ଭୁବନେଶ୍ୱର ୧୦/୧୧: ଓଡ଼ିଶାରେ ନିର୍ମିତ ଅତ୍ୟାଧୁନିକ ଡ୍ରୋନ ହିମାଳୟର ଶିଖର ଉପରେ ଏବେ ଉଡିବାକୁ ଯାଉଛି । ଡ୍ରୋନ୍ ସହାୟତାରେ ଅପହଞ୍ଚ ଅଞ୍ଚଳରେ କାର୍ଯ୍ୟରତ ଭାରତୀୟ ସୈନିକଙ୍କ ନିକଟରେ ଖାଦ୍ୟ, ଔଷଧ, ଗୋଳାବାରୁଦ ଓ ଅତ୍ୟାବଶ୍ୟକ ସାମଗ୍ରୀ ପହଞ୍ଚାଇବ । ବଡ଼କଥା ହେଉଛି, ଏଭଳି ଡ୍ରୋନ୍ ଓଡ଼ିଆ ପୁଅ ନିର୍ମାଣ କରିଛନ୍ତି । ଯାହା ଉନ୍ମୋଚିତ ହୋଇଛି । ଡ୍ରୋନ୍ର ନାମ ରଖାଯାଇଛି ‘ଏୟାର ଓରକା’।
୬୦ କିଲୋ ଓଜନ ବିଶିଷ୍ଟ ଏହି ଡ୍ରୋନ୍ରେ ଅତ୍ୟାଧୁନିକ ସେନ୍ସର ରହିଛି । ଏହା ୨୦କିଲୋ ଓଜନର ସାମଗ୍ରୀ ନେଇ ସର୍ବାଧିକ ୧୮ହଜାର ଫୁଟ୍ ଉପରେ ୧୦ କିମି ଯାଏ ଉଡ଼ିବ । ଡ୍ରୋନ୍ ଚଲାଇବାକୁ କୌଣସି ଅପରେଟର ନିକିମା ହେବାକୁ ପଡ଼ିବ ନାହିଁ । ଏଥିରେ ସ୍ଥାନର ଅକ୍ଷାଂଶ ଓ ଦ୍ରାଘିମା ଫିଡ୍ କରି ଡ୍ରୋନକୁ ଅନ୍ କଲେ ଏହା ଗନ୍ତବ୍ୟସ୍ଥଳକୁ ଯାଇ ପୁନଶ୍ଚ ମୂଳସ୍ଥାନକୁ ଫେରିବ । ଡ୍ରୋନର ରଙ୍ଗ କଳା। ଏହାର ଶବ୍ଦ ମଧ୍ୟ ବହୁତ କ୍ଷୀଣ । ତେଣୁ ଉଡ଼ୁଥିବା ବେଳେ କେହି ଜାଣିପାରିବେନି । ଯଦ୍ୱାରା ଶତ୍ରୁକବଳରୁ ନିଜକୁ ରକ୍ଷା କରିବ । ଦିନ ସହ ରାତି, କୁହୁଡ଼ି ଓ ପ୍ରବଳ ବର୍ଷାରେ ମଧ୍ୟ ଏହା ଉଡ଼ିବାର କ୍ଷମତା ରଖିଛି । ଏହା ସମ୍ପୂର୍ଣ୍ଣ ୱାଟରପ୍ରୁଫ୍ ।
ଉଲ୍ଲେଖଯୋଗ୍ୟ, ଭୁବନେଶ୍ୱର ଚନ୍ଦକା ଅଞ୍ଚଳର ଏକ ଛୋଟ ଗ୍ୟାରେଜ୍ରେ ଏହି ଡ୍ରୋନ୍ କାମ ଆରମ୍ଭ ହୋଇଥିଲା । ପ୍ରାୟ ୨ବର୍ଷର ପରିଶ୍ରମ ପରେ ୨୦୨୩ରେ ଡ୍ରୋନ୍ ପ୍ରସ୍ତୁତ ହୋଇଥିଲା । ପ୍ରଥମେ ଏହାକୁ ହିମାଳୟସ୍ଥିତ ଭାରତୀୟ ସେନାର ବରିଷ୍ଠ ଅଧିକାରୀଙ୍କ ନିକଟକୁ ନିଆଯାଇଥିଲା । ଡ୍ରୋନ୍ର କାମ ଦେଖି ସେନାର ଅଧିକାରୀମାନେ ଖୁସି ପ୍ରକାଶ କରିବା ସହ ଏହାକୁ ସାମିଲ କରିବାକୁ ସମ୍ମତ୍ତି ଦେଇଥିଲେ । ବର୍ତ୍ତମାନ ଭାରତୀୟ ସେନାକୁ ମୋଟ ୨୦ଟି ଡ୍ରୋନ୍ ପ୍ରଦାନ କରାଯାଇଛି । ଯାହା ହିମାଳୟ, ଟାଇଗର ହିଲ ଓ ଲଦାଖରେ କାମ କରିବା । କେବଳ ସେନାର ପରିବହନ କାମ ନୁହେଁ, ପ୍ରାକୃତିକ ବିପର୍ଯ୍ୟୟ ବେଳେ ମଧ୍ୟ ଏୟାର ଓରକା କାମରେ ଆସିବ ବୋଲି ଏହାକୁ ନିର୍ମାଣ କରିଥିବା ବନଭି ଏରୋର ସିଇଓ ସତ୍ୟବ୍ରତ ଶତପଥୀ ଓ କୋ-ଫାଉଣ୍ଡର ଅବିନାଶ ସାହୁ କହିଛନ୍ତି । ଶନିବାର ସିଭି ରମଣ ଗ୍ଲୋବାଲ ବିଶ୍ୱବିଦ୍ୟାଳୟରେ ଆମେରିକାର ଉଦ୍ୟୋଗପତି ଟିମ୍ ଡ୍ରେପର ଏହାକୁ ଲୋକାର୍ପଣ କରିଥିଲେ ।
