ଲାହୋର: ଚାମ୍ପିଅନ୍ସ ଟ୍ରଫି ୨୦୨୫ର ସେମିଫାଇନାଲରେ ନ୍ୟୁଜିଲାଣ୍ଡ, ଦକ୍ଷିଣ ଆଫ୍ରିକାକୁ ୩୬୩ ରନର ବିଜୟ ଲକ୍ଷ୍ୟ ଦେଇଛି । କେନ୍ ୱିଲିୟମସନ ଏବଂ ରଚିନ୍ ରବିନ୍ଦ୍ରଙ୍କ ଶତକ ପରେ ଡାରିଲ୍ ମିଚେଲ୍ ଏବଂ ଗ୍ଲେନ୍ ଫିଲିପ୍ସ ଡେଥ୍ ଓଭରଗୁଡ଼ିକରେ ବିସ୍ଫୋରକ ବ୍ୟାଟିଂ କରିଛନ୍ତି । ଏହି ଇନିଂସରେ ଚାମ୍ପିଅନ୍ସ ଟ୍ରଫି ଇତିହାସରେ ସର୍ବାଧିକ ୩୬୨ ରନ୍ ସ୍କୋର ହୋଇଛି ।
ନ୍ୟୁଜିଲାଣ୍ଡ ଅଧିନାୟକ ମିଚେଲ ସାଣ୍ଟନର ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲେ। ୱିଲ୍ ୟଙ୍ଗ୍ ଏବଂ ରଚିନ୍ ରବିନ୍ଦ୍ର ଧୀର ଆରମ୍ଭ କରିଥିଲେ । ୱିଲ୍ ୟଙ୍ଗଙ୍କୁ ଲୁଙ୍ଗି ଏନଗିଡି ଆଉଟ୍ କରି ନ୍ୟୁଜିଲାଣ୍ଡକୁ ପ୍ରଥମ ଝଟକା ଦେଇଥିଲେ । ଏହା ପରେ ରଚିନ ରବିନ୍ଦ୍ର ଏବଂ କେନ୍ ୱିଲିୟମସନ୍ ଦକ୍ଷିଣ ଆଫ୍ରିକା ବୋଲରଙ୍କୁ ଧୋଇଥିଲେ । ରଚିନ ରବିନ୍ଦ୍ର ଏକ ଚମତ୍କାର ଶତକ ହାସଲ କରିଛନ୍ତି । ସେ ୧୦୧ ବଲ୍ରେ ୧୦୮ ରନ୍ କରିଥିବା ବେଳେଏହି ଇନିଂସରେ ସେ ୧୩ ଚୌକା ଏବଂ ୧ ଛକା ମାରିଛନ୍ତି ।
କେନ୍ ୱିଲିୟମସନ୍ ମଧ୍ୟ ତାଙ୍କର ଶତକ ପୂରଣ କରିଛନ୍ତି । ସେ ୯୪ ବଲ୍ରେ ୧୦ ଚୌକା ଏବଂ ୨ ଛକା ସହାୟତାରେ ୧୦୨ ରନ୍ କରିଛନ୍ତି । ଏହି ସମୟରେ ୱିଲିୟମସନ ତାଙ୍କ ଅନ୍ତର୍ଜାତୀୟ କ୍ୟାରିୟରର ୧୯ ହଜାର ରନ୍ ମଧ୍ୟ ପୂରଣ କରିବାରେ ସଫଳ ହୋଇଛନ୍ତି । ସେ ଏପରି କରିବାରେ ପ୍ରଥମ ନ୍ୟୁଜିଲାଣ୍ଡ ଖେଳାଳି । ଡାରିଲ ମିଚେଲ ଶେଷ ଓଭରଗୁଡ଼ିକରେ ଏକ ଚମତ୍କାର ଇନିଂସ ଖେଳି ଦଳର ସ୍କୋରକୁ ୩୦୦ ଅତିକ୍ରମ କରାଇଥିଲେ । ସେ ତାଙ୍କର ଅର୍ଦ୍ଧଶତକ ପୂରଣ କରିବା ପାଇଁ ୧ ରନ ପଛରେ ରହିଗଲେ । ସେ ୩୭ ବଲ୍ରେ ୪୯ ରନ୍ କରିବା ପରେ ଆଉଟ୍ ହୋଇଥିଲେ । ସେହିଭଳି ଗ୍ଲେନ ଫିଲିପ୍ସ ଅପରାଜିତ ୪୯ ରନ୍ କରିଛନ୍ତି । ସେପଟେ ଲୁଙ୍ଗି ଏନଗିଡି ସର୍ବାଧିକ ୩ଟି ଓ୍ବିକେଟ ନେଇଛନ୍ତି ।
