ନୂଆଦିଲ୍ଲୀ,୮।୩: ଜିମ୍ବାୱେ ମହିଳା ଦଳ ବର୍ତ୍ତମାନ ନ୍ୟୁଜିଲାଣ୍ଡ ଗସ୍ତରେ ଅଛି। ଏହି ଗସ୍ତ ଟି-୨୦ ସିରିଜ ସହିତ ଆରମ୍ଭ ହୋଇଥିଲା ଏବଂ ଏବେ ଦିନିକିଆ ସିରିଜ ପାଇଁ ଚାଲିଛି। ନ୍ୟୁଜିଲାଣ୍ଡ ଦ୍ୱିତୀୟ ମ୍ୟାଚ୍ ୮ ୱିକେଟରେ ଜିତି ୨-୦ରେ ଅପ୍ରତିଦ୍ୱନ୍ଦ୍ୱୀ ଅଗ୍ରଣୀ ହାସଲ କରିଛି। ତଥାପି, ମ୍ୟାଚ୍ ସମୟରେ ଜିମ୍ବାୱେ ମହିଳା ଦଳକୁ ଏକ ବଡ଼ ଝଟକା ଲାଗିଥିଲା। ଜିମ୍ବାୱେର ଓପନର କେଲିସ୍ ନନ୍ଧଲୋଭୁ ବ୍ୟାଟିଂ କରୁଥିବା ସମୟରେ ଗୁରୁତର ଆହତ ହୋଇଥିଲେ ଏବଂ ତାଙ୍କୁ ତୁରନ୍ତ ହସ୍ପିଟାଲକୁ ନେବାକୁ ପଡିଥିଲା।
ଡୁନେଡିନର ୟୁନିଭର୍ସିଟି ଓଭାଲରେ ଖେଳାଯାଇଥିବା ମ୍ୟାଚରେ, ନ୍ୟୁଜିଲାଣ୍ଡର ଦ୍ରୁତ ବୋଲର ବ୍ରି ଏଲିଙ୍ଗଙ୍କ ଏକ ଦ୍ରୁତ ବାଉନ୍ସର ବଲ୍ ତାଙ୍କ ହେଲମେଟର ସାଇଡରେ ମାଡ ହୋଇଥିଲା,ଫଳରେ କେଲିସ୍ ଗୁରୁତର ଆହତ ହୋଇଥିଲେ। ଘଟଣାଟି ମ୍ୟାଚ୍ର ଆରମ୍ଭରୁ ଘଟିଥିଲା। କେଲିସ୍ ମୋଡେଷ୍ଟର ମୁପାଚିକୱାଙ୍କ ସହିତ ଇନିଂସ ଓପନ କରୁଥିଲେ ଏବଂ ଦୁହେଁ ୨୫ ରନର ପାର୍ଟନରସିପ୍ କରିଥିଲେ। ବାଉନ୍ସରକୁ ଡକ୍ କରିବାକୁ ଚେଷ୍ଟା କରିବା ସମୟରେ, ବଲ୍ ତାଙ୍କ ହେଲମେଟରେ ବାଜିଲା, ଯାହା ଫଳରେ ସେ ତଳେ ପଡିଯାଇଥିଲେ।
ଡାକ୍ତରୀ ଦଳ ତୁରନ୍ତ ପଡ଼ିଆରେ ଚିକିତ୍ସା ଆରମ୍ଭ କରିଥିଲେ, ଏବଂ ତାଙ୍କୁ ଆମ୍ବୁଲାନ୍ସରେ ସ୍ଥାନୀୟ ହସ୍ପିଟାଲକୁ ନିଆଯାଇଥିଲା, ଯେଉଁଠାରେ ତାଙ୍କର ସ୍କାନ କରାଯାଇଥିଲା। ଜିମ୍ବାୱେ କୋଚ୍ କେଟ୍ ଇବ୍ରାହିମ ପରେ ଅପଡେଟ୍ ଦେଇ କହିଥିଲେ, କେଲିସ୍ ସ୍ଥିତିରେ ଉନ୍ନତି କରୁଛନ୍ତି। ସେ ସ୍କାନ ଫଳାଫଳକୁ ଅପେକ୍ଷା କରିଛନ୍ତି।
ଉଲ୍ଲେଖନୀୟ ଯେ, ଏହି ମ୍ୟାଚରେ ପ୍ରଥମେ ବ୍ୟାଟିଂ କରୁଥିବା ଜିମ୍ବାୱେ ମାତ୍ର ୨୯.୧ ଓଭର ଖେଳି ୧୦୨ ରନ୍ରେ ଅଲଆଉଟ୍ ହୋଇଯାଇଥିଲା। ନ୍ୟୁଜିଲାଣ୍ଡର ଅଧିନାୟିକା ଆମେଲିଆ କେର ଚମତ୍କାର ପ୍ରଦର୍ଶନ କରି ୭ ୱିକେଟ୍ ନେଇଥିଲେ, ଯାହା ସେମାନଙ୍କୁ ମ୍ୟାଚ୍ ଜିତିବାରେ ସାହାଯ୍ୟ କରିଥିଲା। ନ୍ୟୁଜିଲାଣ୍ଡର ୧୬.୨ ଓଭରରେ ମାତ୍ର ୨ ୱିକେଟ୍ ହରାଇ ଏହି ଲକ୍ଷ୍ୟ ହାସଲ କରିଥିଲେ। ସିରିଜ ଶେଷ ମ୍ୟାଚ୍ ୧୧ ମାର୍ଚ୍ଚରେ ଖେଳାଯିବ।
