ଭୁବନେଶ୍ୱର,୨୧/୦୭: ଏଫ୍ଏମ୍ କଲେଜ ଛାତ୍ରୀ ନିଜ ଦେହରେ ପେଟ୍ରୋଲ ଢ଼ାଳି ପୋଡ଼ିହେବାର ସପ୍ତାହେ ପରେ ପୁଣି ଘଟିଲା ବଳଙ୍ଗା ନାବାଳିକା ପୋଡ଼ି ମାମଲା ଯାହାକୁ ନେଇ ଖୋଲାରେ ପେଟ୍ରୋଲ୍ ବିକ୍ରିକୁ ନେଇ ଚିନ୍ତାରେ ପଡ଼ିଛନ୍ତି ରାଜ୍ୟ ସରକାର । ଆଗାମୀ ଦିନରେ ଏ ନେଇ କଟକଣା ଜାରି କରିବାକୁ ଯୋଜନା କରାଯାଉଛି । ଏନେଇ ସନ୍ଧ୍ୟା ୫ଟାରେ ଲୋକସେବା ଭବନରେ ବସିବ ଗୁରୁତ୍ବପୂର୍ଣ୍ଣ ବୈଠକ। ପେଟ୍ରୋଲ୍ ପମ୍ପ ସଂଘ ଓ ବିଭାଗୀୟ ଅଧିକାରୀ ସାମିଲ୍ ହେବେ। କୃଷକ, ନୌକା ଚାଳକ ଜେନେରେଟର ପାଇଁ କିପରି ପାଇବେ ତେଲ। ସେନେଇ ନୂଆ ଗାଇଡଲାଇନ ଆଣିବା ପାଇଁ ବୈଠକରେ ଆଲୋଚନା ହେବ।
ଯୋଗାଣ ମନ୍ତ୍ରୀ କୃଷ୍ଣ ଚନ୍ଦ୍ର ପାତ୍ର କହିଛନ୍ତି, ଖୋଲା ପେଟ୍ରାଲ ଓ ଡିଜେଲ ବିକ୍ରି ଉପରେ କଟକଣା ପାଇଁ ଖୁବ୍ ଶୀଘ୍ର ଗାଇଡ୍ଲାଇନ୍ ଆସିବ । ଏନେଇ ବିଭାଗୀୟ ଅଧିକାରୀଙ୍କ ସହିତ ବୈଠକ କରାଯାଇ ନିଷ୍ପତ୍ତି ନିଆଯିବ ବୋଲି ଯୋଗାଣ ମନ୍ତ୍ରୀ ଶ୍ରୀ ପାତ୍ର ସୂଚନା ଦେଇଛନ୍ତି । ପୂର୍ବରୁ ଖୋଲାରେ ଏସିଡ୍ ବିକ୍ରି ହେଉଥିଲା । ଫଳରେ ଜଗତସିଂହପୁରର ପ୍ରମୋଦିନୀ ରାଉଳଙ୍କଠୁ ଆରମ୍ଭ କରି କିଛି ଛାତ୍ରୀଙ୍କୁ ଏସିଡ୍ ଆକ୍ରମଣ ପରେ ରାଜ୍ୟରେ ଖୋଲାରେ ଏସିଡ୍ ବିକ୍ରି ନେଇ କଟକଣା ଆଣିବାକୁ ସରକାର ବାଧ୍ୟ ହୋଇଥିଲେ । ସେହିପରି ଏବେ ଏସିଡ୍ ଭଳି ପେଟ୍ରୋଲ ବି ସାଜିଲାଣି ମାରାତ୍ମକ । ପେଟ୍ରୋଲ ନିଆଁରେ ଜଳୁଛନ୍ତି ମହିଳା । ଅତି ସହଜରେ ହାତ ପାଆନ୍ତାରେ ପେଟ୍ରୋଲ ମିଳୁଥିବାରୁ ଏଭଳି ଅଘଟଣ ଘଟୁଥିବା ନେଇ ସାରା ରାଜ୍ୟରେ ତୀବ୍ର ପ୍ରତିକ୍ରିୟା ଦେଖିବାକୁ ମିଳିଛି । ତେଣୁ ରାଜ୍ୟରେ ଖୋଲାରେ ପ୍ଲାଷ୍ଟିକ ବୋତଲରେ ପେଟ୍ରୋଲ୍ ବିକ୍ରି ଉପରେ କଟକଣା ଜାରି କରିବାକୁ ବିଭିନ୍ନ ମହଲରୁ ଦାବି ହେଉଛି ।
ତେଣୁ ଯୋଗାଣ ବିଭାଗ ଖୁବ୍ ଶୀଘ୍ର ଏକ ଗାଇଡ୍ଲାଇନ୍ ଆଣିବାକୁ ଯାଉଛି । ପେଟ୍ରୋଲ ପମ୍ପ ଏପରିକି ରାସ୍ତାକଡ଼ରେ ପ୍ଲାଷ୍ଟିକ ବୋତଲରେ ପେଟ୍ରୋଲ, ଡିଜେଲ ଓ କିରାସିନି ବିକ୍ରି ବାରଣ ଥିବା ବେଳେ ସବୁଠି ଏହି କାରବାର ଚାଲୁଛି ଯାହାକୁ ନେଇ ସାଧାରଣରେ ଚିନ୍ତା ବଢିଛି । ତେବେ ପ୍ଲାଷ୍ଟିକ ବୋତଲରେ ପେଟ୍ରୋଲ ନ ଦେବାକୁ ନିୟମ ଥିଲେ ବି କାହିଁକି ନିୟମ ପାଳନ ହେଉନି ବୋଲି ପେଟ୍ରାଲ ପମ୍ପ ମାଲିକ ସଂଘ ପାଲଟା ପ୍ରଶ୍ନ କରିଛି । ଏଣିକି କେବଳ ଗାଡ଼ି ନେଇଆସିଥିବା ଲୋକଙ୍କୁ ହିଁ ପେଟ୍ରୋଲ ଦେବୁ ବୋଲି ମାଲିକ ସଂଘ ସଭାପତି ଶଶାଙ୍କ ଶେଖର ସାହୁ କହିଛନ୍ତି । ରାଜ୍ୟ ସରକାର ବେଆଇନ କାରବାର ରୋକିବା ଲାଗି ପଦକ୍ଷେପ ନେବାକୁ ସଂଘ ଦାବି କରିଛି।
