ଗୋପାଳପୁର,୨୦/୦୬: ଗୋପାଳପୁର ବେଳାଭୂମି ଗଣଦୁଷ୍କର୍ମ ମାମଲାରେ ୬ ଜଣ ଅଭିଯୁକ୍ତ ବ୍ରହ୍ମପୁର ଜେଲ୍ରେ । ଅନ୍ୟ ୪ ଜଣ ନାବାଳକ ବାଳ ସୁଧାର ଗୃହରେ ଅଛନ୍ତି । ଏହି ମାମଲାର ତନାଘନା ଚଳାଇଛି କ୍ରାଇମ୍ବ୍ରାଞ୍ଚ୍ । କ୍ରାଇମ୍ବ୍ରାଞ୍ଚ୍ ଅଭିଯୁକ୍ତଙ୍କ ଟିଆଇ ପରେଡ୍ କରିବାକୁ ଗଞ୍ଜାମ ଜିଲ୍ଲା ଓ ଦୌରା ଜଜ୍ କୋର୍ଟ ପରିସରରେ ଥିବା ଜେଏମ୍ଏଫ୍ସି (ଏଲ୍ଆର୍ ଆଣ୍ଡ୍ ଏଲ୍ଟିଭି) ଅନ୍ୱେଷା ଦାଶଙ୍କ କୋର୍ଟରେ ଆବେଦନ କରିଥିଲେ । ଏନେଇ କୋର୍ଟ ଅନୁମତି ଦେଇଛନ୍ତି । ତଦନ୍ତ ଅଧିକାରୀ ଶୁକ୍ରବାର ଓ ଶନିବାର ଦୁଇଦିନରେ ଟିଆଇ ପରେଡ୍ କରିବେ ବୋଲି ସୂଚନା ମିଳିଛି । ଜେଲ୍ରେ ଜଣେ ବିଚାରପତିଙ୍କ ଉପସ୍ଥିତିରେ ଅଭିଯୁକ୍ତଙ୍କୁ ଚିହ୍ନଟ କରିବେ ପୀଡ଼ିତା । ତାଙ୍କ ପୁରୁଷ ବନ୍ଧୁ ମଧ୍ୟ ଟିଆଇ ପରେଡ୍ରେ ରହିବେ ବୋଲି ଜଣାପଡ଼ିଛି ।
ବିଏନ୍ଏସ୍ଏସ୍ ଧାରା ୧୮୩ ଅନୁସାରେ ଉପରୋକ୍ତ କୋର୍ଟରେ ଗୁରୁବାର ପୀଡ଼ିତା ଓ ତାଙ୍କ ପୁରୁଷ ବନ୍ଧୁଙ୍କ ବୟାନ ରେକର୍ଡ ହୋଇସାରିଛି । ଘଟଣା ସମ୍ପର୍କରେ କୋର୍ଟରେ ଉଭୟେ ବୟାନ ଦେଇଛନ୍ତି । ଏହାସହ ଗୋପାଳପୁରର ଜଣେ ରେଷ୍ଟୁରାଣ୍ଟ୍ ମାଲିକଙ୍କ ବୟାନ ମଧ୍ୟ ରେକର୍ଡ ହୋଇଛି । ଅଭିଯୁକ୍ତମାନେ ବ୍ୟବହାର କରିଥିବା କଣ୍ଡୋମ୍ ଜବତ ହୋଇଛି । ତାହାକୁ ପରୀକ୍ଷା ପାଇଁ ଡାକ୍ତରଖାନା ପଠାଯାଇଛି । ତଦନ୍ତ ଚାଲିଥିବାରୁ ଅଧିକାରୀମାନେ କିଛି କହିନାହାନ୍ତି । ତେବେ ଦୁଷ୍କର୍ମ ସମୟରେ ଅଭିଯୁକ୍ତମାନେ କଣ୍ଡୋମ୍ ବ୍ୟବହାର କରିଥିବା ଏଫ୍ଏମ୍ଟି ବିଭାଗ ମୁଖ୍ୟ ପ୍ରଫେସର ଡା. ସୁଦୀପା ଦାଶ କହିଛନ୍ତି ।
ତୃତୀୟ ଦିନରେ କ୍ରାଇମ୍ବ୍ରାଞ୍ଚ୍ର ଜଣେ ଅତିରିକ୍ତ ଏସ୍ପିଙ୍କ ସମେତ ୯ ଜଣିଆ ଟିମ୍ ଗୋପାଳପୁର ଥାନାରେ ପହଞ୍ଚି ଆଇଆଇସି ଏବଂ ତଦନ୍ତରେ ସାମିଲ ସମସ୍ତ ଅଧିକାରୀଙ୍କ ସହ ଆଲୋଚନା କରିଛନ୍ତି । ଗଣଦୁଷ୍କର୍ମ ପରେ ଯୁବତୀ ପାଟି କରିବାରୁ କିଛି ଲୋକ ଘଟଣାସ୍ଥଳକୁ ଯାଇଥିଲେ । ସେମାନଙ୍କୁ କ୍ରାଇମ୍ବ୍ରାଞ୍ଚ୍ ପଚରାଉଚରା କରିଥିବା ଜଣାପଡ଼ିଛି । ପୀଡ଼ିତାଙ୍କ ପୁରୁଷ ବନ୍ଧୁଙ୍କୁ ଆଜି ମଧ୍ୟ କ୍ରାଇମ୍ବ୍ରାଞ୍ଚ୍ ଟିମ୍ ଜେରା କରିଥିବା ସୂଚନା ମିଳିଛି । ପୂର୍ବରୁ ୬ଟି ମୋବାଇଲ୍ ଫୋନ୍ ଜବତ ହୋଇଥିବା ବେଳେ ଆଜି ଆଉ ଗୋଟିଏ ମୋବାଇଲ୍ ଜବତ କରିଛି । ସେହିପରି ଟିମ୍ ଗୋପାଳପୁର ଥାନାରୁ ଏଫ୍ଆଇଆର୍ (ଅଭିଯୋଗପତ୍ର) ଜିମାରେ ନେଇଛି । କ୍ରାଇମ୍ବ୍ରାଞ୍ଚ୍ ଏବେ ଏକ ନୂଆ ମାମଲା ରୁଜୁ କରି ତଦନ୍ତ କରୁଛି ।
ସୂଚନାଯୋଗ୍ୟ କି, ଗତ ୧୫ ତାରିଖ(ରବିବାର) ସନ୍ଧ୍ୟାରେ ଯୁବତୀ ଓ ତାଙ୍କ ପୁରୁଷ ବନ୍ଧୁ ଗୋପାଳପୁର ବେଳାଭୂମି ବୁଲିବାକୁ ଯାଇଥିଲେ । ରାତି ୮ଟାରେ ପାନ୍ଥନିବାସ ପଛରେ ୧୦ ଜଣ ଯୁବକ ମିଶି ଯୁବତୀଙ୍କୁ ଗଣଦୁଷ୍କର୍ମ କରିଥିଲେ । ରାତି ୧୧ଟାରେ ପୀଡ଼ିତା ଗୋପାଳପୁର ଥାନାରେ ଅଭିଯୋଗ କରିବା ପରେ ପୁଲିସ ସେହି ରାତିରେ ସମ୍ପୃକ୍ତ ଅଭିଯୁକ୍ତଙ୍କୁ ଗିରଫ କରିଥିଲା । କ୍ରାଇମ୍ବ୍ରାଞ୍ଚ୍ ଏହି ମାମଲାର ତଦନ୍ତ ଭାର ନେଇଛନ୍ତି । ଅଭିଯୁକ୍ତମାନେ କୋର୍ଟଚାଲାଣ ହେବାର ଦୁଇ ଦିନ ଭିତରେ ଟିଆଇ ପରେଡ୍ ଅନୁମତି ମିଳିଛି ।
