ନୂଆଦିଲ୍ଲୀ, ୨୦/୧୧ : ସମ୍ପ୍ରତି ଦିଲ୍ଲୀ-ଏନ୍ସିଆର୍ରେ ପ୍ରଦୂଷଣ ଲୋକଙ୍କୁ ଘରେ ଆବଦ୍ଧ ରହିବା ପାଇଁ ବାଧ୍ୟ କରିଛି । ସ୍କୁଲ କଲେଜ ବନ୍ଦ । କ୍ଲାସ୍ଗୁଡ଼ିକ ଅନ୍ଲାଇନ୍ ହେଉଛି । କିଛି ଅଫିସ୍ରେ କର୍ମଚାରୀଙ୍କୁ ୱାର୍କ ଫ୍ରମ୍ ହୋମ୍ କରିବା ପାଇଁ କୁହାଯାଇଛି । ଏଭଳି କ୍ଷେତ୍ରରେ ଲୋକେ ଛୋଟ ଛୋଟ ସାମଗ୍ରୀ ଆଣିବା ପାଇଁ ବି ବାହାରକୁ ବାହାରୁନାହାନ୍ତି । ତେଣୁ କ୍ୱିକ୍ କମର୍ସ, ଇ-କମର୍ସ ଏବଂ ଫୁଡ୍ ଡେଲିଭରୀ ପ୍ଲାଟ୍ଫର୍ମଗୁଡ଼ିକରେ ପୁଳା ପୁଳା ଅର୍ଡର ଆସୁଛି । କିନ୍ତୁ ପ୍ରଦୂଷଣ ଯୋଗୁ ଏହି ପ୍ଲାଟ୍ଫର୍ମଗୁଡ଼ିକରେ ଏବେ ଡେଲିଭରୀମ୍ୟାନ୍ ଅଭାବ । ସାମଗ୍ରୀ ଡେଲିଭର କରିବା ପାଇଁ ଏମାନେ କୁଣ୍ଠାବୋଧ କରୁଛନ୍ତି । ଏଥିପାଇଁ କମ୍ପାନିଗୁଡ଼ିକ ବଡ଼ ସମସ୍ୟା ଦେଇ ଗତି କରୁଛନ୍ତି ।
ଗୋଟିଏ ପଟେ ବଡ଼ ଆକାରରେ ଅର୍ଡର ଆସୁଛି ଅନ୍ୟପଟେ ଡେଲିଭରୀ କର୍ମଚାରୀଙ୍କ ଅଭାବ ଯୋଗୁ ସାମଗ୍ରୀ ଯୋଗାଣରେ ସମସ୍ୟା ଦେଖାଦେଉଛି । ପିଲାମାନେ ସ୍କୁଲ ଯାଉନାହାନ୍ତି । କର୍ମଚାରୀମାନେ ୱାର୍କ ଫ୍ରମ୍ ହୋମ୍ କରୁଛନ୍ତି । ଗ୍ରାହକ ଘରୁ ବାହାରୁନାହାନ୍ତି । ଅନ୍ଲାଇନ୍ ଅର୍ଡରର ବିକଳ୍ପ ବାଛୁଛନ୍ତି ଲୋକେ । ଗ୍ରାହକ ବି କ୍ୱିକ୍ କମର୍ସ ବିକଳ୍ପ ଆଡ଼କୁ ଯାଉଛନ୍ତି । ଅର୍ଥାତ ୧୦ ମିନିଟ୍ରେ ସାମଗ୍ରୀ ଘରେ ପହଞ୍ଚିଯିବ । କମ୍ପାନିଗୁଡ଼ିକ ପାଖରେ ଅର୍ଡର ଗଦା ହେଉଛି କିନ୍ତୁ ଡେଲିଭରୀ କରୁଥିବା କର୍ମଚାରୀଙ୍କ ସଂଖ୍ୟା କମୁଛି । କାରଣ ପ୍ରଦୂଷଣରେ ବାହାରକୁ ବାହାରିବାକୁ କିଏ ବା ଚାହିଁବେ । ପୂର୍ବରୁ ଦିନକୁ ଯେତିକି ଅର୍ଡର ଆସୁଥିଲା ତାହା ବଡ଼ ଆକାରରେ ବଢ଼ିଯାଇଛି । ପ୍ରମୁଖ ଇ-କମର୍ସ ପ୍ଲାଟ୍ଫର୍ମ ଆମାଜନ ପ୍ରଦୂଷଣରୁ ରକ୍ଷା ପାଇବା ପାଇଁ ଡେଲିଭରୀ ବୟମାନଙ୍କୁ ଏନ୍୯୫ ମାସ୍କ ବିତରଣ କରୁଛି । କମ୍ପାନି ଏହାର ସର୍ଭିସ ପାର୍ଟନରମାନଙ୍କୁ ମଧ୍ୟ ସେମାନଙ୍କ କର୍ମଚାରୀମାନଙ୍କ ପାଇଁ ମାସ୍କ ଉପଲବ୍ଧ କରିବା ପାଇଁ ପରାମର୍ଶ ଦେଇଛି । ସମ୍ପ୍ରତି ଏୟାର୍ ପ୍ୟୁରିଫାୟର ଏବଂ ମାସ୍କ ଚାହିଦା ବଡ଼ ଆକାରରେ ବୃଦ୍ଧି ପାଇଥିବା ଜଣାପଡ଼ିଛି ।
