କଟକ,୧୨/୧୧: କାର୍ତ୍ତିକ ମାସ ପଞ୍ଚକରେ ବି ପିଆଜ ଦର ବଢିଲା । ୧୫ ଦିନ ଭିତରେ କିଲୋ ପିଛା ପାଖାପାଖି ୩୦ଟଙ୍କା ବଢ଼ିସାରିଲାଣି ପିଆଜ । ଖୁଚୁରା ବଜାରରେ ପିଆଜ କିଲୋ ୭୦ଟଙ୍କା । ଏବେ ପଞ୍ଚକ ଚାଲିଥିବାରୁ ଅବଶ୍ୟ ପିଆଜକୁ ନେଇ ହୋହାଲ୍ଲା ବେଶି ନାହିଁ । କିନ୍ତୁ ପଞ୍ଚକରେ ପିଆଜର ଚାହିଦା ସେତେ ଅଧିକ ନଥିବା ସତ୍ତେ୍ୱ ଦର ବୃଦ୍ଧି ବିସ୍ମୟ ସୃଷ୍ଟି କରିଛି । ଅନ୍ୟପକ୍ଷରେ ୧୫ତାରିଖ କାର୍ତ୍ତିକ ପୂର୍ଣ୍ଣିମା ଟପିବା ପରେ ପିଆଜ ଦର ଗରାଖଙ୍କୁ ନୟାନ୍ତ କରିବ ବୋଲି ସ୍ପଷ୍ଟ ହୋଇଗଲାଣି । କାରଣ ବଜାର ସ୍ଥିତି କହୁଛି, ଆସନ୍ତା ତିନି ସପ୍ତାହ ଯାଏ ପିଆଜ ଦର କମିବନାହିଁ । ନାସିକ୍ ଓ କୁର୍ନୁଲ୍ରୁ ପିଆଜ ନଆସିବା ଯାଏ ବଜାରକୁ ସମ୍ଭାଳିବା ମୁସ୍କିଲ୍ । ସେ ଯାଏ ଚଳାଇ ନେବା ଭଳି ଓଡ଼ିଶାର ଉତ୍ପାଦନ ବି ନାହିଁ । ତେଣୁ ପିଆଜ ସାଧାରଣ ଖାଉଟିଙ୍କ ଲାଗି ଏବେ ଅଡୁଆ ସ୍ଥିତି ସୃଷ୍ଟି କରିଛି ।
ଗ୍ରାହକଙ୍କ ଚାହିଦାକୁ ପୂରଣ କରିବାକୁ ଓଡ଼ିଶା ବଜାରକୁ ବାର୍ଷିକ ଦରକାର ପଡେ ପାଖାପାଖି ୫ଲକ୍ଷ ମେଟ୍ରିକ୍ ଟନ୍ ପିଆଜ । ମାସକୁ ହାରାହାରି ୪୦ ହଜାର ଟନ୍ରୁ ଅଧିକ ପିଆଜ ଖାଇଥାନ୍ତି ଓଡ଼ିଶାବାସୀ । ଆବଶ୍ୟକତା ଅନୁପାତରେ ଓଡ଼ିଶାର ପିଆଜ ଉତ୍ପାଦନ ଯଥେଷ୍ଟ କମ୍ । ବାର୍ଷିକ ଓଡ଼ିଶାର୬୦ହଜାର ଟନ୍ ପିଆଜ ଅମଳ କରାଯାଉଛି । ଓଡ଼ିଶାର ମୋଟ୍ ପିଆଜ ଉତ୍ପାଦନର ପ୍ରାୟ ୮୦ଭାଗ ଟିଟିଲାଗଡ଼, ଅନୁଗୁଳରୁ ଆସିଥାଏ । କିନ୍ତୁ ଘରୋଇ ଅମଳ ଦୁଇମାସକୁ ବି ନିଅଣ୍ଟ ପଡେ । ଏଭଳି ସ୍ଥିତିରେ ଓଡ଼ିଶା ପିଆଜ ପାଇଁ ପଡ଼ୋଶୀ ରାଜ୍ୟ ଆନ୍ଧ୍ରପ୍ରଦେଶ ଏବଂ ମହାରାଷ୍ଟ୍ର ଉପରେ ଯଥେଷ୍ଟ ନିର୍ଭରଶୀଳ । ପ୍ରତିଦିନ ଓଡ଼ିଶା ବଜାରକୁ ଏହି ଦୁଇ ଅଞ୍ଚଳରୁ ୨୦ ଗାଡ଼ି ପିଆଜ ଆସିଥାଏ। କଟକ ଛତ୍ରବଜାର ଦୈନିକ ୫ ଟ୍ରକ୍ ବୋଝେଇ ପିଆଜ ଗାଡ଼ି ଗଡ଼ିଥାଏ, ଯାହାର ପରିମାଣ ପାଖାପାଖି ୮୦ ରୁ ୧୦୦ ଟନ୍ । ଅଗଷ୍ଟରୁ ଡିସେମ୍ବର ପର୍ଯ୍ୟନ୍ତ ଆନ୍ଧ୍ର ପିଆଜ ରାଜୁତି କରୁଥିବା ବେଳେ ବର୍ଷର ଅନ୍ୟ ସମୟରେ ନାସିକ୍ ପିଆଜର ବଜାର ଦଖଲ ଥାଏ ।
ଯେହେତୁ ୫ ମାସ ନାସିକ୍ରୁ ପିଆଜ ଆମଦାନୀ ସ୍ୱାଭାବିକଠାରୁ ଧିମା ଚାଲେ ତେଣୁ ଆନ୍ଧ୍ର ପିଆଜ ଦର ଏହି ସମୟରେ କିଲୋ ପିଛା ୫୦ଟଙ୍କା ପର୍ଯ୍ୟନ୍ତ ଯାଇଥାଏ । ୧୫ଦିନ ପୂର୍ବରୁ କଟକ ଖୁଚୁରା ବଜାରରେ ପିଆଜ ମୂଲ୍ୟ କିଲୋ ପିଛା ୪୫ ରୁ ୫୦ଟଙ୍କା ରହିଥିଲା । କିନ୍ତୁ ଗତ ଦୁଇଦିନ ଭିତରେ ପିଆଜ ଦର ହଠାତ୍ ଦୁଇଗୁଣା ପର୍ଯ୍ୟନ୍ତ ବଢ଼ିଗଲା । ବ୍ୟବସାୟୀଙ୍କ କହିବା କଥା, ବର୍ଷା ଯୋଗୁଁ ନାସିକ୍ ଅମଳ ପ୍ରଭାବିତ ହୋଇଛି । ଏମିତିକି ଆନ୍ଧ୍ର ପିଆଜ ମଧ୍ୟ ଆମଦାନୀ କମିଆସିଲାଣି । ତେଣୁ ବଜାର ଚାହିଦାକୁ ଦେଖି ଷ୍ଟକ୍ ପଏଣ୍ଟରେ ମୂଲ୍ୟ ବୃଦ୍ଧି କରାଯାଉଛି ।
ଯାହାଫଳରେ ଆଜି କଟକ ହୋଲସେଲ୍ ବଜାରରେ ଆନ୍ଧ୍ର ପିଆଜ କିଲୋ ୫୫ ଟଙ୍କା, ନାସିକ୍ ପିଆଜି କିଲୋ ୬୫ ଟଙ୍କା ରହିଛି । ଯେହେତୁ ନାସିକ୍ ପିଆଜ ଷ୍ଟକ୍ କମିଆସୁଛି, ତେଣୁ ଖୁଚୁରା ବ୍ୟବସାୟୀମାନେ ଆନ୍ଧ୍ର ପିଆଜ ୫୫ ଟଙ୍କାରେ କିଣି ୭୦ ଟଙ୍କାରେ ବିକ୍ରି କରିବା ଆରମ୍ଭ କରିଛନ୍ତି । ସାଧାରଣ ଖାଉଟି ନାସିକ୍ ଓ ଆନ୍ଧ୍ର ପିଆଜ ଭିତରେ ଫରକ୍ ବାରିବାର କ୍ଷମତା ରଖୁନଥିବାରୁ ବ୍ୟବସାୟୀମାନେ ଏବେ ମନଇଚ୍ଛା ଦର ହାଙ୍କିବା ଆରମ୍ଭ କଲେଣି । ପିଆଜର ମୂଲ୍ୟ ବୃଦ୍ଧିକୁ ନେଇ ଖୁଚୁରା ବ୍ୟବସାୟୀ ବି ନିଜ କଥା ରଖୁଛନ୍ତି । ସେମାନଙ୍କ କହିବା କଥା, ପିଆଜ ବସ୍ତା ଆଣିବା ପରେ ସେଥିରୁ ଦାଗି, ପଚା ବାହାରୁଛି । ଟ୍ରଲି ଭଡ଼ା ଓ କଣ୍ଟା ପଇସା ଦେବା ପରେ ଲାଭ ହାତକୁ ଲାଗୁନାହିଁ ।
ପିଆଜ ଦର ବୃଦ୍ଧି ସମ୍ପର୍କରେ କଟକ ଛତ୍ରବଜାର ବ୍ୟବସାୟୀ ସଂଘର ସମ୍ପାଦକ ଦେବେନ୍ଦ୍ରନାଥ ସାହୁ କହନ୍ତି, ନାସିକ୍ ଆମଦାନୀ ନଆସିବା ଯାଏ ପିଆଜ ଦର ବଢିବ । ଷ୍ଟକ୍ ପଏଣ୍ଟରେ ମୂଲ୍ୟ ବଢିରହୁଥିବାରୁ ଆମଦାନୀ ଆମେ କମାଇ ସାରିଛୁ । ଏବେ ଦୈନିକ ହାରାହାରି ୨ ଗାଡ଼ି ପିଆଜ ଆସୁଛି । ଆଗକୁ କିଛି ଦିନ ପର୍ଯ୍ୟନ୍ତ ଏଭଳି ସମସ୍ୟା ଲାଗିରହିବ ବୋଲି ଶ୍ରୀ ସାହୁ ପ୍ରକାଶ କରିଛନ୍ତି । ଅନ୍ୟପକ୍ଷରେ ଓଡ଼ିଶା ବ୍ୟବସାୟୀ ମହାସଂଘର ସାଧାରଣ ସମ୍ପାଦକ ସୁଧାକର ପଣ୍ଡା କହିଛନ୍ତି, ନୂଆ ଷ୍ଟକ୍ ଆସିବା ଧିରେ ଧିରେ ଆରମ୍ଭ ହେବ । ଆଜି ଭଲ ପିଆଜର ହୋଲସେଲ୍ ମୂଲ୍ୟ କିଲୋ ପିଛା ୫୫ ରୁ ୫୭ଟଙ୍କା ରହିଛି । ତେଣୁ ସ୍ୱାଭାବିକ ଭାବେ ଖୁଚୁରା ବଜାରରେ ଦର ଚଢା ରହୁଛି । ତା’ ଛଡ଼ା ଦର ବୃଦ୍ଧି ସରକାରଙ୍କ ନୀତି ଉପରେ ନିର୍ଭର କରୁଛି । କର୍ପୋରେଟ୍ ହାଉସ୍ମାନେ ବଜାର ଦର ନିୟନ୍ତ୍ରଣ କରିବାରୁ ଖାଉଟି ହନ୍ତସନ୍ତ ହେଉଛନ୍ତି ବୋଲି ଶ୍ରୀ ପଣ୍ଡା ମତ ରଖିଛନ୍ତି ।
