ଚନ୍ଦ୍ରଶେଖରପୁର/କଟକ,୧୮/୦୨: ଭୁବନେଶ୍ୱରର ଇନ୍ଫୋସିଟିସ୍ଥିତ ଘରୋଇ ବିଶ୍ୱବିଦ୍ୟାଳୟରେ ଜଣେ ବିଦେଶୀ ଛାତ୍ରୀଙ୍କ ଆତ୍ମହତ୍ୟା ଏବଂ ପରେ ଛାତ୍ରଛାତ୍ରୀଙ୍କ ପ୍ରତି ବିଶ୍ୱବିଦ୍ୟାଳୟ କର୍ତ୍ତୃପକ୍ଷଙ୍କ ବ୍ୟବହାରକୁ ନେଇ ବିଶ୍ୱବ୍ୟାପୀ ଓଡ଼ିଶା ନିନ୍ଦିତ ହୋଇଛି । ପ୍ରେମିକର ନିର୍ଯାତନା ଅସହ୍ୟ ହେବାରୁ ଛାତ୍ରୀ ଜଣଙ୍କ ଆତ୍ମହତ୍ୟା କରିଥିବା ଅଭିଯୋଗ ପାଇ ପୁଲିସ ବିମାନବନ୍ଦରରୁ ପ୍ରେମିକକୁ ଗିରଫ କରିଛି । ମୃତ ଛାତ୍ରୀ ହେଲେ ପ୍ରକୃତି ଲମସାଲ । ତାଙ୍କ ଘର ନେପାଳ ହୋଇଥିବା ବେଳେ ସେ ଉକ୍ତ ଶିକ୍ଷାନୁଷ୍ଠାନରେ ବିଟେକ୍ ତୃତୀୟ ବର୍ଷରେ ପଢୁଥିଲେ । ଗିରଫ ପ୍ରେମିକ ଅଦ୍ଭିକ ଶ୍ରୀବାସ୍ତବ(୨୧)ର ଘର ଉତ୍ତରପ୍ରଦେଶରେ । ଯୁବତୀଙ୍କ ପରିବାର ଲୋକେ ଭୁବନେଶ୍ବରରେ ପହଞ୍ଚିଥିବା ସୂଚନା ମିଳିଛି। ମୃତ ନେପାଳ ଛାତ୍ରୀଙ୍କ ଶବ ବ୍ୟବଚ୍ଛେଦ କରାଯିବା ପରେ ପରିବାର ଲୋକଙ୍କ ହସ୍ତାନ୍ତର କରାଯିବ ବୋଲି ଜଣାପଡିଛି।
ଏହି ଘଟଣାରେ ନେପାଳ ପ୍ରଧାନମନ୍ତ୍ରୀ କେପି ଶର୍ମା ଓଲି ଉଦ୍ବେଗ ପ୍ରକାଶ କରିଛନ୍ତି । ଓଡ଼ିଶାରେ ପ୍ରଭାବିତ ନେପାଳୀ ଛାତ୍ରଛାତ୍ରୀଙ୍କ ସହ ଆଲୋଚନା କରିବା ପାଇଁ ନୂଆଦିଲ୍ଲୀସ୍ଥିତ ନେପାଳ ଦୂତାବାସର ଦୁଇଜଣ ଅଧିକାରୀଙ୍କୁ ପଠାଇଛନ୍ତି । ଯେଉଁ ଛାତ୍ରଛାତ୍ରୀମାନେ ହଷ୍ଟେଲରେ ରହିବାକୁ ଚାହିଁବେ ତାହାର ବ୍ୟବସ୍ଥା ହେବ ଏବଂ ଯେଉଁମାନେ ଘରକୁ ପଳାଇବାକୁ ଚାହିଁବେ ତାହାର ମଧ୍ୟ ବ୍ୟବସ୍ଥା ହେବ ବୋଲି ସେ କହିଛନ୍ତି । ପ୍ରକୃତି ରବିବାର ରାତିରେ ହଷ୍ଟେଲ ରୁମରେ ରଶି ଲଗାଇ ଆତ୍ମହତ୍ୟା କରିଥିଲେ । ଏହାକୁ ନେଇ ଗତକାଲି ବିଳମ୍ବିତ ରାତିରେ ବିଶ୍ୱବିଦ୍ୟାଳୟ ପରିସରରେ ଉତ୍ତେଜନା ପ୍ରକାଶ ପାଇଥିଲା । ଶତାଧିକ ନେପାଳ ଛାତ୍ରଛାତ୍ରୀ ବ୍ୟାପକ ଭଙ୍ଗାରୁଜା କରିବା ସହ ଫାଟକ ଆଗରେ ଧାରଣାରେ ବସିଥିଲେ । ପ୍ରେମିକ ନିର୍ଯାତନା ଦେଇଥିବା ଅଭିଯୋଗ ଆଣି ତାଙ୍କୁ ତୁରନ୍ତ ଗିରଫ କରିବାକୁ ଦାବି କରିଥିଲେ । ଏହା ଦେଖି ଫେରାର୍ ହୋଇଯାଉଥିବା ପ୍ରେମିକକୁ ଇନ୍ଫୋସିଟି ଥାନା ପୁଲିସ ବିମାନବନ୍ଦରରୁ ଉଠାଇ ଆଣିଛି । ଅଦ୍ଭିକର ଘର ଉତ୍ତରପ୍ରଦେଶ ଲକ୍ଷ୍ନୌ ଆଲିଗଞ୍ଜ ଅଞ୍ଚଳରେ । ସେ ମଧ୍ୟ ଏଠାରେ ବିଟେକ୍ ତୃତୀୟ ବର୍ଷରେ ପଢୁଥିଲେ ।
ଉତ୍ତେଜନା ବଢିବା ଆଶଙ୍କାରେ କର୍ତ୍ତୃପକ୍ଷ ନେପାଳ ଛାତ୍ରଛାତ୍ରୀଙ୍କ ପାଇଁ ବିଶ୍ୱବିଦ୍ୟାଳୟକୁ ସାଇନ୍ ଏ ଡାଏ ଘୋଷଣା କରିଥିଲେ । ୫୦ରୁ ଊଦ୍ଧ୍ୱର୍ ନେପାଳ ଛାତ୍ରଙ୍କୁ ହଷ୍ଟେଲ ଖାଲି କରି ଘରକୁ ପଠାଇବା ପାଇଁ କଟକ ରେଳ ଷ୍ଟେସନରେ ଜବରଦସ୍ତି ଛାଡ଼ି ଦେଇଥିଲେ । ସେଠାରୁ ୩୦ ଜଣ ଛାତ୍ର ଦିନ ପ୍ରାୟ ସାଢ଼େ ୪ଟା ବେଳେ ପାଟ୍ନା ଯାଉଥିବା ପୁରୀ-ପାଟ୍ନା ଏକ୍ସପ୍ରେସ୍ର ଲୋକାଲ୍ କୋଚ୍ରେ ଚଢ଼ି ଯାତ୍ରା କରିଥିଲେ । କୋଚ୍ରେ ବହୁ ଭିଡ଼ ଥିଲେ ବି ଅନ୍ୟ ଉପାୟ ନପାଇ ଛାତ୍ରମାନେ ସେଥିରେ ଯାଇଥିଲେ । ମାତ୍ର ୨୦ରୁ ୨୫ ଜଣ ଛାତ୍ର ଟ୍ରେନ୍ରେ ନ ଚଢ଼ି ଷ୍ଟେସନ୍ ପାଖରୁ ଅଟୋରେ ବସି ଅନ୍ୟତ୍ର ପଳାଇଥିବା ଦେଖିବାକୁ ମିଳିଥିଲା । କଟକ ଆର୍ପିଏଫ୍ ପୋଷ୍ଟର ଅଧିକାରୀ ଅନିଲ ସିଂହ କହିଛନ୍ତି ଯେ ନେପାଳର ଯେଉଁ ଛାତ୍ରମାନେ ସକାଳେ ଷ୍ଟେସନ୍ ପାଖକୁ ଆସିଥିଲେ, ସେମାନଙ୍କ ମଧ୍ୟରୁ ଏବେ ଷ୍ଟେସନ୍ରେ ଜଣେ ହେଲେ ବି କେହି ନାହାନ୍ତି ।
ପୁଲିସ ସୂଚନା ଅନୁଯାୟୀ, ଦୁଇବର୍ଷ ପୂର୍ବେ ଉକ୍ତ ବିଶ୍ୱବିଦ୍ୟାଳୟରେ ଅଦ୍ଭିକଙ୍କ ସହ ପ୍ରକୃତିଙ୍କ ଚିହ୍ନା ପରିଚୟ ହୋଇଥିଲା । ପରେ ଉଭୟଙ୍କ ମଧ୍ୟରେ ପ୍ରେମ ହୋଇଥିଲା । ଇତିମଧ୍ୟରେ ଅଦ୍ଭିକ ଛାତ୍ରୀଙ୍କ କିଛି ଫଟୋ ଏବଂ ଭିଡିଓ ମୋବାଇଲରେ ଉଠାଇ ନେଇଥିଲେ । କୌଣସି କାରଣକୁ ନେଇ ଉଭୟଙ୍କ ମଧ୍ୟରେ ଝଗଡ଼ା ହୋଇଥିଲା । ଅଦ୍ଭିକ ତାଙ୍କୁ ବାରମ୍ବାର ନିର୍ଯାତନା ଦେଉଥିଲେ । ଏଥିପାଇଁ ଉକ୍ତ ବିଶ୍ୱବିଦ୍ୟାଳୟ ଅଧୀନ ଅନ୍ତର୍ଜାତୀୟ ସମ୍ପର୍କ କାର୍ଯ୍ୟାଳୟ(ଆଇଆର୍ଓ)ର ଦ୍ୱାରସ୍ଥ ହୋଇଥିଲେ ଛାତ୍ରୀ । ଦୁଇ ଦୁଇଥର ଆପୋଷ ସମାଧାନ କରାଇଥିଲେ ମଧ୍ୟ ଅଭିଯୁକ୍ତ ଅଦ୍ଭିକର କୌଣସି ପରିବର୍ତ୍ତନ ହୋଇନଥିଲା । ବରଂ ସେ ତାଙ୍କୁ ପୁନର୍ବାର ମାନସିକ ନିର୍ଯାତନା ଦେବା ଆରମ୍ଭ କରିଦେଇଥିଲେ । ଏହି ଘଟଣାରେ ପ୍ରକୃତି ଅତ୍ୟନ୍ତ ମାନସିକ ଦୁଶ୍ଚିନ୍ତାରେ ଥିଲେ । ସୋମବାର ସକାଳେ ଏହାକୁ କେନ୍ଦ୍ର କରି ଉଭୟଙ୍କ ମଧ୍ୟରେ ପୁଣି ଝଗଡ଼ା ହୋଇଥିଲା । ସନ୍ଧ୍ୟାରେ କଲେଜରେ ଫେଷ୍ଟିଭାଲ ଚାଲୁଥିଲା । ପ୍ରକୃତି ହଷ୍ଟେଲ ରୁମ୍କୁ ଆସି ଫ୍ୟାନରେ ଝୁଲି ଆତ୍ମହତ୍ୟା କରିଥିଲେ । ସହପାଠୀମାନେ ଆସି ଝୁଲନ୍ତା ଅବସ୍ଥାରେ ତାଙ୍କୁ ଦେଖିବାକୁ ପାଇଥିଲେ । ତୁରନ୍ତ ସେମାନେ ତାଙ୍କୁ ଉଦ୍ଧାର କରି ସ୍ଥାନୀୟ ହସ୍ପିଟାଲକୁ ନେଇଥିଲେ । ହେଲେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ । ଏହାକୁ ନେଇ ତାଙ୍କ ସହପାଠୀମାନେ ତାତିଥିଲେ । ଏଥିପାଇଁ ଦାୟୀ ପ୍ରେମିକଙ୍କୁ ଗିରଫ କରିବାକୁ ଦାବି କରିଥିଲେ ।
ପୁଲିସ ମାମଲାର ତଦନ୍ତ କରିବା ସହିତ ରାଜ୍ୟ ବାହାରକୁ ଖସି ପଳାଇବା ଲାଗି ଉଦ୍ୟମ କରୁଥିବା ବେଳେ ବିମାନବନ୍ଦରରୁ ଅଦ୍ଭିକଙ୍କୁ ଉଠାଇ ଆଣିଥିଲା । ତଦନ୍ତ ସମୟରେ ପୁଲିସ ତାଙ୍କ ନିକଟରୁ ଏକ ମୋବାଇଲ ଓ ଏକ ଲାପଟପ୍ ମଧ୍ୟ ଜବତ କରିଛି ।
ଅନ୍ୟପଟେ ଫୋରେନସିକ୍ ଟିମ୍ ଆଜି ଉକ୍ତ ହଷ୍ଟେଲରେ ପହଞ୍ଚି ତଦନ୍ତ କରିଛି । ପ୍ରକୃତି ବ୍ୟବହାର କରୁଥିବା ଲାପଟପ୍ ଓ ମୋବାଇଲ ପୁଲିସ ଜବତ କରିଛି । ମୃତଦେହକୁ କ୍ୟାପିଟାଲ ହସ୍ପିଟାଲ ମର୍ଗରେ ରଖି ପୁଲିସ ତାଙ୍କ ପରିବାର ଲୋକଙ୍କୁ ଖବର ଦେଇଛି । ସେମାନେ ପହଞ୍ଚିବା ପରେ ଶବ ବ୍ୟବଚ୍ଛେଦ କରାଯିବ ବୋଲି ପୁଲିସ କହିଛି । ସନ୍ଧ୍ୟାରେ କିଟ୍ ବିଶ୍ୱବିଦ୍ୟାଳୟ ରେଜିଷ୍ଟ୍ରାର ହଷ୍ଟେଲରୁ ବିଦା କରିଥିବା ନେପାଳ ଛାତ୍ରଛାତ୍ରୀଙ୍କୁ ପୁଣି ଫେରି ଆସିବାକୁ ଅନୁରୋଧ କରିଛନ୍ତି । ଅନ୍ୟପକ୍ଷରେ ଛାତ୍ରଙ୍କୁ ମାଡ଼ ମାରି ବିଦା କରିଥିବା ଦୁଇ ସିକ୍ୟୁରିଟି ଗାର୍ଡଙ୍କୁ ପୁଲିସ ଅଟକ ରଖିଛି । ଅପରପକ୍ଷରେ, ନେପାଳର ଷ୍ଟୁଡେଣ୍ଟ ୟୁନିୟନ ପ୍ରଧାନମନ୍ତ୍ରୀ ଶ୍ରୀ ଓଲିଙ୍କୁ ଭେଟି ମୃତ ଛାତ୍ରୀ ପ୍ରକୃତିଙ୍କୁ ନ୍ୟାୟ ପ୍ରଦାନ ପାଇଁ ଅନୁରୋଧ କରିଛନ୍ତି ।
ଅନ୍ୟପଟେ ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୁରଜ କହିଛନ୍ତି ଓଡ଼ିଶା ସହ ନେପାଳର ସମ୍ପର୍କ ବହୁ ପୁରୁଣା । କିଟ୍ ବିଶ୍ୱବିଦ୍ୟାଳୟ ଘଟଣା ଅତି ସ୍ପର୍ଶକାତର ଘଟଣା । ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏହି ଘଟଣା ଉପରେ ପୂରା ନଜର ରଖିଛନ୍ତି । ବିଶ୍ୱବିଦ୍ୟାଳୟ ଓ ଭାରତୀୟ ବୈଦେଶିକ ବିଭାଗ ସହ ଆମେ ଯୋଗାଯୋଗରେ ଅଛୁ । କଟକରେ ନେପାଳ ଛାତ୍ରଛାତ୍ରୀଙ୍କୁ ଛାଡି ଦେଇଥିବାର ଅଭାବନୀୟ ଘଟଣା ନଜରକୁ ଆସିଥିଲା । ସରକାରଙ୍କ ନିର୍ଦ୍ଦେଶ ପରେ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ଛାତ୍ରଛାତ୍ରୀଙ୍କୁ ଫେରାଇ ଆଣିବାକୁ କହିଛନ୍ତି । ସରକାରଙ୍କ ତରଫରୁ କଟକରୁ ଓଏସ୍ଆରଟିସି ବସ ବ୍ୟବସ୍ଥା କରାଯାଇଛି । ଛାତ୍ରଛାତ୍ରୀ ସେଥିରେ ଫେରିବାକୁ ଅନୁରୋଧ କରାଯାଉଛି । କଲେଜ କର୍ତ୍ତୃପକ୍ଷ ଯେପରି ଛାତ୍ରଛାତ୍ରୀଙ୍କୁ ଧମକ ଚମକ ନଦେବେ ସରକାର ସେଥିପାଇଁ ନିରନ୍ତର ଚେଷ୍ଟା କରୁଛନ୍ତି । ଏହି ଘଟଣାରେ ଯିଏ ଦୋଷୀ ସେମାନେ ଦଣ୍ଡ ପାଇବେ ବୋଲି ମନ୍ତ୍ରୀ କହିଛନ୍ତି ।
