କଟକ, ୧୨/୦୩: ଦୀର୍ଘ ୯ ବର୍ଷ ପରେ ଓଡ଼ିଶା ପୁଲିସ ଆସୋସିଏସନ୍ ନିର୍ବାଚନ ହେବ । ବିଭିନ୍ନ ଆଡ଼ୁ ଚାପ ପଡ଼ିବା ପରେ ସଂଘ ନିର୍ବାଚନ କରାଇବାକୁ ପୁଲିସ୍ ମୁଖିଆ ରାଜି ହୋଇଛନ୍ତି । ଚଳିତ ବିଧାନସଭା ଅଧିବେଶନ ଶେଷ ହେବା ପରେ ନିର୍ବାଚନ ଆୟୋଜନ କରାଇବା ଲାଗି ପୁଲିସ ମୁଖ୍ୟାଳୟ ପକ୍ଷରୁ ସବୁଜ ସଙ୍କେତ ଦିଆଯାଇଛି । ନିର୍ବାଚନ ହେବା ପାଇଁ ଅନୁମତି ମିଳିଯାଇଥିବାରୁ ପୁଲିସ୍ ବାହିନୀରେ ଏଏସ୍ଆଇ, ଏସ୍ଆଇ ଓ ଇନ୍ସପେକ୍ଟରମାନେ ସେମାନଙ୍କ ମତ ସାବ୍ୟସ୍ତ ଅଧିକାର ଫେରିପାଇଛନ୍ତି ବୋଲି କହିଛନ୍ତି ।
ପୁଲିସ୍ ବାହିନୀରେ ଏଏସ୍ଆଇ, ଏସ୍ଆଇ, ଇନ୍ସପେକ୍ଟରମାନଙ୍କୁ ନେଇ ଓଡ଼ିଶା ପୁଲିସ୍ ସଂଘ ରହିଛି । ସଂଘର ନିର୍ବାଚନ ପ୍ରତି ୨ ବର୍ଷରେ ଥରେ ଅନୁଷ୍ଠିତ ହେବା ପାଇଁ ବ୍ୟବସ୍ଥା ରହିଛି । ୨୦୧୬ରେ ଶେଷ ଥର ପାଇଁ ରାଜ୍ୟରେ ଓଡ଼ିଶା ପୁଲିସ୍ ସଂଘ ନିର୍ବାଚନ ହୋଇଥିଲା । ମାତ୍ର ଏହାର ୨ ବର୍ଷ ପରେ ସଂଘର ନିର୍ବାଚନ କରାଇ ଦିଆଯାଇ ନଥିଲା । ପୁଲିସ ପ୍ରଶାସନ ଦାୟିତ୍ୱରେ ଥିବା ଅଧିକାରୀ ବିଭିନ୍ନ ଆଳ ଦେଖାଇ ନିର୍ବାଚନ ପ୍ରକ୍ରିୟାକୁ ଅନୁମତି ଦେଇନଥିଲେ । ଭିନ୍ନଭିନ୍ନ ସମୟରେ ଡିଜି ଦାୟିତ୍ୱରେ ଥିବା ଅଧିକାରୀଙ୍କୁ ପୁଲିସ୍ ପ୍ରତିନିଧିମଣ୍ଡଳୀ ଭେଟି ଦାବି ଜଣାଉଥିଲେ ମଧ୍ୟ ଏଥିପ୍ରତି କେହି କର୍ଣ୍ଣପାତ କରୁନଥିଲେ । ବାବୁଙ୍କ ନାଲି ଆଖି, କାର୍ଯ୍ୟନୁଷ୍ଠାନ ଚେତାବନୀ ଭୟରେ ପ୍ରାୟ ଆଗକୁ ଆଉ କେହି ମୁଣ୍ଡ ଉଠାଉ ନଥିଲେ । ଫଳରେ ସଂଘ ନିର୍ବାଚନରେ ଏକରକମ ଯବନିକା ପଡ଼ିଥିଲା । ଏବେ ରାଜ୍ୟରେ ରାଜନୈତିକ ସ୍ଥିତି ବଦଳିବା ପରେ ପୁଲିସ ପ୍ରତିନିଧିମାନେ ନିର୍ବାଚନ କରାଇବାକୁ ମନ ବଳାଇଥିଲେ । ପୁଲିସ୍ ଅଫିସରମାନଙ୍କ ନିର୍ବାଚନ ଦାବିପତ୍ରକୁ ଏବେକାର ପୁଲିସ ଡିଜି ଗ୍ରହଣ କରି ସବୁଜ ସଙ୍କେତ ଦେବା ପରେ ସଂଘର ନିର୍ବାଚନ ପାଇଁ ଏବେ ବାଟ ଫିଟିଛି । ଫଳରେ ୧୫ ହଜାରରୁ ଅଧିକ ଅଫିସର ସେମାନଙ୍କ ନିର୍ବାଚନୀ ପ୍ରକ୍ରିୟାରେ ମତ ସାବ୍ୟସ୍ତ କରିବାର ଅଧିକାରକୁ ଫେରିପାଇଛନ୍ତି ।
ସଂଘର ନିର୍ବାଚନ ହେଲେ ରାଜ୍ୟରେ ୩୪ ପୁଲିସ୍ ଜିଲ୍ଲା ସମେତ କ୍ରାଇମ୍ବ୍ରାଞ୍ଚ, ଭିଜିଲାନ୍ସ, ସ୍ପେସାଲ୍ ବ୍ରାଞ୍ଚ, ପୁଲିସ୍ ଟ୍ରେନିଂ ସ୍କୁଲ୍/କଲେଜ୍, ଏଚ୍ଆର୍ପିସି, ପୁଲିସ୍ ମୁଖ୍ୟାଳୟ ଆଦି ଏଷ୍ଟାବ୍ଲିସମେଣ୍ଟରେ କାର୍ଯ୍ୟରତ ଏଏସ୍ଆଇ ପାହ୍ୟାରୁ ଇନ୍ସପେକ୍ଟର ପର୍ଯ୍ୟନ୍ତ ସିଧାସଳକ ମତଦାନ ସୁଯୋଗ ପାଇବେ । ଏହି ନିର୍ବାଚନ ପ୍ରକ୍ରିୟାରେ ସଭାପତି ପଦ ପାଇଁ ସିଧାସଳଖ ମତଦାନ ହେବ । ବାକି ଉପସଭାପତି, ସମ୍ପାଦକ, ସଂଗଠନ ସମ୍ପାଦକ, କୋଷାଧ୍ୟକ୍ଷ ନିର୍ବାଚନ ପରୋକ୍ଷ ମତଦାନ ପ୍ରକ୍ରିୟାରେ ହେବ । ସଭାପତି ପଦ ପାଇଁ ପତ୍ୟେକ୍ଷ ଦାନ ବ୍ୟବସ୍ଥାରେ ରାଜ୍ୟରେ ୭ ହଜାରରୁ ଅଧିକ ଏଏସ୍ଆଇ, ୬ ହଜାରରୁ ଅଧିକ ଏସ୍ଆଇ ଓ ୧୫୦୦ ଇନ୍ସପେକ୍ଟର ଜିଲ୍ଲା ସ୍ତରରେ ସିଧାସଳଖ ଭୋଟଦେଇ ସେମାନଙ୍କ ପସନ୍ଦର ସଭାପତିଙ୍କୁ ନିର୍ବାଚିତ କରାଇବେ ।
ସମ୍ପାଦକ ସହ ଅନ୍ୟ ପଦବି ପାଇଁ ଜିଲ୍ଲାସ୍ତରରୁ ରିଜର୍ଭ ଇନ୍ସପେକ୍ଟରଙ୍କ ଦ୍ୱାରା ଚୟନ ହୋଇ ଆସିଥିବା ପ୍ରାୟ ୬୫୦ ଜଣ ସଦସ୍ୟମାନଙ୍କୁ ନେଇ ସେଣ୍ଟ୍ରାଲ୍ ଏକଜ୍ୟୁକ୍ଟିଭ୍ କମିଟି (ସିଇସି) ନିର୍ବାଚନ ହେବ । ସିଇସିରେ ନିର୍ବାଚିତ ୧୪ ଜଣ ସଦସଙ୍କ ମଧ୍ୟରେ ଉପସଭାପତି, ସମ୍ପାଦକ, ସଂଗଠନ ସମ୍ପାଦକ, କୋଷାଧ୍ୟକ୍ଷ ପଦବି ପାଇଁ ନିର୍ବାଚିତ ହେବ । ଓଡ଼ିଶା ପୁଲିସ୍ ସଂଘର ଏହି ନିର୍ବାଚନ ଏଏସ୍ଆଇ, ଏସ୍ଆଇ, ଇନ୍ସପେକ୍ଟରମାନଙ୍କର ଏକ ଅଧିକାର । ଏହି ଅଧିକାର ବଳରେ ସମ୍ପୃକ୍ତ ଅଫିସରମାନେ ବ୍ୟକ୍ତିଗତ ସମସ୍ୟା କିମ୍ବା ସେମାନଙ୍କ ସାମୂହିକ ସମସ୍ୟାର ସମାଧାନ ଲାଗି ସଂଘ ଦ୍ୱାରା ଉପରିସ୍ଥ ଅଧିକାରୀ ଓ ସରକାରଙ୍କ ନିକଟରେ ଦୃଷ୍ଟି ଆକର୍ଷଣ କରିବାରେ ସୁଯୋଗ ପାଇଥାନ୍ତି ବୋଲି ପୁଲିସ ଅଧିକାରୀମାନେ କହିଛନ୍ତି ।
