ରୀ ରମେଶ ଲେଖକ। ସୋସିଆଲ ମିଡିଆ ବ୍ୟାନ୍ ଓ ଭ୍ରଷ୍ଟାଚାର ବିରୋଧରେ ହିଂସାତ୍ମକ ପ୍ରଦର୍ଶନରେ ହୋଇଥିବା ମୃତ୍ୟୁକୁ ନେଇ ସେ ନିଜ ପଦବୀରୁ ଇସ୍ତଫା ଦେଇଛନ୍ତି। କ୍ୟାବିନେଟ୍ ବୈଠକ ବଳେ ସେ ପ୍ରଧାନମନ୍ତ୍ରୀ କେ.ପି ଶର୍ମା ଓଲିଙ୍କୁ ନିଜର ଇସ୍ତଫା ପତ୍ର ପ୍ରଦାନ କରିଛନ୍ତି। ପ୍ରତିବାଦକୁ ଦମନ କରିବା ପାଇଁ ସୁରକ୍ଷା ବାହିନୀ ଦ୍ୱାରା ବଳ ପ୍ରୟୋଗ ହୋଇଥିଲା, ଏଥି ଯୋଗୁଁ ୨୦ ଜଣଙ୍କ ମୃତ୍ୟୁ ହୋଇଥିଲା। ରମେଶ ଏହାକୁ 'ଅକଳ୍ପନୀୟ କ୍ଷତି' ବୋଲି କହିଛନ୍ତି ଏବଂ ସରକାରଙ୍କ ସ୍ଥିତି ମୁକାବିଲା କରିବା ପାଇଁ ସରକାରଙ୍କ କାର୍ଯ୍ୟକୁ ବ୍ୟାପକ ସମାଲୋଚନା କରାଯାଇଥିଲା। ଏହାପରେ ସେ ତାଙ୍କ ପଦବୀରୁ ଇସ୍ତଫା ଦେବାକୁ ନିଷ୍ପତ୍ତି ନେଇଥିଲେ।
ଉଲ୍ଲେଖନୀୟ ଯେ, ନେପାଳର ରାଜଧାନୀ କାଠମାଣ୍ଡୁ ସମେତ ଅନେକ ପ୍ରମୁଖ ସହରରେ ସରକାର ବିରୋଧୀ ପ୍ରତିବାଦରେ ଏପର୍ଯ୍ୟନ୍ତ ୨୦ ରୁ ଅଧିକ ଲୋକଙ୍କର ମୃତ୍ୟୁ ହୋଇଛି ଏବଂ ୩୦୦ ରୁ ଅଧିକ ଆହତ ହୋଇଛନ୍ତି। ନେପାଳରେ ଦୁର୍ନୀତି, ବେକାରୀ ଏବଂ ସୋସିଆଲ ମିଡିଆ ବ୍ୟାନ୍ ବିରୋଧରେ ବହୁ ସଂଖ୍ୟକ ଯୁବପିଢି ରାସ୍ତାକୁ ଓହ୍ଲାଇଛନ୍ତି। ସେମାନଙ୍କର ପ୍ରତିବାଦକୁ ଜେନ-ଜେଡ ରିଭୋଲ୍ୟୁସନ ନାମ ଦିଆଯାଇଛି। ସୁରକ୍ଷା ବାହିନୀ ପ୍ରତିବାଦକାରୀଙ୍କୁ ଘଉଡ଼ାଇବା ପାଇଁ ଲୁହ ବୁହା ଗ୍ୟାସ, ଓ୍ବାଟର କ୍ୟାନେନ୍ ଏବଂ ଲାଇଭ ଫାୟାରିଂ କରିଥିଲେ।
ଗୃହମନ୍ତ୍ରୀ ରମେଶ ଲେଖକଙ୍କ ଇସ୍ତଫାକୁ ଓଲି ସରକାରଙ୍କ ଉପରେ ବଢ଼ୁଥିବା ଚାପକୁ କମ କରିବା ପାଇଁ ଏକ ପ୍ରୟାସ ବୋଲି ବିବେଚନା କରାଯାଉଛି। ନେପାଳୀ ସଂସଦର ଅଧ୍ୟକ୍ଷ ଶେର ବାହାଦୁର ଦେଉବା କ୍ୟାବିନେଟ ବୈଠକରେ ଲେଖକଙ୍କ ପ୍ରତି ସମବେଦନା ପ୍ରକାଶ କରିଥିଲେ, କିନ୍ତୁ ନୈତିକତା ଦୃଷ୍ଟିରୁ ତାଙ୍କ ଇସ୍ତଫାକୁ ଗ୍ରହଣ କରିଥିଲେ। ଏହା ପୂର୍ବରୁ, ଜାତୀୟ ସୁରକ୍ଷା ପରିଷଦର ଏକ ବୈଠକରେ ପ୍ରଧାନମନ୍ତ୍ରୀ କେପି ଶର୍ମା ଓଲି ହିଂସାତ୍ମକ ପ୍ରତିବାଦ ଯୋଗୁଁ ଦେଶର ଆଇନ ଶୃଙ୍ଖଳା ପରିସ୍ଥିତି ଉପରେ ଆଲୋଚନା କରିଥିଲେ। ଉଲ୍ଲେଖନୀୟ ଯେ, ଏବେ ବି ରାଜଧାନୀ କାଠମାଣ୍ଡୁରେ କର୍ଫ୍ୟୁ ବଳବତ୍ତର ଅଛି, ସ୍କୁଲ ଏବଂ କଲେଜ ଦୁଇ ଦିନ ପାଇଁ ବନ୍ଦ ରହିଛି ଏବଂ ସମସ୍ତ ପରୀକ୍ଷା ସ୍ଥଗିତ ରଖାଯାଇଛି।
