କରଞ୍ଜିଆ,୨୭/୧୧: ଚୁଲି ନିକଟରେ ଶୋଇଥିବା ବେଳେ କମ୍ବଳରେ ଲାଗିଲା ନିଆଁ । ଚାଲିଗଲା ବୃଦ୍ଧଙ୍କ ଜୀବନ । ମୃତ ବୃଦ୍ଧ ଜଣକ ମୋଟା ପୂର୍ତ୍ତି ବୋଲି ଜଣାପଡ଼ିଛି । ମୟୂରଭଞ୍ଜ ଜିଲ୍ଲା ଯଶିପୁର ଥାନା ଅନ୍ତର୍ଗତ ଶିମିଳିପାଳ ଅଭୟାରଣ୍ୟ ମଝିରେ ଥିବା ବାର୍ଶିଆ ଗାଁରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଶୀତରୁ ରକ୍ଷା ପାଇବା ପାଇଁ ବୃଦ୍ଧ ଜଣକ ମଙ୍ଗଳବାର ରାତିରେ ଚୁଲି ନିକଟରେ ଏକ କମ୍ୱଳ ଘୋଡେଇ ହୋଇ ଶୋଇଥିଲେ । ସେଠାରେ ଶୋଇଥିବା ବେଳେ ତାଙ୍କ କମ୍ୱଳରେ ନିଆଁ ଲାଗି ଯାଇଥିଲା । ଫଳରେ ବୃଦ୍ଧ ଜଣକ ନିଆଁରେ ପୋଡ଼ି ହୋଇ ମୃତ୍ୟୁ ମୁଖରେ ପଡ଼ିଥିଲେ । ଏହା ଦେଖି ତାଙ୍କ ପରିବାରଲୋକେ ଯଶିପୁର ପୋଲିସକୁ ଏହି ଘଟଣା ସମ୍ପର୍କରେ ଅବଗତ କରାଇଥିଲେ । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ବୃଦ୍ଧଙ୍କ ମୃତଦେହ ଜବତ କରି ଘଟଣାର ତଦନ୍ତ ଚଳାଇଛି ।
