ଭୁବନେଶ୍ୱର,୧୯/୧୦: ନଭେମ୍ବର ୧୫ ସହିଦ ବିର୍ଷା ମୁଣ୍ଡାଙ୍କ ଜୟନ୍ତୀ । ସେହି ଦିନକୁ ରାଜ୍ୟ ସରକାର ‘ଜନଜାତୀୟ ଗୌରବ ଦିବସ’ ଭାବେ ପାଳନ କରିବାକୁ ସ୍ଥିର କରିଛନ୍ତି । ଏହି ଅବସରରେ ରାଉରକେଲାରେ ଏକ ବିଶେଷ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଯୋଗ ଦେବେ । ସେହି ଦିନ ‘ସହିଦ ମାଧୋ ସିଂ ହାତ ଖର୍ଚ୍ଚ ଯୋଜନା’ର ମଧ୍ୟ ଶୁଭାରମ୍ଭ ହେବ । ତେବେ ତା’ ପୂର୍ବରୁ ନଭେମ୍ବର ୫ ତାରିଖ ସୁଦ୍ଧା ଏହି ଯୋଜନାରେ ଭତ୍ତା ପାଇବା ପାଇଁ ଯୋଗ୍ୟ ଛାତ୍ରଛାତ୍ରୀଙ୍କ ତାଲିକା ପ୍ରସ୍ତୁତ ହେବ । ମିଶନ୍ ମୋଡ୍ରେ ସେ ନେଇ କାମ କରିବାକୁ ପଡିବ । ଯୋଜନାରେ ଲାଭବାନ ହେବାକୁ ଥିବା ମୋଟ ଛାତ୍ରଛାତ୍ରୀଙ୍କ ମଧ୍ୟରୁ ୮୦% ବିଦ୍ୟାଳୟ ଓ ଗଣଶିକ୍ଷା ବିଭାଗର । ତେଣୁ ବିଭାଗୀୟ ସଚିବ ଶାଲିନୀ ପଣ୍ଡିତଙ୍କୁ ଏ ନେଇ ବ୍ୟକ୍ତିଗତ ଭାବେ ହସ୍ତକ୍ଷେପ କରିବାକୁ ଅନୁରୋଧ କରିଛନ୍ତି ରାଜ୍ୟ ଅନୁସୂଚିତ ଜାତି ଓ ଜନଜାତି ଉନ୍ନୟନ ବିଭାଗର ପ୍ରମୁଖ ସଚିବ ବିଷ୍ଣୁପଦ ସେଠୀ । ତାଙ୍କୁ ଏକ ଆକ୍ସନ୍ ପ୍ଲାନ୍ ମଧ୍ୟ ଦେଇଛନ୍ତି ।
ଶ୍ରୀ ସେଠୀ କହିଛନ୍ତି, ରାଜ୍ୟରେ ଅଷ୍ଟମ ଓ ଦଶମ ପରେ ବହୁ ଅନୁସୂଚିତ ଜନଜାତି ବର୍ଗ ଛାତ୍ରଛାତ୍ରୀ ଅଧାରୁ ପାଠପଢ଼ା ଛାଡୁଛନ୍ତି । ତେଣୁ ଏହି ସଂଖ୍ୟା କମାଇବା ପାଇଁ ନବମ ଓ ଏକାଦଶ (ଯୁକ୍ତ ଦୁଇ ପ୍ରଥମବର୍ଷ) ଶ୍ରେଣୀର ଅନୁସୂଚିତ ଜନଜାତି ବର୍ଗ ଛାତ୍ରଛାତ୍ରୀଙ୍କୁ ‘ସହିଦ ମାଧୋ ସିଂ ହାତ ଖର୍ଚ୍ଚ ଯୋଜନା’ରେ ୫ ହଜାର ଟଙ୍କା ମିଳିବ । ନଭେମ୍ବର ୧୫ ତାରିଖ ଦିନ ରାଜ୍ୟ ରାଜକୋଷରୁ ପ୍ରତ୍ୟକ୍ଷ ଲାଭ ହସ୍ତାନ୍ତର ଯୋଜନା(ଡିବିଟି) ମାଧ୍ୟମରେ ଯୋଗ୍ୟ ଛାତ୍ରଛାତ୍ରୀଙ୍କ ଆକାଉଣ୍ଟକୁ ଟଙ୍କା ଯିବ ।
ଚଳିତ ମାସ ୨୫ ତାରିଖ ସୁଦ୍ଧା ଜାତି ପ୍ରମାଣପତ୍ର, ଆୟ ପ୍ରମାଣପତ୍ର ଓ ବ୍ୟାଙ୍କ ପାସବୁକ୍ର ପ୍ରଥମ ପୃଷ୍ଠା ଦେବାକୁ ନିର୍ଦ୍ଦେଶ ଦିଆଯାଇଛି । ପ୍ରଧାନଶିକ୍ଷକ ଓ ଯୁକ୍ତ ଦୁଇ କଲେଜ ଅଧ୍ୟକ୍ଷ ଯୋଗ୍ୟ ଛାତ୍ରଛାତ୍ରୀଙ୍କ ତାଲିକା ଚୂଡାନ୍ତ କରିବେ । କେବଳ ସରକାରୀ ଓ ଅନୁଦାନପ୍ରାପ୍ତ ବିଦ୍ୟାଳୟର ଛାତ୍ରଛାତ୍ରୀ ଏଥିପାଇଁ ଯୋଗ୍ୟ ବିବେଚିତ ହେବେ ବୋଲି ଆକ୍ସନ୍ ପ୍ଲାନ୍ରେ ଦର୍ଶାଯାଇଛି ।
