ଭୁବନେଶ୍ୱର: ଓଡ଼ିଶାରେ ଜାତୀୟ ରାଜପଥ ପ୍ରକଳ୍ପଗୁଡ଼ିକ ରାଜ୍ୟର ସମ୍ପର୍କ ଓ ଅର୍ଥନୀତିକୁ ନୂଆ ଉଚ୍ଚତା ଦେବା ପାଇଁ ପ୍ରସ୍ତୁତ। କେନ୍ଦ୍ର ସଡ଼କ ପରିବହନ ଓ ରାଜପଥ ମନ୍ତ୍ରୀ ନୀତିନ ଗଡ଼କରୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏକ ସମୀକ୍ଷା ବୈଠକରେ ରାଜ୍ୟରେ ଚାଲିଥିବା ଓ ପ୍ରସ୍ତାବିତ ହାଇୱେ ପ୍ରକଳ୍ପଗୁଡ଼ିକ ଉପରେ ଆଲୋଚନା ହୋଇଛି। ୧୩ ହାଜର କୋଟିରେ ପ୍ରସ୍ତୁତ ହେବାକୁ ଥିବା ଏହି ପ୍ରକଳ୍ପଗୁଡ଼ିକ ମଧ୍ୟରେ ମୁଖ୍ୟତଃ ରାଜ୍ୟର ଗ୍ରାମାଞ୍ଚଳ ଓ ଶିଳ୍ପାଞ୍ଚଳକୁ ସଂଯୋଗ କରିବା ପାଇଁ ନୂଆ ରାଜପଥ ନିର୍ମାଣ ଏବଂ ବିଦ୍ୟମାନ ରାସ୍ତାର ଉନ୍ନତିକରଣ ଅନ୍ତର୍ଭୁକ୍ତ।
ଆଗକୁ ଓଡିଶାରେ କାର୍ଯ୍ୟକାରି କରିବାକୁ ଥିବା ଏହି ପ୍ରକଳ୍ପଗୁଡ଼ିକ ଓଡ଼ିଶାର ଦୁର୍ଗମ ଅଞ୍ଚଳକୁ ମୁଖ୍ୟ ସହର ଓ ବନ୍ଦର ସହିତ ଯୋଡ଼ିବ। ଯାହା ଦ୍ୱାରା ବ୍ୟବସାୟ ଓ ପରିବହନ ସହଜ ହେବ। ଏହାସହ ପ୍ରସ୍ତାବିତ ବିଭିନ୍ନ ନୂଆ ରାଜପଥ ଶିଳ୍ପ ଓ ଖଣି କ୍ଷେତ୍ରକୁ ଗତି ଦେବ ଏବଂ ନିଯୁକ୍ତି ସୁଯୋଗ ସୃଷ୍ଟି କରିବ। ଖାଲି ଏତିକି ନୁହେଁ ନିର୍ମାଣ ହେବାକୁ ଯାଉଥିବା ସଡକରେ ଗୁଣବତ୍ତା କାମ ହେବା ସହ ଏବଂ ଟ୍ରାଫିକ ଜାମ ହ୍ରାସ କରିବା ପାଇଁ ଆଧୁନିକ ପ୍ରଯୁକ୍ତିକ ବ୍ୟବହାର କରାଯିବ। ଏବଂ ପରିବେଶ ସୁରକ୍ଷା ପାଇଁ ବୃକ୍ଷରୋପଣ ଓ ଜଳ ନିଷ୍କାସନ ବ୍ୟବସ୍ଥା ଉପରେ ଗୁରୁତ୍ୱ ଦିଆଯାଇଛି।
ଏହି ବୈଠକର ଅଧ୍ୟକ୍ଷତା କରୁଥିବା ମନ୍ତ୍ରୀ ଗଡ଼କରୀ କହିଛନ୍ତି ଯେ, ଏହି ପ୍ରକଳ୍ପଗୁଡ଼ିକ ନିର୍ଦ୍ଦିଷ୍ଟ ସମୟସୀମା ମଧ୍ୟରେ ସମ୍ପୂର୍ଣ୍ଣ ହେବ ଏବଂ ଗୁଣବତ୍ତାରେ କୌଣସି ପ୍ରକାରର ବୁଝାମଣା କରାଯିବ ନାହିଁ। ରାଜ୍ୟ ସରକାର ମଧ୍ୟ ଜମି ଅଧିଗ୍ରହଣ ଓ ଅନ୍ୟାନ୍ୟ ପ୍ରଶାସନିକ କାର୍ଯ୍ୟରେ ସମ୍ପୂର୍ଣ୍ଣ ସହଯୋଗ କରୁଛନ୍ତି ବୋଲି ଶ୍ରୀ ଗଡ଼କରୀ କହିଛନ୍ତି।
ଏହି ହାଇୱେ ପ୍ରକଳ୍ପଗୁଡ଼ିକ ଓଡ଼ିଶାକୁ ପୂର୍ବ ଭାରତର ଏକ ପ୍ରମୁଖ ଅର୍ଥନୈତିକ କେନ୍ଦ୍ର ଭାବେ ପରିଣତ କରିବ। ଗ୍ରାମୀଣ ଅଞ୍ଚଳରେ ରୋଜଗାର ସୁଯୋଗ ବୃଦ୍ଧି ପାଇବ ଏବଂ ପର୍ଯ୍ୟଟନ କ୍ଷେତ୍ର ମଧ୍ୟ ନୂଆ ଗତି ପାଇବ।
