ସମ୍ୱଲପୁର,୨୪/୦୭: ପାଉଁଶ ବୋଝେଇ ଗାଡ଼ି ଧକ୍କାରେ ଜଣେ ଗୁରୁତର ହୋଇଥିବା ବେଳେ ଏକ ଗୋରୁର ମୃତ୍ୟୁ ହୋଇଛି । ଗୁରୁତର ବ୍ୟକ୍ତିଙ୍କୁ ଉଦ୍ଧାର କରି ଚିକିତ୍ସା ପାଇଁ ରେଢ଼ାଖୋଲ ଡାକ୍ତର ଖାନରେ ଭର୍ତ୍ତି କରାଯାଇଛି । ସମ୍ୱଲପୁର ଜିଲ୍ଲା ରେଢାଖୋଲ ଅଞ୍ଚଳର ପୁରୁଣା ପେଟ୍ରୋଲ ପମ୍ପ ନିକଟ ୫୫ନଂ ଜାତୀୟ ରାଜପଥରେ ଏହି ଦୁର୍ଘଟଣା ଘଟିଛି ।
ସୂଚନା ମୁତାବକ, ଗୁରୁବାର ସକାଳ ପ୍ରାୟ ୧୦ଟା ବେଳେ ଏକ ଟ୍ରକ୍ ପାଉଁଶ ବୋଝେଇ କରି ରେଢ଼ାଖୋଲ ଆସୁଥିଲା । ଏହି ସମୟରେ ସହରର ପୁରୁଣା ପେଟ୍ରୋଲ ପମ୍ପ୍ ନିକଟ ୫୫ନଂ ଜାତୀୟ ରାଜପଥରେ ଏକ ଗୋରୁକୁ ଧକ୍କା ଦେଇ ରାଜପଥ କଡ଼ରେ ଛିଡା ହୋଇଥିବା ଏମଡି ହାରୁନ ଆନସାରୀଙ୍କୁ ଧକ୍କା ଦେଇଥିଲା। ଦୁର୍ଘଟଣାରେ ଗୋରୁଟିର ମୃତ୍ୟୁ ହୋଇଥିବା ବେଳେ ହାରୁନ ଗୁରୁତର ଭାବେ ହୋଇଥିଲେ। ତାଙ୍କୁ ଉଦ୍ଧାର କରି ଚିକିତ୍ସା ପାଇଁ ରେଢ଼ାଖୋଲ ଡାକ୍ତରଖାନରେ ଭର୍ତ୍ତି କରାଯାଇଛି । ତେବେ ଗାଡିଟି ଦୁର୍ଘଟଣା ଘଟାଇ ଫେରାର ହୋଇଯାଇଥିବା ବେଳେ ସହରବାସୀ ଭୀମଭୋଇ ଛକରେ ଗାଡିକୁ ଅଟକାଇଥିଲେ । ଏହାପରେ ୫୫ନଂ ଜାତୀୟ ରାଜପଥକୁ ଅବରୋଧ କରି ପାଉଁଶ ବୋଝେଇ ଗାଡି ଚଳାଚଳ ବନ୍ଦ କରିବା ଦାବି କରିଥିଲେ ଲୋକେ ।
