ପୁରୀ, ୦୧/୦୨: ଆଜି ତୃତୀୟା ତିଥିରେ ଶ୍ରୀମନ୍ଦିରରେ ଦାରୁବ୍ରହ୍ମଙ୍କ ପଦ୍ମବେଶ ଅନୁଷ୍ଠିତ ହେବ । ଦୁର୍ଲ୍ଲଭ ପଦ୍ମବେଶରେ ଭକ୍ତଙ୍କୁ ଦର୍ଶନ ଦେବେ ଶ୍ରୀବଳଭଦ୍ର, ଦେବୀ ସୁଭଦ୍ରା ଓ ଶ୍ରୀଜଗନ୍ନାଥ । ବଡ଼ଛତା ମଠ ଯୋଗାଇବ ଏହି ବେଶ । ଏଣୁ ମଠ ପକ୍ଷରୁ ସମସ୍ତ ପ୍ରସ୍ତୁତି ଚୂଡ଼ାନ୍ତ ହୋଇଛି । ଠାକୁରଙ୍କ ସନ୍ଧ୍ୟା ଧୂପ ସରିଲା ପରେ ବେଶ ପହଞ୍ଚିବ ବଡ଼ଦେଉଳରେ । ବଡ଼ସିଂହାର ବେଶରେ ଠାକୁରେ ପଦ୍ମ ବେଶରେ ବିଭୂଷିତ ହେବେ ।
ପୁଷ୍କରିଣୀ ପାଲଟିବ ରତ୍ନସିଂହାସନ । ସେଥିରେ ଫୁଟିଥିବ ପଦ୍ମ ଫୁଲ । ଖେଳୁଥିବେ ହଂସରାଳି । ପ୍ରସ୍ଫୁଟିତ ବିଶାଳ ପଦ୍ମର କେଶର ଭାଗରେ ଶୋଭାପାଉଥିବ ଶ୍ରୀମୁଖ । ଶ୍ରୀମସ୍ତକରେ ଚୂଳମାନ ଲାଗି ହୋଇଥିବେ । ଠାକୁରେ ଧାରଣ କରିଥିବେ କରପଲ୍ଲବ । ରାତ୍ର ଚନ୍ଦନଲାଗି ନୀତି ବଢ଼ିବା ପରେ ବଡ଼ସିଂହାରରେ ଠାକୁରେ ଏହି ବେଶ ହେବେ । ବିଳମ୍ବିତ ରାତି ପର୍ଯ୍ୟନ୍ତ ଠାକୁରଙ୍କୁ ଏହି ବେଶରେ ଦର୍ଶନକରି ପୂଣ୍ୟ ଅର୍ଜନ କରିବେ ଶ୍ରଦ୍ଧାଳୁ । ଗବେଷକଙ୍କ ମତରେ ସପ୍ତଦଶ ଶତାବ୍ଦୀରେ ବଡ଼ଛତା ମଠର ମହନ୍ତ ସନ୍ଥ ରଘୁବର ଦାସ ଏହି ବେଶ ପ୍ରବର୍ତ୍ତନ କରିଥିଲେ । କିମ୍ୱଦନ୍ତୀ ଅନୁଯାୟୀ ମନୋହର ଦାସ ନାମକ ଜଣେ ହିନ୍ଦୀ ଭାଷୀ ସାଧୁଙ୍କ ଭକ୍ତିରେ ପ୍ରୀତ ହୋଇ ଠାକୁରେ ପଦ୍ମ ବେଶରେ ବିଭୂଷିତ ହେଉଛନ୍ତି । ରବିବାର ସକାଳେ ବେଶରେ ଥାଇ ଠାକୁରଙ୍କ ମଙ୍ଗଳାଳତି ବଢ଼ିବ । ପ୍ରତ୍ୟୁଶରେ ଠାକୁରଙ୍କ ବେଶ ଦର୍ଶନ ସହ ଭକ୍ତମାନେ ଖିରି ଅମାଲୁ ଭୋଗ ପ୍ରାପ୍ତ ହେବେ।
