ବ୍ରହ୍ମପୁର,୨୭/୦୪: ୨୦୧୯ରେ ଭୃଗୁ ବକ୍ସିପାତ୍ର ଥିଲେ ବିଜେପି ଲୋକସଭା ପ୍ରାର୍ଥୀ । ବିଜେଡିର ଚନ୍ଦ୍ରଶେଖର ସାହୁଙ୍କଠାରୁ ପରାସ୍ତ ହୋଇଥିଲେ । ଏଥର ଭୃଗୁ କିନ୍ତୁ ଦଳ ବଦଳାଇ ଚନ୍ଦ୍ରଶେଖରଙ୍କ ସ୍ଥାନରେ ବିଜେଡିରୁ ଲୋକସଭା ଲଢ଼ୁଛନ୍ତି ।
ପ୍ରଦୀପ ପାଣିଗ୍ରାହୀ ୨୦୧୯ରେ ବିଜେଡି ଟିକଟରେ ଗୋପାଳପୁରରୁ ବିଧାୟକ ହୋଇଥିଲେ । ଏବେ କିନ୍ତୁ ଦଳ ବଦଳାଇ ବ୍ରହ୍ମପୁର ଲୋକସଭାରୁ ବିଜେପି ପ୍ରାର୍ଥୀ ଭାବେ ମଇଦାନକୁ ଓହ୍ଲାଇଛନ୍ତି । କଂଗ୍ରେସ ନୂଆ ମୁହଁ ରଶ୍ମିରଞ୍ଜନ ପଟ୍ଟନାୟକଙ୍କୁ ପ୍ରାର୍ଥୀ କରିଛି । ଗତଥର କଂଗ୍ରେସ ପ୍ରାର୍ଥୀ ଭି ଚନ୍ଦ୍ରଶେଖର ନାଇଡୁ ଟିକଟ ନ ପାଇ ସ୍ୱାଧୀନ ଭାବେ ମଇଦାନରେ ଅଛନ୍ତି । ମେ ୧୩ ତାରିଖରେ ପ୍ରଥମ ପର୍ଯ୍ୟାୟରେ ବ୍ରହ୍ମପୁର ଲୋକସଭା କ୍ଷେତ୍ରର ଭୋଟ୍ ହେବ । ତିନି ଦଳ ପ୍ରାର୍ଥୀଙ୍କ ପ୍ରଚାର ଜୋର ଧରିଲାଣି ।
୨୦୧୯ ନିର୍ବାଚନରେ ମୁଖ୍ୟତଃ ପ୍ରତିଦ୍ୱନ୍ଦ୍ୱିତା ବିଜେଡି ଓ ବିଜେପି ମଧ୍ୟରେ ହୋଇଥିଲା । କଂଗ୍ରେସ ପ୍ରାର୍ଥୀ ବହୁ ପଛରେ ରହିଥିଲେ । ୨୦୧୯ରେ ବିଜେଡି ପ୍ରାର୍ଥୀ ଗଞ୍ଜାମ ଜିଲ୍ଲାର ୫ଟି ବିଧାନସଭା ଆସନରେ ଲିଡ୍ କରିଥିବା ବେଳେ ବିଜେପି ଗଜପତି ଜିଲ୍ଲାର ୨ଟି ଆସନରେ ଆଗୁଆ ରହିଥିଲା । କଂଗ୍ରେସର ଚନ୍ଦ୍ରଶେଖର ସାହୁ ୪ ଲକ୍ଷ ୪୩ ହଜାର ୮୪୩ ଭୋଟ ପାଇଥିଲେ । ନିକଟତମ ପ୍ରତିଦ୍ୱନ୍ଦ୍ୱୀ ବିଜେପିର ଭୃଗୁ ବକ୍ସିପାତ୍ର ୩ ଲକ୍ଷ ୪୮ ହଜାର ୯୯୯ ଓ କଂଗ୍ରେସ ପ୍ରାର୍ଥୀ ଭି. ଚନ୍ଦ୍ରଶେଖର ନାଇଡ଼ୁ ୧ ଲକ୍ଷ ୪୨ ହଜାର ୬୩୨ ଭୋଟ ପାଇଥିଲେ । କଂଗ୍ରେସକୁ ୫୭,୨୪୯ ଭୋଟ କେବଳ ମୋହନା ବିଧାନସଭା ଆସନରୁ ମିଳିଥିଲା ।
ବ୍ରହ୍ମପୁର ଲୋକସଭା ଆସନ ଅନ୍ତର୍ଭୁକ୍ତ ଗଞ୍ଜାମ ଜିଲ୍ଲାର ୫ଟି ଆସନ ବିଜେଡି ଦଖଲକୁ ଆସିଥିଲା । ଗଜପତି ଜିଲ୍ଲାର ପାରଳାଖେମୁଣ୍ଡି ବିଜେପି ଓ ମୋହନା ଆସନ କଂଗ୍ରେସ ଅକ୍ତିଆର କରିଥିଲା । ବ୍ରହ୍ମପୁର ବିଧାନସଭା ଆସନରେ ବିଜେଡି ବିଧାୟକ ପ୍ରାର୍ଥୀ ୬୮,୧୧୩ ଭୋଟ ପାଇଥିବା ବେଳେ ସାଂସଦ ପ୍ରାର୍ଥୀ ୬୪, ୮୫୦ ଭୋଟ ପାଇଥିଲେ । ସେହିପରି ବିଜେପି ସାଂସଦ ପ୍ରାର୍ଥୀ ୪୨, ୮୪୦ ଭୋଟ ପାଇଥିବା ବେଳେ ବିଧାୟକ ପ୍ରାର୍ଥୀ ୩୨, ୬୨୯ ଭୋଟ ପାଇଥିଲେ । ଛତ୍ରପୁର ବିଧାନସଭା ଆସନରେ ବିଜେଡି ୭୪, ୫୯୪ ଭୋଟ୍ ପାଇଥିବା ବେଳେ ସାଂସଦ ପ୍ରାର୍ଥୀ ୭୭, ୭୨୫ ଭୋଟ ପାଇଛନ୍ତି । ସେହିପରି ବିଜେପି ବିଧାୟକ ପ୍ରାର୍ଥୀ ୫୩, ୫୪୩ ଓ ସାଂସଦ ପ୍ରାର୍ଥୀ ୫୩, ୯୬୮ ଭୋଟ ପାଇଥିଲେ । ଗୋପାଳପୁର ଆସନରେ ବିଜେଡି ବିଧାୟକ ପ୍ରାର୍ଥୀ ୬୧, ୬୨୮ ଭୋଟ୍ ପାଇଥିବା ବେଳେ ସାଂସଦ ପ୍ରାର୍ଥୀ ୬୨, ୬୯୦ ଭୋଟ ପାଇଛନ୍ତି । ବିଜେପି ବିଧାୟକ ପ୍ରାର୍ଥୀ ୫୮,୯୫୫ ଓ ସାଂସଦ ପ୍ରାର୍ଥୀ ୫୬,୯୧୧ ଭୋଟ୍ ପାଇଥିଲେ ।
ଚିକିଟିରେ ବିଜେଡି ବିଧାୟକ ପ୍ରାର୍ଥୀ ୭୩, ୩୫୩ ଭୋଟ ପାଇଥିବା ବେଳେ ସାଂସଦ ପ୍ରାର୍ଥୀ ୭୨, ୨୯୨ ଭୋଟ ପାଇଛନ୍ତି । ସେହିପରି ବିଜେପି ବିଧାୟକ ପ୍ରାର୍ଥୀ ୫୨,୭୧୮ ଓ ସାଂସଦ ପ୍ରାର୍ଥୀ ୫୩,୦୫୨ ଭୋଟ ପାଇଥିଲେ । ଦିଗପହଣ୍ଡି ଆସନରେ ବିଜେଡି ବିଧାୟକ ପ୍ରାର୍ଥୀ ୭୫, ୦୧୬ ଭୋଟ ପାଇଥିବା ବେଳେ ସାଂସଦ ପ୍ରାର୍ଥୀ ୮୦, ୫୧୯ ଭୋଟ ପାଇଛନ୍ତି । ସେହିପରି ବିଜେପି ବିଧାୟକ ପ୍ରାର୍ଥୀ ୩୪,୫୬୪ ଓ ସାଂସଦ ପ୍ରାର୍ଥୀ ୩୬,୦୫୨ ଭୋଟ ପାଇଥିଲେ ।
ଗଜପତି ଜିଲ୍ଲାର ପାରଳାଖେମୁଣ୍ଡି ଆସନରେ ବିଜେଡି ପ୍ରାର୍ଥୀ ୨୬, ୬୪୫ ଭୋଟ୍ ପାଇଥିବା ବେଳେ ସାଂସଦ ପ୍ରାର୍ଥୀ ୩୭, ୭୮୯ ଭୋଟ ପାଇଥିଲେ । ସେହିପରି ବିଜେପି ବିଧାୟକ ପ୍ରାର୍ଥୀ ୫୨, ୪୧୫ ଓ ସାଂସଦ ପ୍ରାର୍ଥୀ ୫୬,୮୮୩ ଭୋଟ ପାଇଥିଲେ । ମୋହନା ଆସନରେ ବିଜେଡି ବିଧାୟକ ପ୍ରାର୍ଥୀ ୫୧,୩୫୧ ଓ ସାଂସଦ ପ୍ରାର୍ଥୀ ୪୭,୨୩୦ ଭୋଟ ପାଇଛନ୍ତି । ସେହିପରି ବିଜେପି ବିଧାୟକ ପ୍ରାର୍ଥୀ ୪୬,୧୬୭ ଓ ସାଂସଦ ପ୍ରାର୍ଥୀ ୪୭,୬୯୬ ଭୋଟ ପାଇଥିଲେ । ଏହି ଆସନରେ କଂଗ୍ରେସ ବିଧାୟକ ପ୍ରାର୍ଥୀ ୫୩,୭୦୫ ଓ ସାଂସଦ ପ୍ରାର୍ଥୀ ୫୭,୨୪୯ ଭୋଟ ପାଇଥିଲେ ।
ପ୍ରଦୀପ ପାଣିଗ୍ରାହୀଙ୍କ ପାଇଁ ଏହି ଲଢ଼େଇ ହୋଇଛି ମର୍ଯ୍ୟାଦାର ପ୍ରଶ୍ନ । ବିଜେଡିରୁ ବହିଷ୍କୃତ ହେବା ପରେ ବିଜେପିରେ ତାଙ୍କୁ ମିଳିଛି ଗୁରୁତ୍ୱପୂର୍ଣ୍ଣ ବ୍ରହ୍ମପୁର ଲୋକସଭା କ୍ଷେତ୍ରର ଟିକଟ । ଏଣୁ ନିଜ ରାଜନୈତିକ କ୍ୟାରିଅର ପୁନରୁତ୍ଥାନ ପାଇଁ ସେ ଆରମ୍ଭ କରିଦେଇଛନ୍ତି ଜୋରଦାର କସରତ । ନାମାଙ୍କନ ପୂର୍ବରୁ ଗଞ୍ଜାମ ଜିଲ୍ଲାର ବିଭିନ୍ନ ଅଞ୍ଚଳ ସମେତ ଗଜପତିର ମୋହନା ଓ ପାରଳାଖେମୁଣ୍ଡି ନିର୍ବାଚନମଣ୍ଡଳୀକୁ ଏକାଧିକବାର ଗସ୍ତ କରି ସେଠାରେ ପ୍ରଚାର ଆରମ୍ଭ କରିଦେଇଛନ୍ତି । ମୋଦିଙ୍କ ଗ୍ୟାରେଣ୍ଟି ସହ ନିଜ ଚିରାଚରିତ ଭାଷଣ ‘ଲେଖା ଛିଡ଼ାଇବା’ ହୋଇଛି ତାଙ୍କ ପ୍ରଚାର ।
ସୂଚନାଯୋଗ୍ୟ ଯେ, ୨୦୧୯ରେ ଗଞ୍ଜାମ ଜିଲ୍ଲାର ୫ଟି ବିଧାନସଭା କ୍ଷେତ୍ରରେ ବିଜେପି ଦ୍ୱିତୀୟ ସ୍ଥାନରେ ଥିବାବେଳେ ପାରଳାଖେମୁଣ୍ଡି ଅକ୍ତିଆର କରିଥିଲା । ଗଞ୍ଜାମ ଜିଲ୍ଲାର ୫ ବିଧାନସଭା କ୍ଷେତ୍ରରେ ବିଜେଡିର ଦବ୍ଦବା ରହିଥିବାବେଳେ ଭୃଗୁ ବକ୍ସିପାତ୍ର ଅପେକ୍ଷାକୃତ ସୁବିଧାଜନକ ସ୍ଥିତିରେ ଥିବା କୁହାଯାଇପାରେ । ଗତଥର ଗଜପତି ଜିଲ୍ଲା ଅନ୍ତର୍ଗତ ପାରଳାଖେମୁଣ୍ଡିରେ ବିଜେପି ଓ ମୋହନାରେ କଂଗ୍ରେସ ଅଧିକ ଭୋଟ ନେଇଥିଲା । ସ୍ୱାଭାବିକ ଭାବେ ଭୃଗୁ ଗଜପତିକୁ ଫୋକସ୍ ଦେଇଛନ୍ତି । ପ୍ରାର୍ଥୀପତ୍ର ଦାଖଲ ପୂର୍ବରୁ ସେ ପାରଳାଖେମୁଣ୍ଡି, ମୋହନା, ରା. ଉଦୟଗିରି ଅଞ୍ଚଳ ଗସ୍ତ କରି ପ୍ରଚାର କାର୍ଯ୍ୟ ଆରମ୍ଭ କରିଦେଇଛନ୍ତି । ପ୍ରଦୀପ ପାଣିଗ୍ରାହୀ ମୋଦିଙ୍କ ଗ୍ୟାରେଣ୍ଟି ଆଧାରରେ ପ୍ରଚାର ଚଳାଇଥିବାବେଳେ ‘ନବୀନ କ୍ରେଜ୍’ ଭରସାରେ ଭୃଗୁ ନିର୍ବାଚନ ବୈତରଣୀ ପାର କରିବାକୁ ଉଦ୍ୟମ ଚଳାଇଛନ୍ତି ।