କଟକ,୦୬/୦୮: ସ୍ପେସାଲ୍ ଓଟିଇଟି ପ୍ରଶ୍ନ ଲିକ୍ କେଳେଙ୍କାରୀରେ ଛନ୍ଦି ହୋଇଥିବା ମାଧ୍ୟମିକ ଶିକ୍ଷା ପରିଷଦ (ବୋର୍ଡ) କାର୍ଯ୍ୟାଳୟ ଉପରେ ଏବେ କ୍ରାଇମ୍ବ୍ରାଞ୍ଚ୍ର ତୀକ୍ଷ୍ଣ ନଜର । ବୋର୍ଡର ଉପସଭାପତି ଡ. ନିହାର ରଞ୍ଜନ ମହାନ୍ତି ଓ ଡାଟା ଏଣ୍ଟ୍ରି ଅପରେଟର୍ ଜିତନ ମହାରଣା ଗିରଫ ହୋଇ ଜେଲ୍ ଯାଇ ସାରିଛନ୍ତି । ଜଣେ ମହିଳା ଡାଟା ଏଣ୍ଟ୍ରି ଅପରେଟର୍ ପ୍ରତିଦିନ ଜେରାକୁ ସାମ୍ନା କରୁଛନ୍ତି । ଏବେ ଧିରେ ଧିରେ ବୋର୍ଡର ଅନ୍ୟ ବରିଷ୍ଠ ଅଧିକାରୀଙ୍କ ଆଡ଼କୁ ଅଙ୍ଗୁଳି ଉଠିଲାଣି । ବିଶେଷକରି ଉପସଭାପତି ନିହାରଙ୍କୁ ସବୁ ପରୀକ୍ଷାର ପ୍ରଶ୍ନପତ୍ର ସେଟିଂ ଓ ପ୍ରସ୍ତୁତି ଦାୟିତ୍ୱ ଦିଆଯିବା ଓ କ୍ଷମତାଶାଳୀ କରାଯିବା ସନ୍ଦେହଜନକ ବ୍ୟାପାର ମନେ ହେଉଥିବାରୁ ବୋର୍ଡର ସଭାପତି ଶ୍ରୀକାନ୍ତ ତରାଇ ବିବାଦ ଘେରକୁ ଆସିଲେଣି । ଏତେ ବଡ଼ ଘୋଟାଲାରେ ବୋର୍ଡ ସଭାପତି, ସମ୍ପାଦକ ବା ପରୀକ୍ଷା ନିୟନ୍ତ୍ରକ କିପରି ଉତ୍ତରଦାୟିତ୍ୱରୁ ମୁକ୍ତ ହୋଇ ରହିପାରିବେ ବୋଲି ପ୍ରଶ୍ନ ବି ଉଠିଲାଣି । ଅନ୍ୟପକ୍ଷରେ ଗିରଫ ହୋଇ ଚୌଦ୍ୱାର ଜେଲ୍ରେ ଥିବା ବୋର୍ଡ଼ ଉପସଭାପତି ନିହାର ରଞ୍ଜନ ମହାନ୍ତିଙ୍କୁ ସରକାର ନିଲମ୍ବନ କରିଛନ୍ତି ।
ପ୍ରଶ୍ନ ଲିକ୍ ସମ୍ପର୍କରେ କ୍ରାଇମ୍ବ୍ରାଞ୍ଚ୍ରେ ଅଭିଯୋଗ ହେବା ଦିନଠୁ କ୍ରାଇମବ୍ରାଞ୍ଚ୍ ଡିଆଇଜି ବାତୁଲା ଗଙ୍ଗାଧର ଓ ତଦନ୍ତକାରୀ ଅନ୍ୟ ଅଧିକାରୀମାନେ ବୋର୍ଡ ସଭାପତି ଶ୍ରୀକାନ୍ତ ତରାଇଙ୍କୁ ଏକାଧିକ ଥର ପଚରାଉଚରା କରି ବୟାନ ରେକର୍ଡ କରିଛନ୍ତି । ସୋମବାର ଲୋକସେବା ଭବନରେ ବିଦ୍ୟାଳୟ ଓ ଗଣଶିକ୍ଷା ବିଭାଗରେ ବୋର୍ଡ ସଭାପତି ହାଜର ହୋଇ ପ୍ରଶ୍ନ ଲିକ୍ ଘଟଣା ସମ୍ପର୍କରେ ମନ୍ତ୍ରୀ, ସଚିବଙ୍କୁ କୈଫିୟତ ଦେଇଥିବା ବେଳେ ମଙ୍ଗଳବାର ମଧ୍ୟ ବିଭାଗରେ ହାଜର ହୋଇ କୈଫିୟତ ରଖିଥିବା ସୂଚନା ମିଳିଛି ।
ଏ ପୂରା କେଳେଙ୍କାରୀ ପ୍ରସଙ୍ଗରେ ବୋର୍ଡର ସଭାପତି-ଉପସଭାପତିଙ୍କ ଯୋଡ଼ି ଆଡ଼କୁ ଏବେ ସନ୍ଦେହର ଆଙ୍ଗୁଳି ଉଠିଲାଣି । ଉଭୟ ଶ୍ରୀକାନ୍ତ- ନିହାର ଯୋଡ଼ି ଅନେକ ଦିନରୁ ବୋର୍ଡରେ ରହିଛନ୍ତି । ନିହାର ପରୀକ୍ଷା କଣ୍ଟ୍ରୋଲ୍ର ଦାୟିତ୍ୱରେ ଥିବାବେଳେ ଶ୍ରୀକାନ୍ତ ସମ୍ପାଦକ ଦାୟିତ୍ୱରେ ଥିଲେ । ଶ୍ରୀ ତରାଇ ବଦଳି ହୋଇ ଅନ୍ୟ ବିଭାଗକୁ ଯାଇଥିଲେ ହେଁ ନିହାର ଏଠାରେ ପଦୋନ୍ନତି ପାଇ ଉପସଭାପତି ହୋଇଥିଲେ । ଗତବର୍ଷ ଶ୍ରୀ ତରାଇ ବୋର୍ଡକୁ ସଭାପତି ଭାବେ ପୁଣି ପ୍ରତ୍ୟାବର୍ତ୍ତନ କରିଥିଲେ । ଶ୍ରୀ ତରାଇ ଫେରିବା ପରେ ଉପସଭାପତି ନିହାରଙ୍କୁ ପରୀକ୍ଷା ପରିଚାଳନା, ପ୍ରଶ୍ନ ପ୍ରସ୍ତୁତି ସମ୍ପର୍କିତ ସବୁ ଦାୟିତ୍ୱ ଧରାଇ ଦେଇଥିଲେ । ନିହାରଙ୍କ ମୁଣ୍ଡ ଉପରେ ସଭାପତିଙ୍କ ହାତ ଥିବାରୁ ସେ ସବୁକିଛି ନିଜ ନିୟନ୍ତ୍ରଣରେ ରଖି ମନ୍ମାନିରେ ଚଳାଇଥିଲେ ବୋଲି ଅଭିଯୋଗ ହେଉଛି ।
ପ୍ରଶ୍ନପତ୍ର ପ୍ରସ୍ତୁତି, ଛପାଯିବା ଆଦି କାରବାରର ତଦନ୍ତ ସମ୍ପର୍କରେ କ୍ରାଇମ୍ବ୍ରାଞ୍ଚ୍ ଡିଆଇଜି ପ୍ରତିକ୍ରିୟା ଦେଇ କହିଛନ୍ତି କି’ ବୋର୍ଡ ପକ୍ଷରୁ ଜାରି ସ୍ୱତନ୍ତ୍ର ନିର୍ଦ୍ଦେଶାବଳୀ (ଏସ୍ଓପି) ଅନୁସାରେ ଏକ୍ସପର୍ଟଙ୍କଠାରୁ ପ୍ରଶ୍ନ ସଂଗ୍ରହ ପରେ ଉପସଭାପତି ତାହାକୁ ସେଟିଂ କରିଥିଲେ । ପ୍ରଶ୍ନକୁ ଫାର୍ମକୁ ଛପାଇବା ପାଇଁ ପଠାଇବାକୁ ଉପସଭାପତିଙ୍କୁ ଦାୟିତ୍ୱ ଦିଆଯାଇଥିଲା । ୨୦୨୪ରେ ଜାରି ଏସ୍ଓପି ଅନୁସାରେ ପ୍ରଶ୍ନ ପ୍ରସ୍ତୁତି କରାଯାଇଥିଲେ ହେଁ ସୁରକ୍ଷା ଦିଗ ପ୍ରତି ଅବହେଳା ହୋଇଥିବା ସ୍ପଷ୍ଟ ବୋଲି କ୍ରାଇମ୍ବ୍ରାଞ୍ଚ୍ ଡିଆଇଜି ବାତୁଲା ଗଙ୍ଗାଧର କହିଛନ୍ତି ।
ସେହିପରି ନିହାର ଓ ଜିତନଙ୍କ ଆର୍ଥିକ ସାମ୍ରାଜ୍ୟ ଉପରେ କ୍ରାଇମ୍ବ୍ରାଞ୍ଚ ଛାନ୍ଭିନ୍ ଚଳାଇଛି । ମଙ୍ଗଳବାର ଦୁଇ ଜଣ ଶିକ୍ଷକଙ୍କୁ କ୍ରାଇମ୍ବ୍ରାଞ୍ଚ୍ ପଚରାଉଚରା କରିଥିବାବେଳେ ସନ୍ଦିଗ୍ଧ ତାଲିକାରେ ଥିବା ଆଉ କିଛି ଶିକ୍ଷକ, ଶିକ୍ଷକ ସଂଘ ନେତା ଏବେ ତଦନ୍ତକାରୀ ଅଧିକାରୀଙ୍କୁ ଧରାଛୁଆଁ ଦେଉ ନଥିବା ଖବର ମିଳିଛି ।
