ନୂଆଦିଲ୍ଲୀ,୨୬/୦୪: ଏବେ ଜାତୀୟ ତଦନ୍ତକାରୀ ସଂସ୍ଥା (ଏନ୍‌ଆଇଏ) ପହଲଗାମ ଆତଙ୍କବାଦୀ ଆକ୍ରମଣର ତଦନ୍ତ କରିବ। NIA ଦଳ ପହଲଗାମରେ ପହଞ୍ଚି ନିଜର ତଦନ୍ତ ପ୍ରକ୍ରିୟା ଆରମ୍ଭ କରିଛନ୍ତି। ଏବେ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଗୃହ ମନ୍ତ୍ରଣାଳୟ ପହଲଗାମ ଆତଙ୍କବାଦୀ ଆକ୍ରମଣର ତଦନ୍ତ ଦାୟିତ୍ୱ ଏନ୍‌ଆଇଏକୁ ହସ୍ତାନ୍ତର କରିଛି। ପହଲଗାମ ଆତଙ୍କବାଦୀ ଆକ୍ରମଣ ପରଠାରୁ ଏନଆଇଏ ଟିମ୍ ଘଟଣାସ୍ଥଳରେ ରହିଛି। ଯେଉଁଥିରେ ଫୋରେନସିକ୍ ଦଳ ସହିତ ତଦନ୍ତକାରୀ ଦଳ ମଧ୍ୟ ରହିଛନ୍ତି।

ପହଲଗାମ ଆକ୍ରମଣ ପରେ, କର୍ତ୍ତୃପକ୍ଷ କାଶ୍ମୀରରେ ଆତଙ୍କବାଦୀ ଏବଂ ସେମାନଙ୍କ ସମର୍ଥକଙ୍କ ବିରୁଦ୍ଧରେ ଏକ ବଡ଼ ଧରଣର ଅଭିଯାନ ଆରମ୍ଭ କରିଥିଲେ, ଯେଉଁଥିରେ ଅନେକ ଆତଙ୍କବାଦୀଙ୍କ ଘର ଭାଙ୍ଗି ଦିଆଯାଇଥିଲା। ଆଡ୍ଡାଗୁଡ଼ିକରେ ଚଢ଼ାଉ କରାଯାଇଥିଲା ଏବଂ ଶହ ଶହ ଆତଙ୍କବାଦୀ ସହଯୋଗୀଙ୍କୁ ପଚରାଉଚରା ପାଇଁ ଅଟକ ରଖାଯାଇଥିଲା। ଶନିବାର ଦିନ ଅଧିକାରୀମାନେ ଏହି ସୂଚନା ଦେଇଛନ୍ତି। 

ଅଧିକାରୀମାନେ କହିଛନ୍ତି ଯେ ଗତ ୪୮ ଘଣ୍ଟା ମଧ୍ୟରେ ପାଞ୍ଚ ଜଣ ଆତଙ୍କବାଦୀ ଏବଂ ସେମାନଙ୍କ ସହାୟକଙ୍କ ଘର ଭାଙ୍ଗି ଦିଆଯାଇଛି। ସେ କହିଛନ୍ତି ଯେ ଆତଙ୍କବାଦୀ କାର୍ଯ୍ୟକଳାପରେ ସମ୍ପୃକ୍ତ ଅନ୍ୟମାନଙ୍କ ବିରୁଦ୍ଧରେ ସମାନ କାର୍ଯ୍ୟାନୁଷ୍ଠାନ ନିଆଯିବ। ଜମ୍ମୁ ଏବଂ କାଶ୍ମୀର ପୋଲିସର ଜଣେ ମୁଖପାତ୍ର କହିଛନ୍ତି ଯେ "ଆତଙ୍କବାଦୀଙ୍କୁ ସମର୍ଥନ କରୁଥିବା ନେଟୱାର୍କକୁ ଭାଙ୍ଗିବା" ପାଇଁ ଶନିବାର ଶ୍ରୀନଗରର ୬୦ ରୁ ଅଧିକ ସ୍ଥାନରେ ଚଢ଼ାଉ କରାଯାଇଥିଲା।