ସମ୍ବଲପୁର,୨୬/୦୮: ଘର ଲିପାପୋଛା ସରିଛି । ଚୂନ ଲଗେଇ କିଏ ଚକାଚକ କଲାଣି ତ ଆଉ କିଏ ଗୋବର ଲେପି ଘରକୁ ସଜଉଛି । ବାହାରେ କାମକୁ ଯାଇଥିବା ପୁଅ ବି ଫେରୁଛି । ଝିଅ ବି ପାଠପଢ଼ାରୁ ଆସିବାକୁ ଅନେଇ ବସିଛି । କକା, ଖୁଡ଼ି, ପରିବାର ପରିଜନ ସମସ୍ତେ ଏକାଠି ହେବେ । ଏକାସାଙ୍ଗରେ ନୂଆଁ ଖାଇବେ । ବର୍ଷଯାକର ବିବାଦ ତୁଟାଇ ପୁଣି ଦଦା, ଭାଇ ଏକାଠି ମିଶିବେ । ବଡ଼ ଭାଇ ହାତରୁ ସାନ ନବାନ୍ନ ଖାଇବ । ଏଥିପାଇଁ ସବୁ ପ୍ରସ୍ତୁତି ସରିଛି । ଦିନକ ପରେ ନୂଆଁଖାଇ ପାଇଁ ପଶ୍ଚିମ ଓଡ଼ିଶାର ସବୁ ଘର ଏବେ ଚଳଚଞ୍ଚଳ ।
ନବାନ୍ନ ଭକ୍ଷଣ ପାଇଁ ନିଜ ନିଜ ଜାତିର ପ୍ରଥା ଅନୁସାରେ କୁରେଇ ଓ ମହୁଲ ପତ୍ର ତୋଳି ଦନା ପ୍ରସ୍ତୁତିରେ ମହିଳାମାନେ ବ୍ୟସ୍ତ ଅଛନ୍ତି । ଖଇ ବା ଲିଆରୁ ଜୁଗାର ପ୍ରସ୍ତୁତି ସହିତ ପିଠାପଣା ପାଇଁ ଚାଉଳ ଚୂନା ତିଆରି କାମ ବି ଶେଷ ପର୍ଯ୍ୟାୟରେ ପହଞ୍ଚିଲାଣି । ଏଥର ଲମ୍ବା ଛୁଟି ନେଇ ପରିବାର ସସଦ୍ୟ ଫେରୁଛନ୍ତି । ଗୁରୁବାର ନୂଆଁଖାଇ ଛୁଟି ରହିଛି । ପରଦିନକୁ ରାଜ୍ୟ ସରକାର ଛୁଟି ଘୋଷଣା କରିଛନ୍ତି । ତେଣୁ ଶନିବାର ଓ ରବିବାର ଛୁଟିରେ ରହି ଏକାଥରକେ ସୋମବାରକୁ ଯିବେ । ତେଣୁ ପରିବାର ସଦସ୍ୟ ଘରମୁହାଁ ହେଲେଣି । ଏପଟେ, ଘରକୁ ଆସିବାକୁ ଥିବା ପଶ୍ଚିମ ଓଡ଼ିଶା ଲୋକଙ୍କ ପାଇଁ ବସ୍ ଓ ଟ୍ରେନ୍ରେ ଟିକଟ୍ ମିଳୁନି । ୨୬ ଏବଂ ୨୭ ତାରିଖରେ ପାଇଁ ସମ୍ବଲପୁରକୁ ଆସୁଥିବା ସମସ୍ତ ଟ୍ରେନ୍ରେ ଆଉ ବୁକିଂ ହୋଇପାରୁନି । ବିଶେଷ ଭାବେ ଭୁବନେଶ୍ୱର, କୋଲକାତା, ଦିଲ୍ଲୀ ଏବଂ ଅନ୍ୟ ସହରର ପାଇଁ ଟ୍ରେନ୍ ବୁକିଂ ସରିଯାଇଛି ।
ଏମିତି କି, ଭୁବନେଶ୍ୱରରୁ ଆସୁଥିବା ପ୍ରାୟ ସବୁ ବସ୍ ସିଟ୍ ବିକ୍ରି ସରିଛି । ତେଣୁ କିଛି ଲୋକ ଏବେ ଏକାଠି ହୋଇ ଗାଡ଼ି ଭଡ଼ା କରି ଆସିବାକୁ ଯୋଜନା ମଧ୍ୟ କରୁଛନ୍ତି । ହେଲେ ଦିନମଜୁରୀ କରିବାକୁ ଯାଇଥିବା ଲୋକଙ୍କ ପାଇଁ ବହୁ ଅସୁବିଧା ହେଉଛି । ତେଣୁ ଆସନ୍ତା ବର୍ଷଠାରୁ ନୂଆଁଖାଇ ପାଇଁ ସ୍ୱତନ୍ତ୍ର ଟ୍ରେନ୍ ଚଳାଚଳ କରାଯାଉ । ଛଟ୍ ପୂଜା ଅବସରରେ ବିହାର ଓ ଝାଡଖଣ୍ଡ ପାଇଁ ସ୍ୱତନ୍ତ୍ର ଟ୍ରେନ୍ ବ୍ୟବସ୍ଥା ହେଉଛି । ତେଣୁ ପଶ୍ଚିମ ଓଡ଼ିଶାବାସୀଙ୍କ ପାଇଁ ମଧ୍ୟ ସ୍ୱତନ୍ତ୍ର ଟ୍ରେନ୍ ବ୍ୟବସ୍ଥା କରିବାକୁ ଦାବି ହୋଇଛି ।
