ନୂଆଦିଲ୍ଲୀ: ଚିପ୍ ନିର୍ମାଣକାରୀ କମ୍ପାନୀ ଏନଭିଡିଆ, ଆପଲ ଏବଂ ମାଇକ୍ରୋସଫ୍ଟକୁ ପଛରେ ପକାଇ ବିଶ୍ୱର ସବୁଠାରୁ ମୂଲ୍ୟବାନ କମ୍ପାନୀରେ ପରିଣତ ହୋଇଛି ।ଏନଭିଡିଆର ବଜାର ମୂଲ୍ୟ ୩.୯୨ ଟ୍ରିଲିୟନ ଡଲାରରେ ପହଞ୍ଚିଛି, ଯାହା ଆପଲର ପୂର୍ବ ରେକର୍ଡ ୩.୯୧୫ ଟ୍ରିଲିୟନ ଡଲାର ଏବଂ ମାଇକ୍ରୋସଫ୍ଟର ବର୍ତ୍ତମାନର ମୂଲ୍ୟ ୩.୭ ଟ୍ରିଲିୟନ ଡଲାର ଠାରୁ ଅଧିକ । ପ୍ରଥମ ଥର ପାଇଁ ଏନଭିଡିଆ ବିଶ୍ୱସ୍ତରରେ ଶୀର୍ଷ ସ୍ଥାନ ହାସଲ କରିଛି। କୃତ୍ରିମ ବୁଦ୍ଧିମତା (AI)ର ବର୍ଦ୍ଧିତ ଚାହିଦା Nvidiaକୁ ନୂତନ ଶିଖରରେ ପହଞ୍ଚାଇଛି ।
AI ପ୍ରତି ନିବେଶକଙ୍କ ଉତ୍ସାହ ଶୀର୍ଷରେ ଅଛି ଏବଂ Nvidia ଏହି ଦୌଡ଼ର ସୁପରଷ୍ଟାର ଭାବରେ ଉଭା ହୋଇଛି । କମ୍ପାନୀର ହାଇ-ଟେକ୍ ଚିପ୍ସ ବଡ଼ AI ମଡେଲଗୁଡ଼ିକୁ ତାଲିମ ଦେବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରେ । ଏହି କାରଣରୁ Microsoft, Amazon, Meta, Alphabet ଏବଂ Tesla ଭଳି ଟେକ୍ ଜାଏଣ୍ଟମାନେ ସେମାନଙ୍କର AI ଡାଟା ସେଣ୍ଟର ପାଇଁ Nvidiaର ପ୍ରୋସେସର ଉପରେ ନିର୍ଭର କରନ୍ତି । ଏହି କମ୍ପାନୀଗୁଡ଼ିକର ଚାହିଦା Nvidiaର ଚିପ୍ସର ଚାହିଦାକୁ ଆକାଶଛୁଆଁ କରିଛି ।
୨୦୨୧ ରେ ଏନଭିଡିଆର ମୂଲ୍ୟ ପ୍ରାୟ ୫୦୦ ବିଲିୟନ ଡଲାର ଥିଲା । କିନ୍ତୁ ଚାରି ବର୍ଷ ମଧ୍ୟରେ କମ୍ପାନୀ ଆଠ ଗୁଣ ବୃଦ୍ଧି ସହ ୪ ଟ୍ରିଲିୟନ୍ ଡଲାର ଛୁଇଁବାକୁ ଯାଉଛି । ଏହି ମୂଲ୍ୟ କାନାଡା ଏବଂ ମେକ୍ସିକୋର ଷ୍ଟକ୍ ବଜାରର ମୋଟ ମୂଲ୍ୟଠାରୁ ଅଧିକ । କେବଳ ସେତିକି ନୁହେଁ, Nvidiaର ବଜାର ମୂଲ୍ୟ ବ୍ରିଟେନର ସମସ୍ତ ତାଲିକାଭୁକ୍ତ କମ୍ପାନୀର ମୋଟ ମୂଲ୍ୟଠାରୁ ମଧ୍ୟ ଅଧିକ ହୋଇଛି । Nvidia ର ସେୟାର ୨.୨% ବୃଦ୍ଧି ପାଇ ପ୍ରତି ସେୟାର ୧୬୦.୬ ଡଲାରରେ ପହଞ୍ଚିଛି । ଏହି ବୃଦ୍ଧି କମ୍ପାନୀକୁ ଏହାର ଆମେରିକୀୟ ଟେକ୍ ପ୍ରତିଦ୍ୱନ୍ଦ୍ୱୀ Apple ଏବଂ Microsoft ଠାରୁ ଆଗରେ ରଖିଛି ।
ବିଶେଷ କଥା ହେଉଛି ଯେ, ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବିଶ୍ୱସ୍ତରୀୟ ଶୁଳ୍କ ଘୋଷଣା ପରେ ଏପ୍ରିଲ ୪ରେ ଷ୍ଟକ୍ ବଜାରରେ କ୍ଷତି ସହିବା ପରେ ଏନଭିଡିଆ ବଡ଼ ପ୍ରତ୍ୟାବର୍ତ୍ତନ କରିଛି । କମ୍ପାନୀର ସେୟାର ସେହି ସମୟର ସର୍ବନିମ୍ନ ସ୍ତରରୁ ୬୮% ରୁ ଅଧିକ ଉପରକୁ ଉଠିଛି ।
