ନୂଆଦିଲ୍ଲୀ,୨୫/୦୬: ଅପରେସନ ସିନ୍ଧୁ ଅଧୀନରେ ଇରାନରୁ ପୁଣି ଏକ ଭାରତୀୟ ଦଳ ଭାରତ ଫେରିଛି। ଏହି ବ୍ୟାଚରେ ୩୦୦ ଜଣ ଯାତ୍ରୀ ଅଛନ୍ତି। ଏହି ସୂଚନା ଦେଇ ଭାରତୀୟ ବୈଦେଶିକ ମନ୍ତ୍ରଣାଳୟ କହିଛି ଯେ ଏହି ବ୍ୟାଚରେ ୨୯୬ ଜଣ ଭାରତୀୟ ଏବଂ ୪ ଜଣ ନେପାଳୀ ନାଗରିକ ଅଛନ୍ତି। ଯୁଦ୍ଧଗ୍ରସ୍ତ ଅଞ୍ଚଳରେ ଫସି ରହିଥିବା ଏହି ଲୋକମାନଙ୍କୁ ଇରାନରୁ ସୁରକ୍ଷିତ ଅଞ୍ଚଳକୁ ଅଣାଯାଇଥିଲା ଏବଂ ତା’ପରେ ଏକ ସ୍ୱତନ୍ତ୍ର ବିମାନ ମାଧ୍ୟମରେ ନୂଆଦିଲ୍ଲୀ ଆସିଥିଲା। ମଶାଦରୁ ଏହି ଯାତ୍ରୀମାନଙ୍କୁ ନେଇ ବିମାନ ବୁଧବାର ସନ୍ଧ୍ୟାରେ ନୂଆଦିଲ୍ଲୀରେ ପହଞ୍ଚିଥିଲା।
ଇରାନରୁ ଫେରିଥିବା ଜଣେ ଯାତ୍ରୀ କହିଛନ୍ତି ଯେ 'ମୁଁ ଭାରତ ସରକାରଙ୍କୁ ଧନ୍ୟବାଦ ଦେବାକୁ ଚାହୁଁଛି କାରଣ ସେମାନଙ୍କ ଯୋଗୁଁ ହିଁ ଆମେ ଏଠାରେ ସୁରକ୍ଷିତ ଭାବରେ ପହଞ୍ଚିପାରିଛୁ।' ଅନ୍ୟ ଜଣେ ଯାତ୍ରୀ କହିଛନ୍ତି ଯେ 'ଭାରତୀୟ ଦୂତାବାସ ଆମକୁ ମସାଦରୁ ଏଠାକୁ ଆଣିବାରେ ବହୁତ ସାହାଯ୍ୟ କରିଛି। ଯାତ୍ରା ସମୟରେ ଆମେ କୌଣସି ଅସୁବିଧାର ସମ୍ମୁଖୀନ ହୋଇନାହୁଁ।' ବୈଦେଶିକ ମନ୍ତ୍ରଣାଳୟ କହିଛି ଯେ ଏପର୍ଯ୍ୟନ୍ତ ୩୧୫୪ ଭାରତୀୟ ନାଗରିକଙ୍କୁ ଇରାନରୁ ଫେରାଇ ଅଣାଯାଇଛି। ଏଥିପାଇଁ ସରକାର ସ୍ୱତନ୍ତ୍ର ଭାବରେ ଅପରେସନ ସିନ୍ଧୁ ଆରମ୍ଭ କରିଛନ୍ତି।
ସୁଚନାଥାଉକି, ଇରାନ ଏବଂ ଇସ୍ରାଏଲ ମଧ୍ୟରେ ଚାଲିଥିବା ଯୁଦ୍ଧ ଭିତରେ ସେଠାରେ ଥିବା ଭାରତୀୟ ନାଗରିକ ମାନଙ୍କୁ ସ୍ବଦେଶ ଫେରାଇ ଆଣିବାକୁ କେନ୍ଦ୍ର ସରକାର ଅପରେସନ ସିନ୍ଧୁ ଆରମ୍ଭ କରିଥିଲେ। ଏହା ଅଧିନରେ ସେଠାରେ ରହୁଥିବା ଅନେକ ଭାରତୀୟ ନାଗରିକ ଏବେ ସ୍ବଦେଶ ଫେରିଛନ୍ତି। ନିକଟରେ ଇରାନ ମଧ୍ୟ ଏହାର ଏୟାରସ୍ପେଶ୍କୁ ବିଦେଶୀ ନାଗରିକଙ୍କର ସ୍ବଦେଶ ପ୍ରତ୍ୟାବର୍ତ୍ତନ ପାଇଁ ଖୋଲିଥିଲା। କେବଳ ଭାରତ ନୁହେଁ ଆମେରିକା ଭଳି ରାଷ୍ଟ୍ର ମଧ୍ୟ ଏହାର ନାଗରିକଙ୍କୁ ଫେରାଇ ଆଣିବା ପାଇଁ ଅଭିଯାନ ଆରମ୍ଭ କରିଥିଲା
