ସୋରଡ଼ା, ୨୮/୫ :  ଇଛା ଶକ୍ତି ଆଗରେ ବାଧକ ସାଜି ପାରିନି ଅର୍ଥ । ଘରେ ଦୁଇ ମୁଠା ଖାଇବାକୁ ବି ନିଅଣ୍ଟ । ଏଭଳି ପରିସ୍ଥିତିରେ ବି ସେ କେବେ ପଛକୁ ହଟିନାହାନ୍ତି । ଆଗକୁ ଯାଇ ସମସ୍ତଙ୍କ ପାଇଁ ଉଦାହରଣ ସାଜିଛନ୍ତି । ଆଉ ଦେଖେଇ ଦେଇଛନ୍ତି କି ଏଠି ଦୃଢ ଇଛା ଶକ୍ତି ହିଁ ମଣିଷକୁ ଆଗକୁ ନେଇଥାଏ । ଯୁକ୍ତ ୨ପରୀକ୍ଷାରେ ସୋରଡ଼ା ଏନଏସିରେ ସବୁଠାରୁ ଆଗରେ ରହିଛନ୍ତି ଶୃତି । ଭଙ୍ଗା ଦଦରା ଭଡ଼ା ଘରେ ଆର୍ଥିକ ଅନାଟନରେ ବିତୁଛି ଜୀବନ । ତଥାପି ସେ କେବେ ହାର୍ ମାନି ନାହାନ୍ତି । 

ପ୍ରକାଶ ଯେ, ସୋରଡ଼ା ଏନଏସିର ଶୃତି ସାହୁ । ସ୍ଥାନୀୟ ପ୍ରକାଶ ଚନ୍ଦ୍ର ମହିଳା ଉଚ୍ଚ ମାଧ୍ୟମିକ ବିଦ୍ୟାଳୟରେ ଶୃତି ଅଧ୍ୟୟନ କରୁଥିବାବେଳେ ଚଳିତ ବର୍ଷ ଯୁକ୍ତ ୨ପରୀକ୍ଷାରେ ସର୍ବୋଚ୍ଚ ୫୨୦ରଖିଛନ୍ତି । ଯାହାକି ଯୁକ୍ତ ୨ ପରୀକ୍ଷାରେ ସମଗ୍ର ଏନଏସିରେ ପ୍ରଥମ । ମା’ ପ୍ରଭାସିନୀ ସାହୁ । ଝିଅକୁ ପାଠ ପଢାଇ ମଣିଷ କରିବାକୁ ଦିନ ରାତି ଏକ କରି ଦେଉଛନ୍ତି । ଘରେ ନଳୀ, ଖଜା, ପାମ୍ପଡ଼ ତିଆରି କରି ବୁଲି ବୁଲି ବିକ୍ରି କରିଥାନ୍ତି । ଏଥିରେ ଝିଅ ଶୃତି ବି ତାଙ୍କୁ ସାହାଯ୍ୟ କରିଥାନ୍ତି । ସେଥିରୁ ଯାହା ବାହାରେ ସେଥିରେ ଶୃତିକୁ ପାଠ ପଢାଇଥାନ୍ତି ମା’ ପ୍ରଭାସିନୀ । ଦିନକୁ ୮ ଘଣ୍ଟାରୁ ଅଧିକ ସମୟ ପାଠ ପଢାରେ ନିଜକୁ ନିମଗ୍ନ ରଖୁଥିବା ସହ ଆଗକୁ ଆଇଏଏସ ହେବାର ସ୍ବପ୍ନ ଦେଖୁଛନ୍ତି ବୋଲି କହିଛନ୍ତି ଶୃତି I ତାଙ୍କର ଏହି ସଫଳତା ପାଇଁ ସେ ନିଜ ମା’ ଓ ବିଦ୍ୟାଳୟର ଅଧ୍ୟକ୍ଷ, ଅଧ୍ୟାପିକା, ଅଧ୍ୟାପକମାନଙ୍କୁ ଶ୍ରେୟ ଦେଇଛନ୍ତି l ସମସ୍ତ ଶିକ୍ଷାର୍ଥୀ ଦୃଢ଼ ମନୋବଳ ରଖି ଆଗକୁ ବଢିବା ସହ ଆଧୁନିକ ମାନସିକତାରୁ ଦୁରେଇ ରହିବାକୁ କହିଛନ୍ତି ଶୃତି l