ଭୁବନେଶ୍ୱର,୧୮/୧୦: ଓଡିଶା ଅଧସ୍ତନ କର୍ମଚାରୀ ଚୟନ ଆୟୋଗ (ଓଏସ୍ଏସ୍ଏସ୍ସି) ଦ୍ୱାରା କମ୍ପ୍ୟୁଟର ଆଧାରିତ ନିଯୁକ୍ତି ପରୀକ୍ଷାରେ ନାନା ଅନିୟମିତତା ହୋଇଥିବା ଅଭିଯୋଗ ହୋଇଛି । ଏ ନେଇ ବାରମ୍ବାର ଆଶାୟୀ ପରୀକ୍ଷାର୍ଥୀ ଓ ଛାତ୍ରଛାତ୍ରୀମାନେ ଆନ୍ଦୋଳନ କରିବା ପରେ ରାଜ୍ୟ ସରକାର ଏହି ପ୍ରସଙ୍ଗକୁ ଗୁରୁତ୍ୱର ସହ ଗ୍ରହଣ କରିଛନ୍ତି । ସରକାର ଏହି ଘଟଣାର ଉଚ୍ଚସ୍ତରୀୟ ତଦନ୍ତ ଆରମ୍ଭ କରିଛନ୍ତି ବୋଲି ଗୁରୁବାର ଏକ ପ୍ରେସ ବିଜ୍ଞପ୍ତିରେ ରାଜ୍ୟ ସରକାରଙ୍କ ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗ ପକ୍ଷରୁ କୁହାଯାଇଛି ।
ବିଭାଗ ଆହୁରି କହିଛି, ଓଏସ୍ଏସ୍ଏସ୍ସି ଦ୍ୱାରା କମ୍ପ୍ୟୁଟର ଆଧାରିତ ନିଯୁକ୍ତି ପରୀକ୍ଷା ୨୦୨୪ ଯଥା-ଏଲ୍ଆଇ, ଫରେଷ୍ଟର, ଫରେଷ୍ଟଗାର୍ଡ, ଆର୍ଆଇ, ଅମିନ, ଏଆର୍ଆଇ, ଆଇସିଡିଏସ୍ ସୁପରଭାଇଜର ତଥା ଏସ୍ଏଫ୍ଏସ୍ ଭଳି ପରୀକ୍ଷାର ସ୍ୱଚ୍ଛତା ସହ ସାଲିସ ହୋଇଥିବା ଅଭିଯୋଗ ହୋଇଛି । ତେଣୁ ଏହାର ତଦନ୍ତ ନିହାତି ଆବଶ୍ୟକ ଥିଲା । ତଦନ୍ତ ପରେ ଖୁବ ଶୀଘ୍ର ସରକାର ନିଷ୍ପତ୍ତି ଗ୍ରହଣ କରିବେ । ଅପରପକ୍ଷେ, ଯଦି ଏହି ପରୀକ୍ଷାରେ ବାସ୍ତବରେ କୌଣସି ଅନିୟମିତତା ରହିଥିବା ପ୍ରମାଣିତ ହୁଏ ତେବେ ଏହା ବାତିଲ ହୋଇପାରେ ବୋଲି ବୁଦ୍ଧିଜୀବୀ ମହଲରେ ଆଲୋଚନା ହୋଇଛି ।
