ନୂଆଦିଲ୍ଲୀ,୨୮।୭: ନ୍ୟାସନାଲ ମେଡିକାଲ କମିଶନ (NMC) ନିର୍ଦ୍ଦେଶ ଦେଇଛନ୍ତି ଯେ ସର୍ଜରୀର ଲାଇଭ୍ ଷ୍ଟ୍ରିମିଂକୁ ସର୍ଜନ, ହସ୍ପିଟାଲ କିମ୍ବା ଉତ୍ପାଦ ବ୍ରାଣ୍ଡର ପ୍ରଚାର ପାଇଁ ବ୍ୟବହାର କରାଯିବା ଉଚିତ୍ ନୁହେଁ।  ଏହା କରିବା ପୂର୍ବରୁ ରୋଗୀଙ୍କ ସମ୍ମତି ନିଆଯିବା ଆବଶ୍ୟକ।

NMC ସର୍ଜରୀର ଲାଇଭ୍ ଷ୍ଟ୍ରିମିଂକୁ ନିୟନ୍ତ୍ରଣ କରିବା ପାଇଁ ଏହି ସପ୍ତାହରେ ବିସ୍ତୃତ ଗାଇଡଲାଇନ୍ ଜାରି କରିଛି। ଏହା ଅନୁଯାୟୀ, ସର୍ଜରୀ ସମୟରେ ବ୍ୟବହୃତ ଉପକରଣରେ ସର୍ଜନମାନଙ୍କର କୌଣସି ଆର୍ଥିକ କିମ୍ବା ବାଣିଜ୍ୟିକ ସ୍ୱାର୍ଥ ରହିବା ଉଚିତ୍ ନୁହେଁ।

ଗାଇଡଲାଇନ୍ ଅନୁସାରେ, 'ଲାଇଭ୍ ଷ୍ଟ୍ରିମିଂର ଉଦ୍ଦେଶ୍ୟ କେବଳ ଶିକ୍ଷାଗତ ହେବା ଉଚିତ ଏବଂ ବାଣିଜ୍ୟିକ ଲାଭ କିମ୍ବା ପ୍ରୋତ୍ସାହନ ପାଇଁ ନୁହେଁ। ସର୍ଜନମାନେ ଶଲ୍ୟଚିକିତ୍ସା କୌଶଳ ଏବଂ ରୋଗୀ ଯତ୍ନ ଉପରେ ଧ୍ୟାନ ଦେବା ଉଚିତ। ଏଥିରେ ରେଖାଙ୍କିତ କରାଯାଇଛି ଯେ, ଲାଇଭ୍ ଷ୍ଟ୍ରିମିଂ ସହିତ ଜଡିତ ଜଟିଳତା ଏବଂ ବିପଦଗୁଡ଼ିକୁ କଠୋର ନିୟମ ଏବଂ ବୀମା କଭରେଜ୍ ମାଧ୍ୟମରେ ସମାଧାନ କରାଯିବା ଉଚିତ। NMC କହିଛି ,ଯଦିଓ ଶଲ୍ୟଚିକିତ୍ସାର ଲାଇଭ୍ ଷ୍ଟ୍ରିମିଂ ଶିକ୍ଷଣୀୟ ହୋଇପାରେ, ଏହା ଇଣ୍ଟରାକ୍ଟିଭ୍ କିମ୍ବା ବ୍ୟବହାରିକ ତାଲିମ ଭଳି ଗଭୀର ଶିକ୍ଷା ପ୍ରଦାନ କରିପାରିବ ନାହିଁ।