ମୁମ୍ବାଇ,୦୮/୦୮: ପ୍ରସିଦ୍ଧ ହାସ୍ୟ ଅଭିନେତା କପିଲ ଶର୍ମାଙ୍କ କାଫେକୁ ପୁଣି ଗୁଳିମାଡ଼। କାନାଡ଼ାର ସରେ ସହରରେ ଥିବା କପିଲଙ୍କ କାଫେ ଉପରକୁ ୨୫ ରାଉଣ୍ଡ ଫାୟାରିଂ କରିଛନ୍ତି ଦୁର୍ବୃତ୍ତ। ଏହି ଗୁଳିକାଣ୍ଡ ଲାଗି ଗୋଲ୍ଡି ଧୀଲନ ଓ ଲରେନ୍ସ ବିଷ୍ଣୋୟୀ ଗ୍ୟାଙ୍ଗ ନିଜକୁ ଦାୟୀ କରିଛି। ଘଟଣାର ଭିଡିଓ ସୋସିଆଲ୍ ମିଡିଆରେ ଭାଇରାଲ୍ ହେଉଛି।
ଯେଉଁଥିରେ ଦେଖିବାକୁ ମିଳିଛି ଯେ କିଛି ଲୋକ ଗୋଟିଏ କାରରେ ଆସୁଛନ୍ତି ଓ କାଫେ ଉପରେ ଗୁଳିମାଡ଼ କରୁଛନ୍ତି। ଏଥିପାଇଁ ସୋସିଆଲ୍ ମିଡିଆରେ ପୋଷ୍ଟ କରି ନିଜକୁ ଦାୟୀ କରିଛି ଗୋଲଡିଂ ଧୀଲନ ଓ ଲରେନ୍ସ ବିଷ୍ଣୋୟୀ ଗ୍ୟାଙ୍ଗ। ଯେଉଁଥିରେ ସେମାନେ ଲେଖିଛନ୍ତି, କପିଲଙ୍କୁ ଫୋନ୍ କଲୁ। ସେ ଉଠାଇଲେନି। ଏଥିପାଇଁ ଏଭଳି ଆକ୍ସନ ନେବାକୁ ପଡ଼ିଲା। ଜବାବ ନ ମିଳିଲେ ଆଗକୁ ଆକ୍ସନ ମୁମ୍ବାଇରୁ ହେବ।ସ୍ଥାନୀୟ ପୁଲିସ ଏହି ଘଟଣାର ତଦନ୍ତ ଆରମ୍ଭ କରିଛି। ଏପର୍ଯ୍ୟନ୍ତ ଗୁଳିକାଣ୍ଡରେ କେହି ଆହତ ହେବାର କୌଣସି ଖବର ଆସିନାହିଁ।ଏନେଇ କପିଲ ଶର୍ମାଙ୍କ ପକ୍ଷରୁ ବି କୌଣସି ପ୍ରତିକ୍ରିୟା ମିଳିନାହିଁ। ପ୍ରକାଶ ଥାଉକି, ଜୁଲାଇ ୧୦ ତାରିଖରେ ମଧ୍ୟ କାଫେ ଉପରେ ଏକାଧିକ ରାଉଣ୍ଡ ଗୁଳିମାଡ଼ ହୋଇଥିଲା। ଦୁର୍ବୃତ୍ତ ୯ରାଉଣ୍ଡ ଗୁଳିମାଡ଼ କରିଥିଲେ ।
