ଭୁବନେଶ୍ୱର, ୨୯/୧୦: ଦୀପାବଳି ପାଇଁ ଭୁବନେଶ୍ୱରରେ ଓମ୍ଫେଡ୍ ପକ୍ଷରୁ ଖୋଲୁଛି ସ୍ୱତନ୍ତ୍ର ମିଷ୍ଟାନ୍ନ ଭଣ୍ଡାର । ଜନପଥର ୟୁନିଟ୍-୯ ଅନ୍ତର୍ଗତ କେନ୍ଦ୍ରୀୟ ବିଦ୍ୟାଳୟ-୧ ସମ୍ମୁଖରେ ଥିବା ଭେଣ୍ଡିଂ ଜୋନ୍ରେ ଏହି ମିଠା ଦୋକାନ ଖୋଲିଛି । ଦୀପାବଳି ଅବସରରେ ଜନସାଧାରଣଙ୍କୁ ସୁଲଭ ମୂଲ୍ୟରେ ଓମ୍ଫେଡର ମିଠା ଯଥା-ଛେନାପୋଡ, ରାବିଡି, ମିଠା ଦହି, ଘିଅ, ପନିର, ଆଇସ୍କ୍ରିମ୍ ଆଦି ଯୋଗାଇ ଦେବାକୁ ଏହି ପ୍ରୟାସ କରାଯାଇଛି ।
ଲୋକମାନେ ଯେପରି ଉତ୍ତମ, ସ୍ୱାଦିଷ୍ଟ ଏବଂ ସ୍ୱାସ୍ଥ୍ୟକର ଖାଦ୍ୟ ସୁଲଭ ମୂଲ୍ୟରେ ପାଇପାରିବେ, ସେଥିପାଇଁ ଓମ୍ଫେଡ ପକ୍ଷରୁ ଏପରି ପଦକ୍ଷେପ ନିଆଯାଇଛି ବୋଲି କହିଛନ୍ତି ପରିଚାଳନା ନିର୍ଦ୍ଦେଶକ ବିଜୟ ଅମୃତା କୁଲାଙ୍ଗେ । କେବଳ ସେତିକି ନୁହେଁ, ହଜାର ହଜାର ଦୁଗ୍ଧ ଚାଷୀଙ୍କ ଦ୍ୱାରା ଉତ୍ପାଦିତ ଦୁଗ୍ଧଜାତ ଦ୍ରବ୍ୟର ଚାହିଦା ଦିନକୁ ଦିନ ବୃଦ୍ଧି ପାଇବାରେ ଲାଗିଛି । ଏପରିକି ଓମ୍ଫେଡ ଘିଅ ଏବେ ଜଗନ୍ନାଥଙ୍କ ନିକଟରେ ଲାଗି ହେଉଥିବାରୁ ଏହାର ଶ୍ରେୟ ଚାଷୀଙ୍କ ନିକଟକୁଯାଉଛି । ଗୋସେବା ସହ ଜଗନ୍ନାଥଙ୍କ ସେବାରେ ନିଜକୁ ନିୟୋଜିତ କରିଥିବାରୁ ସେମାନଙ୍କ ମନରେ ବେଶ ଉତ୍ସାହ ଓ ଉଦ୍ଧିପନା ସୃଷ୍ଟି ହୋଇଛି ।
