ନୂଆଦିଲ୍ଲୀ: ଦେଶରେ ସାଧାରଣ ନିର୍ବାଚନ ଲାଗି ପ୍ରସ୍ତୁତି ଜୋରଦାର ଚାଲିଛି । ନିର୍ବାଚନ ତାରିଖ ଘୋଷଣା ହୋଇଥିବା ବେଳେ ପ୍ରାର୍ଥୀମାନେ ନିଜ ନିଜ କ୍ଷେତ୍ରରେ ପ୍ରଚାର ଚଳାଇଛନ୍ତି । ଏପ୍ରିଲ ୧୯ରୁ ନିର୍ବାଚନ ଆରମ୍ଭ ହେବାକୁ ଥିବା ବେଳେ ଜୁନ୍‌ ୪ରେ ଆସିବ ଫଳାଫଳ । ଏହା ପରେ ନୂଆ ସାଂସଦ ଆସିବେ ସଂସଦ ଭବନ । ପୁଣି ଚାଲିବ ସଂସଦର ଅଧିବେଶନ । ପ୍ରଶ୍ନ-ଉତ୍ତର କାର୍ଯ୍ୟକ୍ରମରେ ଭାଗ ନେବେ ନବନିର୍ବାଚିତ ସାଂସଦ । 

 ଉଭୟ ଗୃହରେ ବିଭିନ୍ନ ପ୍ରସଙ୍ଗ ଉପରେ ହେବ ଆଲୋଚନା । ହେଲେ ସଂସଦରେ ହେଉଥିବା ଅଧିବେଶନରେ ସାଂସଦଙ୍କ ଉପସ୍ଥାନ ବି ଜରୁରି ।  ୧୭ ତମ ଲୋକସଭାରେ ମାତ୍ର ୨ ଜଣ ସାଂସଦଙ୍କ ଶତପ୍ରତିଶତ ଉପସ୍ଥାନ ରହିଛି ।  

ଏହା ବ୍ୟତୀତ ୯୦ ପ୍ରତିଶତ ଉପସ୍ଥାନ ଥିବା ସାଂସଦଙ୍କ ସଂପର୍କରେ ମଧ୍ୟ ଜାଣିବା । ଗତ ଲୋକସଭାରେ ଆଦାନୀ-ହିଣ୍ଡେନବର୍ଗ ବିବାଦ, ମଣିପୁର ହିଂସା ଭଳି ଅନେକ ପ୍ରସଙ୍ଗ ଉପରେ ଆଲୋଚନା ହୋଇଛି । ଏହି ସମୟରେ ସଂସଦ ଭିତରେ ଏବଂ ବାହରେ ବହୁ ଡ୍ରାମା ମଧ୍ୟ ଦେଖିବାକୁ ମିଳିଛି । 

ଏସବୁ ସତ୍ତ୍ବେ ଦୁଇ ଜଣ ସାଂସଦ ଗୋଟିଏ ବି ଦିନ ସଂସଦରେ ଅନୁପସ୍ଥିତ ନଥିଲେ । ସେମାନେ ହେଉଛନ୍ତି ବିଜେପିର ଆଜମେର ସାଂସଦ ଭାଗୀରଥ ଚୌଧୁରୀ ଏବଂ କାଂକେର ସାଂସଦ ମୋହନ ମଣ୍ଡାଭୀ । ସେମାନଙ୍କ ବ୍ୟତୀତ ୧୨୦ ସାଂସଦ ୯୦ ପ୍ରତିଶତରୁ ଅଧିକ ଉପସ୍ଥାନ ସହ ସଂସଦରେ ଉପସ୍ଥିତ ଥିଲେ । ୧୭ତମ ଲୋକସଭାରେ ମୋଟ ୨୭୩ଟି କାର୍ଯ୍ୟଦିବସ ରହିଥିଲା ।