ବାରଙ୍ଗ,୨୧।୧ : ନନ୍ଦନକାନନ ପ୍ରାଣୀ ଉଦ୍ୟାନରେ ଜଳହସ୍ତୀ ଶାବକ ମୃତ । ଗତ ୧୬ ତାରିଖରେ ଜନ୍ମିତ ଜଳହସ୍ତୀ ଶାବକର ସୋମବାର ମୃତ୍ୟୁ ହୋଇଛି। ଉକ୍ତ ଖୁଆଡରେ ଥିବା ଅଣ୍ଡିରା ଜଳହସ୍ତୀ ଆକ୍ରମଣରେ ଶାବକର ମୃତ୍ୟୁ ହୋଇଥିବା ସୁଚନା ଦେଲେ ନନ୍ଦନକାନନ ଉପନିର୍ଦ୍ଦେଶକ ସନଥ୍ କୁମାର ନାରାୟଣ।
୬୩ (କ) ଖୁଆଡ଼ର ଜଳାଶୟରେ ଏକ ଜଳହସ୍ତୀ ଗତ ୧୬ ତାରିଖରେ ଶାବକ ଜନ୍ମ ଦେଇଥିଲା । ଖୁଆଡରେ ଥିବା ଏକ ଅଣ୍ଡିରା ଜଳହସ୍ତୀ ଶାବକକୁ ଆକ୍ରମଣ କରିଥିଲା। ଜନ୍ତୁ ରକ୍ଷକ ଶାବକକୁ ରକ୍ଷା କରିବା ପାଇଁ ମା’ ଓ ଶାବକକୁ ଅଲଗା କରିବା ପାଇଁ ଚେଷ୍ଠା କରିଥିଲେ। କିନ୍ତୁ ଅଣ୍ଡିରା ଜଳହସ୍ତୀଟି ଅଲଗା କରିବା ବେଳ ଜନ୍ତୁ ରକ୍ଷକକୁ ମାରିବା ପାଇଁ ଗୋଡାଇଥିଲା। ଫଳରେ ସତଚେଷ୍ଟା ବିଫଳ ହୋଇଥିଲା। ଶେଷରେ ଅଣ୍ଡିରା ଜଳହସ୍ତୀ ଆକ୍ରମଣରେ ଶାବକଟିର ମୃତ୍ୟୁ ହେଲା। ଏହି ଶାବକର ମୃତ୍ୟୁ ପରେ ଜଳହସ୍ତୀଙ୍କ ସଂଖ୍ୟା ୧୧କୁ ହ୍ରାସ ପାଇଛି।
