ନୂଆଦିଲ୍ଲୀ: ସିରିଆର ପଦଚ୍ୟୁତ ରାଷ୍ଟ୍ରପତି ବଶର ଅଲ-ଆସାଦଙ୍କ ଅନୁଗତ ଏବଂ ସୁରକ୍ଷା ବାହିନୀ ମଧ୍ୟରେ ଦୁଇ ଦିନ ଧରି ସଂଘର୍ଷ ଜାରି ରହିଛି। ଏହି ପ୍ରତିଶୋଧମୂଳକ ହିଂସାରେ ମୃତ୍ୟୁ ସଂଖ୍ୟା ୧ ହଜାରରୁ ଅଧିକ ହୋଇଛି । ଏମାନଙ୍କ ମଧ୍ୟରେ ପ୍ରାୟ ୭୫୦ ସାଧାରଣ ନାଗରିକ ଅଛନ୍ତି। ଶନିବାର ମାନବାଧିକାର ସଂଗଠନ ଏହି ସୂଚନା ଦେଇଛି। ୧୪ ବର୍ଷ ପୂର୍ବେ ସିରିଆରେ ସଂଘର୍ଷ ଆରମ୍ଭ ହେବା ପରଠାରୁ ଏହା ସବୁଠାରୁ ମାରାତ୍ମକ ହିଂସା ଘଟଣା ମଧ୍ୟରୁ ଗୋଟିଏ। ବ୍ରିଟିଶ ସ୍ଥିତ ସିରିଆନ୍ ଅବଜରଭେଟୋରୀ ଫର ହ୍ୟୁମାନ୍ ରାଇଟ୍ସ କହିଛି ଯେ ୭୪୫ ଜଣ ସାଧାରଣ ନାଗରିକଙ୍କ ବ୍ୟତୀତ ସରକାରୀ ସୁରକ୍ଷା ବାହିନୀର ୧୨୫ ଜଣ ସଦସ୍ୟ ଏବଂ ପଦଚ୍ୟୁତ ରାଷ୍ଟ୍ରପତି ବଶର ଅଲ-ଆସାଦଙ୍କ ସହ ଜଡିତ ସଶସ୍ତ୍ର ଗୋଷ୍ଠୀର ୧୪୮ ଜଣ ଆତଙ୍କବାଦୀ ମଧ୍ୟ ନିହତ ହୋଇଛନ୍ତି।
ମାନବାଧିକାର ଗୋଷ୍ଠୀ ଏହା ମଧ୍ୟ ରିପୋର୍ଟ କରିଛି ଯେ, ଉପକୂଳବର୍ତ୍ତୀ ସହର ଲାଟାକିଆ ଆଖପାଖରେ ଥିବା ବଡ଼ ଅଞ୍ଚଳରେ ବିଦ୍ୟୁତ୍ ଏବଂ ପାନୀୟ ଜଳ ଯୋଗାଣ ବାଧାପ୍ରାପ୍ତ ହୋଇଛି ଏବଂ ଅନେକ ବେକରି ବନ୍ଦ ରହିଛି। ସିରିଆରେ ବିଦ୍ରୋହୀମାନେ ଅସଦଙ୍କୁ ଗାଦିଚ୍ୟୁତ କରି କ୍ଷମତା ଦଖଲ କରିବାର ତିନି ମାସ ପରେ ଗୁରୁବାର ଠାରୁ ଆରମ୍ଭ ହୋଇଥିବା ସଂଘର୍ଷ ଦମିସ୍କର ନୂତନ ସରକାରଙ୍କ ପାଇଁ ଏକ ବଡ଼ ଚ୍ୟାଲେଞ୍ଜ ଭାବରେ ଉଭା ହୋଇଛି। ସରକାର କହିଛନ୍ତି ଯେ ଏହା ଅସଦଙ୍କ ସମର୍ଥକ ମାନଙ୍କ ଦ୍ୱାରା କରାଯାଉଥିବା ଆକ୍ରମଣ ବିରୁଦ୍ଧରେ କାର୍ଯ୍ୟାନୁଷ୍ଠାନ ନେଉଛି। ସେ ବଡ଼ ଧରଣର ହିଂସା ପାଇଁ "ବ୍ୟକ୍ତିଗତ କାର୍ଯ୍ୟକଳାପ"କୁ ଦାୟୀ କରିଥିଲେ। ଗୁରୁବାର ଦିନ ସିରିଆର ଉପକୂଳବର୍ତ୍ତୀ ସହର ଜାବଲେହ ନିକଟରେ ସୁରକ୍ଷା ବାହିନୀ ଜଣେ ୱାଣ୍ଟେଡ୍ ବ୍ୟକ୍ତିଙ୍କୁ ଅଟକ ରଖିବାକୁ ଚେଷ୍ଟା କରିବା ପରେ ସିରିଆରେ ଏହି ସଂଘର୍ଷ ଆରମ୍ଭ ହୋଇଥିଲା। ଏହି ସମୟରେ, ଅସଦଙ୍କ ବିଶ୍ୱସ୍ତମାନେ ସେମାନଙ୍କୁ ଆକ୍ରମଣ କରିଥିଲେ।
