ନୂଆଦିଲ୍ଲୀ: ଦକ୍ଷିଣ ନାଇଜେରିଆରେ ଏକ ପେଟ୍ରୋଲ ଟ୍ୟାଙ୍କର ଭୟଙ୍କର ଭାବରେ ବିସ୍ଫୋରଣ ହୋଇଛି । ଦୁର୍ଘଟଣାରେ ଅତି କମରେ ୧୮ ଜଣଙ୍କର ମୃତ୍ୟୁ ହୋଇଥିବା ବେଳେ ୧୦ ଜଣ ଆହତ ହୋଇଛନ୍ତି। ଅଧିକାରୀ ମାନେ ଏହି ସୂଚନା ଦେଇଛନ୍ତି। ନାଇଜେରିଆର ଫେଡେରାଲ୍ ରୋଡ୍ ସେଫ୍ଟି କର୍ପସ ଶନିବାର ସନ୍ଧ୍ୟାରେ ଏକ ବିବୃତ୍ତିରେ କହିଛି ଯେ, ଦକ୍ଷିଣ-ପୂର୍ବ ରାଜ୍ୟ ଏନୁଗୁର ଏନୁଗୁ-ଓନିତ୍ସା ଏକ୍ସପ୍ରେସୱେରେ ଏକ ପେଟ୍ରୋଲ ବୋଝେଇ ଟ୍ୟାଙ୍କର ନିୟନ୍ତ୍ରଣ ହରାଇଥିଲା । ଏହା ୧୭ଟି ଗାଡ଼ିକୁ ଧକ୍କା ଦେବା ପରେ ନିଆଁ ଲାଗି ଯାଇଥିଲା।
ସିକ୍ୟୁରିଟି କର୍ପସ ଉଦ୍ଧାର ଦଳର ମୁଖପାତ୍ର ଓଲୁସେଗୁନ୍ ଓଗୁଙ୍ଗବେମାଇଡ କହିଛନ୍ତି ଯେ, ମୃତକ ମାନଙ୍କୁ ଚିହ୍ନିବା କଷ୍ଟକର ହେଉଛି, କାରଣ ସେମାନେ ସମ୍ପୂର୍ଣ୍ଣ ଭାବେ ପୋଡି ଯାଇଛନ୍ତି । ଉଦ୍ଧାର କର୍ମୀମାନେ ୧୦ ଜଣ ଆହତଙ୍କ ବ୍ୟତୀତ, ଅନ୍ୟ ତିନି ଜଣଙ୍କୁ ସୁରକ୍ଷିତ ସ୍ଥାନକୁ ଟାଣି ଆଣିଥିଲେ । ନାଇଜେରିଆର ଅଧିକାଂଶ ପ୍ରମୁଖ ରାସ୍ତାରେ ଏଭଳି ମାରାତ୍ମକ ଟ୍ରକ୍ ଦୁର୍ଘଟଣା ଏକ ସାଧାରଣ। କଥା । ଏହା ଆଫ୍ରିକାର ସବୁଠାରୁ ଅଧିକ ଜନସଂଖ୍ୟା ବିଶିଷ୍ଟ ଦେଶ।
ଉତ୍ତର-କେନ୍ଦ୍ରୀୟ ନାଇଜେରିଆର ନାଇଜର ରାଜ୍ୟର ସୁଲେଜା ଅଞ୍ଚଳ ନିକଟରେ ଏହି ମାସର ଆରମ୍ଭରେ ସମାନ ବିସ୍ଫୋରଣ ଘଟିଥିଲା। ଯେଉଁଠାରେ ଏକ ପେଟ୍ରୋଲ ଟ୍ୟାଙ୍କର ବିସ୍ଫୋରଣରେ ୯୮ ଜଣଙ୍କର ମୃତ୍ୟୁ ହୋଇଥିଲା। ଗୋଟିଏ ଟାଙ୍କିରୁ ଅନ୍ୟ ଟାଙ୍କିକୁ ପେଟ୍ରୋଲ ଭର୍ତ୍ତି କରିବା ସମୟରେ ଏହି ଦୁର୍ଘଟଣା ଘଟିଥିଲା। ସେହି ସମୟରେ, ପେଟ୍ରୋଲ ବାହାର କରିବା ପାଇଁ ଘଟଣାସ୍ଥଳରେ ଅନେକ ଶ୍ରମିକ ଏବଂ ଅନ୍ୟ ଲୋକମାନେ ଉପସ୍ଥିତ ଥିଲେ।
