ନୂଆଦିଲ୍ଲୀ,୧୫/୧୧; ଜମ୍ମୁ ଓ କାଶ୍ମୀରର ଶ୍ରୀନଗରର ସ୍ଥିତ ନୌଗାମ ଥାନାରେ ବିସ୍ଫୋରଣକୁ ‘ଦୁର୍ଘଟଣାଜନିତ’ କହିଛନ୍ତି ପୁଲିସ୍ ମହାନିର୍ଦ୍ଦେଶକ । ଗଣମାଧ୍ୟମକୁ ଏନେଇ ସୂଚନା ଦେଲେ ଜମ୍ମୁ-କାଶ୍ମୀର ପୁଲିସ ମହାନିର୍ଦ୍ଦେଶକ (ଡିଜିପି) ନଳିନ ପ୍ରଭାତ କହିଛନ୍ତି ଏହା ଏକ ଦୁର୍ଘଟଣା । ବିସ୍ଫୋରଣ କାରଣ ସମ୍ପର୍କରେ ଅନ୍ୟ କୌଣସି ଅନୁମାନ ଅନାବଶ୍ୟକ । ସେ ସ୍ପଷ୍ଟ କରିଛନ୍ତି କି, କୌଣସି ଆତଙ୍କୀ ହମଲା ହୋଇନାହିଁ । ଫରିଦାବାଦରୁ ଅଣାଯାଇଥିବା ବିସ୍ଫୋରକ ସାମ୍ପଲିଂ ସମୟରେ ହୋଇଥିବା ଦୁର୍ଭାଗ୍ୟଜନକ ଦୁର୍ଘଟଣା ।  ଗୃହମନ୍ତ୍ରଣାଳୟ ପକ୍ଷରୁ ଘଟଣାକୁ 'ଦୁର୍ଘଟଣାଜନିତ' ବୋଲି କୁହାଯାଇଛି ।

​​​​​​​ଗତକାଲି ବିଳମ୍ବିତ ରାତି ପ୍ରାୟ ୧୧ଟା ୨୦ରେ ଶ୍ରୀନଗରସ୍ଥିତ ନୌଗାମ ଥାନାରେ ବିସ୍ଫୋରଣ ହୋଇ ୯ ଜଣଙ୍କର ମୃତ୍ୟୁ ହୋଇଛି । ୩୨ ଜଣ ଆହତ ହୋଇଛନ୍ତି । ବିସ୍ଫୋରଣରେ ଜଣେ ଏସଆଇଏ କର୍ମୀ, ୩ ଏଫଏସଏଲ, ୨ କ୍ରାଇମସିନ ଫଟୋଗ୍ରାଫର, ୨ ରାଜସ୍ୱ ଅଧିକାରୀ ଓ ଜଣେ ଟେଲରଙ୍କର ମୃତ୍ୟୁଙ୍କର ହୋଇଛି । ବିସ୍ଫୋରଣ ସମ୍ପର୍କରେ ଗଣମାଧ୍ୟମକୁ ସୂଚନା ଦେଇଛନ୍ତି ଜମ୍ମୁ କାଶ୍ମୀର ଡିଜିପି ନଳିନ ପ୍ରଭାତ । ସେ କହିଛନ୍ତି, ''ବିସ୍ଫୋରଣ ଦୁର୍ଘଟଣାଜନିତ । ଘଟଣାର କିଛି ଅନ୍ୟ କାରଣ ଥିବା ଅନୁମାନ କରିବା ଅନାବଶ୍ୟକ । ପୁଲିସ୍ ଓ ଫରେନ୍ସିକ ଯାଞ୍ଚ ବେଳେ ବିସ୍ଫୋରଣ ଘଟିଛି । ଘଟଣାରେ କୌଣସି ଆତଙ୍କୀ ଷଡଯନ୍ତ୍ର କି ଅନ୍ୟ କାହାର ହସ୍ତକ୍ଷେପ ନାହିଁ । ଫରିଦାବାଦରୁ ଆସିଥିବା ବିସ୍ଫୋରକ ସାମଗ୍ରୀର ସାମ୍ପଲିଂ ପ୍ରକ୍ରିୟା ୨ ଧରି ଚାଲିଥିଲା । ଏହି ସମୟରେ ଦୁର୍ଘଟଣା ଘଟିଛି । କେମିତି ଓ କେଉଁ ପରସ୍ଥିତିରେ ଘଟିଲା ତାର ତଦନ୍ତ ଚାଲିଛି । ଆତଙ୍କୀ ଷଡ଼ଯନ୍ତ୍ରର କୌଣସି ଲିଙ୍କ ନାହିଁ । ଫରିଦାବାଦରେ ଜବତ ବିସ୍ଫୋରକର ସାମ୍ପଲିଂ ସତର୍କତାର ସହିତ ଚାଲିଥିଲା ହେଲେ ଅଘଟଣ ଘଟିଗଲା ।'' 

​​​​​​​ବିସ୍ଫୋରଣକୁ ନେଇ ଜଣେ ସ୍ଥାନୀୟ ବାସିନ୍ଦା ଶଫାଦ ଅହମ୍ମଦ କହିଛନ୍ତି, "ଗତକାଲି ରାତି ପ୍ରାୟ ୧୧.୨୦ ସମୟରେ ଏକ ଜୋରଦାର ବିସ୍ଫୋରଣ ହୋଇଥିଲା । ଆମେ ଥରି ଉଠିଥିଲୁ । ଆମେ ପରେ ଶୋଇବାକୁ ଚାଲି ଯାଇଥିଲୁ ।  ଆଜି ସକାଳେ ଏହା ବିଷୟରେ ଜାଣିବାକୁ ପାଇଲୁ । ଆମେ ଏଠାକୁ ଦେଖିବାକୁ ଆସିଛୁ କିନ୍ତୁ ସେମାନେ ଆମକ ଭିତରକୁ ଛାଡୁନାହାନ୍ତି । ମୋ ସମ୍ପର୍କୀୟମାନେ ପୁଲିସ ଷ୍ଟେସନ ନିକଟରେ ରୁହନ୍ତି । ମୁଁ ସେମାନଙ୍କ ସହିତ କଥା ହୋଇପାରୁନାହିଁ । ସେମାନେ ଆମକୁ  ସାକ୍ଷାତ କରିବାକୁ ଦେଉନାହାଁନ୍ତି, କିନ୍ତୁ ସେମାନେ ଅଟକାଇ ପାରିବେ ନାହିଁ । ମୁଁ ମୋ ଜୀବନରେ ଏତେ ଜୋରରେ ବିସ୍ଫୋରଣ କେବେ ଶୁଣିନଥିଲି। "