ଗୁଣପୁର,୧୦/୧୧: ଓଡିଶା ସୀମାରେ ପୁଣି ଆନ୍ଧ୍ରର ଅନୁପ୍ରବେଶ । ସୀମାନ୍ତ ମାରମା ପଞ୍ଚାୟତରେ ଆନ୍ଧ୍ରର ଏକ ବେସରକାରୀ ସଂସ୍ଥା ପକ୍ଷରୁ ଦୁଇଟି ସୂଚନାଫଳକ ଲଗାଯାଇଛି । ଗୋଟିଏ କାମନାଗୁଡ଼ା ଏବଂ ଅନ୍ୟଟି ତୋଟାଗୁଡ଼ା ଛକରେ ଲାଗିଛି । ଫଳକରେ ‘ଫୋକସ୍ଡ ରୁରାଲ୍ ଡେଭଲପ୍ମେଣ୍ଟ ପ୍ରୋଗ୍ରାମ’ ଏବଂ ତଳେ ମାନ୍ୟମ ପାର୍ବତୀପୁରମ ଜିଲ୍ଲା ଭାମିନୀ ମଣ୍ଡଳମ୍ କୋଟାକଣ୍ଡା ଗାଁ ବୋଲି ଦର୍ଶାଯାଇଛି । ୱାସନ୍ ଓ ଏଚ୍ଡିଏଫ୍ସି ବ୍ୟାଙ୍କ ତରଫରୁ ଏହି ସୂଚନାଫଳକ ଲଗାଯାଇଥିବା ଉଲ୍ଲେଖ ରହିଛି । କିଛିବର୍ଷ ତଳେ ଆନ୍ଧ୍ରର କେତେକ ଲୋକ ଆସି ଫଳକ ଲଗାଇଥିବା ଉଭୟ ଗାଁର ଲୋକେ କହିଛନ୍ତି । ଓଡି଼ଶା ସୀମାନ୍ତ ଅଞ୍ଚଳରେ ଆନ୍ଧ୍ରର ଫଳକଗୁଡ଼ିକ ଲାଗିଥିଲେ ବି ଏଥିପ୍ରତି ଓଡ଼ିଶା ପ୍ରଶାସନ କିମ୍ବା ସ୍ଥାନୀୟ ପ୍ରଶାସନର ଦୃଷ୍ଟିନପଡ଼ିବା ବିଡ଼ମ୍ବନା ବିଷୟ ।
ସୂଚନାଥାଉକି, ଏହା ପୂର୍ବରୁ ଆନ୍ଧ୍ରପ୍ରଦେଶ ପକ୍ଷରୁ ମରମା ପଞ୍ଚାୟତ ଅଞ୍ଚଳରେ ରାସ୍ତା ନିର୍ମାଣ କରାଯାଇଥିଲା । ଏହାକୁ ନେଇ ସେତେବେଳେ ବିବାଦ ଉପୁଜିଥିଲା । ପରେ ସେହି ରାସ୍ତା କାର୍ଯ୍ୟ ବନ୍ଦ ହୋଇଥିଲା । ବର୍ତ୍ତମାନ ପୁଣି ସେହି ପଞ୍ଚାୟତ ଅଞ୍ଚଳରେ ଆନ୍ଧ୍ରର ବିଭିନ୍ନ ଯୋଜନାର ଫଳକ ଲାଗି ଥିବାରୁ ଆଉ ଏକ ବିବାଦୀୟ ପରିସ୍ଥିତି ସୃଷ୍ଟି କରିଛି । ଆନ୍ଧ୍ର ପକ୍ଷରୁ କାହିଁକି ଓଡ଼ିଶା ଭିତରେ ଅନୁପ୍ରବେଶ କରି ବାରମ୍ବାର ବିଭ୍ରାଟ କରାଯାଉଛି ଏବଂ ଓଡ଼ିଶା ପ୍ରଶାସନର କିପରି ନଜର ପଡୁନାହିଁ ତାହା ସମସ୍ତଙ୍କୁ ଚକିତ କରିଛି । ଏହାକୁ ନେଇ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି ।
