ଦେବଗଡ଼,୨୦/୧୦: ଘରର ଏକମାତ୍ର ସନ୍ତାନ ଭାବେ ଜନ୍ମ ହୋଇ ନିଜ ପରିବାରର ଆର୍ଥିକ ସ୍ଥିତି ସଜାଡ଼ିବାକୁ ୨ ବର୍ଷ ହେଲା ପୋଷ୍ଟ ପିଅନ କାମ କରୁଥିବା ତିଳେଇବଣି ବ୍ଲକ କଂସର ଗ୍ରାମର ଭାନୁପ୍ରତାପ ମାଝୀ ଯୁବପିଢ଼ିଙ୍କ ପାଇଁ ଉଦାହରଣ ପାଲଟିଛନ୍ତି । ଚଳିତ ବର୍ଷର ଓଡ଼ିଶା ସିଭିଲ୍ ସର୍ଭିସ ପରୀକ୍ଷାରେ ୩୯୦ ନମ୍ବର ର୍ୟାଙ୍କ୍ ହାସଲ କରି କୃତକାର୍ଯ୍ୟ ହୋଇଛନ୍ତି ଭାନୁପ୍ରତାପ ।
କଂସର ଗାଁ ଗମ୍ଭାରିପାଲି ସାହିର ଚାଷୀ ବାପା ଜଗନ୍ନାଥ ମାଝୀ ଓ ଗୃହିଣୀ ମାଆ ତପସ୍ୱିନୀ ମାଝୀଙ୍କ ଏକମାତ୍ର ସନ୍ତାନ ସେ । ୨୦୦୦ ମସିହା ମାର୍ଚ୍ଚ ୨୯ ତାରିଖ ଜନ୍ମିତ ଭାନୁପ୍ରତାପ ସ୍ଥାନୀୟ ଶିଶୁ ବିଦ୍ୟାମନ୍ଦିରରୁ ପ୍ରାଥମିକ ଶିକ୍ଷା ଗ୍ରହଣ କରି ୨୦୧୫ରେ ସୁନାମୁଣ୍ଡା ଜବାହର ନବୋଦୟ ବିଦ୍ୟାଳୟରୁ ହାଇସ୍କୁଲ ଓ ୨୦୧୭ରେ ବଲାଙ୍ଗୀର ଜବାହର ନବୋଦୟ ବିଦ୍ୟାଳୟରୁ ଯୁକ୍ତ-୨ ପାସ୍ ପରେ ସମ୍ବଲପୁର ଗଙ୍ଗାଧର ମେହେର ସ୍ୱୟଂଶାସିତ ବିଶ୍ୱବିଦ୍ୟାଳୟ (ଇଗ୍ନୋ) ରୁ ୨୦୨୧ରେ ସ୍ୱାତକ ଡିଗ୍ରୀ ହାସଲ କରିଥିଲେ ।
ଉଚ୍ଚ ଶିକ୍ଷା ପାଇଁ ପରିବାରର ଦୁର୍ବଳ ଆର୍ଥିକ ପରିସ୍ଥିତି ବାଧକ ସାଜିବାରୁ ଭାନୁପ୍ରତାପ ୨୦୨୨ରେ କଂସର ଗ୍ରାମ୍ୟ ଡାକଘରେ ପୋଷ୍ଟ ପିଅନ ଭାବେ କାମ କରିବା ସହ ଓପିଏସ୍ସି ପାଇଁ ନିଜକୁ ପ୍ରସ୍ତୁତ କରୁଥିଲେ । ଆଜି ତାଙ୍କର ନିଷ୍ଠାପର ଉଦ୍ୟମ ଓ ଅକ୍ଳାନ୍ତ ପରିଶ୍ରମର ଫଳ ସ୍ୱରୂପ ଏଭଳି ସଫଳତା ମିଳିବା ପରେ ଅଞ୍ଚଳରେ ଖୁସିର ମାହୋଲ ସୃଷ୍ଟି କରିବା ସହ ତାଙ୍କ ପାଖକୁ ଶୁଭେଚ୍ଛୁଙ୍କ ସୁଅ ଛୁଟିଛି ।
