କଟକ,୧୩/୦୯: ଆସନ୍ତା ୧୭ ତାରିଖରୁ କଟକରେ ଆରମ୍ଭ ହେବାକୁ ଯାଉଛି ଓଡ଼ିଶା ପ୍ରୋ ଟି-ଟ୍ୱେଣ୍ଟି ଲିଗ୍ । ଓଡ଼ିଶା କ୍ରିକେଟ ଆସୋସିଏସନ (ଓସିଏ) ଓ ଆରିଭା ସ୍ପୋର୍ଟ୍ସର ମିଳିତ ସହଯୋଗରେ ଆୟୋଜିତ ହେବାକୁ ଥିବା ଏହି ଲିଗ୍ ପାଇଁ ଶୁକ୍ରବାର ଭୁବନେଶ୍ୱର ସ୍ଥିତ ମେ’ଫେୟାର ହୋଟେଲରେ ଖେଳାଳି ଡ୍ରାଫ୍ଟ ପ୍ରକ୍ରିୟା ଅନୁଷ୍ଠିତ ହୋଇଥିଲା । ୬ଟି ଯାକ ଦଳ ନିମନ୍ତେ ଖେଳାଳି ଡ୍ରାଫ୍ଟ ଶେଷ ହୋଇଛି । ପ୍ରତ୍ୟେକ ଦଳରେ ୧୬ଜଣ ଲେଖାଏଁ ଖେଳାଳି ରହିଛନ୍ତି । ତେବେ ପ୍ରତି ଦଳର ଅଧିନାୟକ ତଥା ମାର୍କି ଖେଳାଳିଙ୍କ ଦାମ୍ ସର୍ବାଧିକ ୧.୨୫ ଲକ୍ଷ ଟଙ୍କା ରହିଛି ।
ସ୍ୱସ୍ତିକ ସାମଲଙ୍କ ନେତୃତ୍ୱରେ ଗଠିତ କଟକ ପାନ୍ଥର୍ସ ଦଳରେ ବିପ୍ଳବ ସାମନ୍ତରାୟ, ଅଭିଷେକ ରାଉତ, ହର୍ଷିତ ରାଥୋଡ, ଶୁଭମ ଶତ୍ରୁଜିତ, ତାପସ କୁମାର ଦାସ, ପାନକଳ ଶଶାଙ୍କ ପ୍ରମୁଖ ରହିଛନ୍ତି । ସେହିପରି ସମ୍ବଲପୁର ୱାରିୟର୍ସ ଦଳରେ ଶୁଭ୍ରାଂଶୁ ଶେଖର ସେନାପତି ଅଧିନାୟକ ରହିଛନ୍ତି ଏବଂ ପ୍ରୟାସ କୁମାର ସିଂହ, ଶ୍ରେୟାଂଶ ଭରଦ୍ୱାଜ, ତରଣୀ ସ, ରାକେଶ ପଟ୍ଟନାୟକ, ପ୍ରବୀଣ ଲୁହା, ଆୟୂଷ ବାରିକ, ରାମଚନ୍ଦ୍ର ବହେରା ପ୍ରମୁଖ ସ୍ଥାନ ପାଇଛନ୍ତି । ପୁରୀ ଟାଇଟନ୍ସ ଦଳର ଅଧିନାୟକ ରହିଛନ୍ତି ସନ୍ଦୀପ ପଟ୍ଟନାୟକ । ଏହି ଦଳରେ ରାଜେଶ ମହାନ୍ତି, କାର୍ତ୍ତିକ ବିଶ୍ୱାଳ, ଆଶୁତୋଷ ଛୁରିଆ, ଅନୁରାଗ ଷଡ଼ଙ୍ଗୀ, ସାୱନ ପହରିଆ, ସୁଶୀଲ କୁମାର ବାରିକ ପ୍ରମୁଖଙ୍କୁ ଡ୍ରାଫ୍ଟ ଆକାରରେ କିଣା ଯାଇଛି । ସୂର୍ଯ୍ୟକାନ୍ତ ପ୍ରଧାନଙ୍କ ନେତୃତ୍ୱାଧୀନ ଭୁବନେଶ୍ୱର ଟାଇଟନ୍ସ ଦଳରେ ରାଜେଶ ଧୂପର, ଗୌରବ ଚୌଧୁରୀ, ଦେବବ୍ରତ ପ୍ରଧାନ, ବାଦଲ ବିଶ୍ୱାଳ, ସତ୍ୟକାମ ଭରଦ୍ୱାଜ, ଅଂଶୁମାନ ବେଜ୍ ପ୍ରମୁଖ ରହିଛନ୍ତି । କେନ୍ଦୁଝର ମାଇନର୍ସ ଦଳର ଅଧିନାୟକ ହେଉଛନ୍ତି ଗୋବିନ୍ଦ ପୋଦ୍ଦାର । ଏହି ଦଳରେ ଅଭିଷେକ ଯାଦବ, ଓମ ଟି ମୁଣ୍ଡେ, ସର୍ବଶ୍ୱେର ମହାନ୍ତି, ଅନୀଲ ପରିଡା, ସୟଦ ଟି ଅହମ୍ମଦ, ପପୁ ରାୟ ପ୍ରମୁଖଙ୍କୁ ସାମିଲ କରାଯାଇଛି । ଯୁବ ପ୍ରତିଭା ଆଶୀର୍ବାଦ ସ୍ୱାଇଁଙ୍କ ନେତୃତ୍ୱାଧୀନ ରାଉରକେଲା ଷ୍ଟିଲର୍ସ ଦଳରେ ସମ୍ୱିତ ବରାଳ, ସାଇଦୀପ ମହାପାତ୍ର, ଜାମେଳା ଭଞ୍ଜନ ମହାପାତ୍ର, ବିନାୟକ ସାହୁ, ଅମିନ ଖାନ ପ୍ରମୁଖ ରହିଛନ୍ତି ।
ଖେଳାଳି ଡ୍ରାଫ୍ଟ କାର୍ଯ୍ୟକ୍ରମରେ ଫୁଟବଲ ଆସୋସିଏସନ ଅଫ ଓଡ଼ିଶା ସମ୍ପାଦକ ଆଶୀର୍ବାଦ ବେହେରା ମୁଖ୍ୟ ଅତିଥି ଭାବେ ଯୋଗ ଦେଇଥିଲେ । ଓସିଏ ସଭାପତି ପଙ୍କଜ ଲୋଚନ ମହାନ୍ତି, ସମ୍ପାଦକ ସଞ୍ଜୟ ବହେରା, ଯୁଗ୍ମ ସମ୍ପାଦକ ପ୍ରଭାତ ଭୋଳ, କୋଷାଧ୍ୟକ୍ଷ ବିକାଶ ପ୍ରଧାନ, କଟକ ପାନ୍ଥର୍ସ ଦଳର ଫ୍ରାଞ୍ଚାଇଜ ଶୁଭଶ୍ରୀ ବେହେରା ପ୍ରମୁଖ ଉପସ୍ଥିତ ଥିଲେ ।
ମାର୍କି ଖେଳାଳିଙ୍କ ମୂଲ୍ୟ ୧.୨୫ ଲକ୍ଷ ଟଙ୍କା ମୂଲ୍ୟ ରହିଥିବାବେଳେ ଅନ୍ୟ ୪ଟି କ୍ୟାଟେଗୋରୀରେ ଖେଳାଳି ଡ୍ରାଫ୍ଟ ହୋଇଥିଲା । ରାଜ୍ୟ ବରିଷ୍ଠ ଦଳର ନିୟମିତ ଖେଳାଳିଙ୍କ ସମେତ ୨୩ବର୍ଷରୁ କମ୍ ବୟସ ବର୍ଗରେ ଉତ୍କୃଷ୍ଟ ପ୍ରଦର୍ଶନ କରିଥିବା ଖେଳାଳିଙ୍କୁ କ୍ୟାଟେଗୋରୀ-ଏ’ରେ ସାମିଲ କରାଯାଇଥିଲା । ଏହି ବର୍ଗରେ ଖେଳାଳିଙ୍କ ମୂଲ୍ୟ ୧ଲକ୍ଷ ଟଙ୍କା ଧାର୍ଯ୍ୟ ହୋଇଥିଲା । କ୍ୟାଟେଗୋରୀ-ବି’ରେ ୨୩ବର୍ଷରୁ କମ୍ ବୟସ, ୨୫ବର୍ଷରୁ କମ୍ ବୟସ ବର୍ଗର ଖେଳାଳି ରହିଥିବାବେଳେ ସେମାନଙ୍କ ମୂଲ୍ୟ ୭୫ହଜାର ଟଙ୍କା ନିର୍ଦ୍ଧାରଣ ହୋଇଛି । ୧୬ବର୍ଷରୁ କମ୍ ବୟସ ବର୍ଗର ଖେଳାଳିଙ୍କୁ କ୍ୟାଟେଗୋରୀ-ସି’ରେ ରଖାଯାଇଛି ଏବଂ ସେମାନଙ୍କ ମୂଲ୍ୟ ୫୦ହଜାର ଟଙ୍କା ରହିଛି । ବରିଷ୍ଠ ଏବଂ କନିଷ୍ଠ ବର୍ଗର କିଛି ଖେଳାଳିଙ୍କୁ କ୍ୟାଟେଗୋରୀ-ଡି’ରେ ରଖାଯାଇଛି । ଏମାନଙ୍କ ମୂଲ୍ୟ ୪୦ହଜାର ଟଙ୍କା ଧାର୍ଯ୍ୟ ହୋଇଛି ।
