ନୂଆଦିଲ୍ଲୀ,୨୩।୪: ଜମ୍ମୁ ଓ କାଶ୍ମୀରର ପହଲଗାମରେ ମଙ୍ଗଳବାର ହୋଇଛି ବଡ଼ ଧରଣର ଆତଙ୍କବାଦୀ ଆକ୍ରମଣ। ପର୍ଯ୍ୟଟକଙ୍କୁ ଆଖିବୁଜା ଗୁଳିମାଡ଼ କରି ନିର୍ମମ ଭାବରେ ହତ୍ୟା କରିଛନ୍ତି ଆତଙ୍କୀ। ଏହି ଆକ୍ରମଣର ଡିଜିଟାଲ ପ୍ରମାଣ ପାକିସ୍ତାନ ସହିତ ଜଡିତ ଥିବା ମନେ ହେଉଛି। ଭାରତୀୟ ଗୁଇନ୍ଦା ସଂସ୍ଥାର ସୂଚନା ଅନୁସାରେ, ଆକ୍ରମଣର ସନ୍ଦିଗ୍ଧ ଆତଙ୍କବାଦୀଙ୍କ ଡିଜିଟାଲ୍ ଫୁଟପ୍ରିଣ୍ଟ ଓ ଫରେନସିକ୍ ଲିଙ୍କ୍ ମୁଜାଫରାବାଦ ଏବଂ କରାଚୀ ସ୍ଥିତ ସେଫ୍ ହାଉସ୍ ପର୍ଯ୍ୟନ୍ତ ରହିଛି। ଯାହାକି ଏହି ଆକ୍ରମଣର ସୀମାପାର ଲିଙ୍କ୍ ର ପ୍ରମାଣ ପ୍ରଦାନ କରେ। ଉଲ୍ଲେଖନୀୟ ଯେ, ଏହି ଆକ୍ରମଣରେ ଏପର୍ଯ୍ୟନ୍ତ୨୮ ଜଣ ପର୍ଯ୍ୟଟକଙ୍କ ମୃତ୍ୟୁ ହୋଇସାରିଛି, ସେଭଳି ୨୦ରୁ ଅଧିକ ଲୋକ ଆହତ ହୋଇଛନ୍ତି।
ଗୁଇନ୍ଦା ସୁତ୍ର ଅନୁସାରେ, ଘଟଣାସ୍ଥଳରୁ ଜବତ ଫରେନସିକ୍ ଆନାଲିସିସ୍ ଓ ଆକ୍ରମଣରେ ବଞ୍ଚିଥିବା ଲୋକଙ୍କଠାରୁ ସୂଚନା ଆଧାରରେ ଜଣାପଡିଛି। ଆତଙ୍କବାଦୀମାନେ ସେନା ଦ୍ବାରା ବ୍ୟବହୃତ ଅସ୍ତ୍ରଶସ୍ତ୍ର ବ୍ୟବହାର କରିଥିଲେ। ଏହାର ଅର୍ଥ ଆକ୍ରମଣକାରୀ ସମ୍ପୂର୍ଣ୍ଣ ଭାବରେ ପ୍ରଶିକ୍ଷିତ ଏବଂ ସବୁ ଜରୁରୀ ହତିଆର ନେଇ ଆସିଥିଲେ। ଭାରତୀୟ ଏଜେନ୍ସି ଘଟଣାସ୍ଥଳରୁ ଆଡଭାନ୍ସ ସଞ୍ଚାର ଉପଗ୍ରହ ଜବତ କରିଛନ୍ତି। ଏଥିରୁ ସଙ୍କେତ ମିଳୁଛି ଯେ, ଆତଙ୍କବାଦୀଙ୍କୁ ବାହାରୁ ଲଜିଷ୍ଟିକ୍ ସପୋର୍ଟ ଓ ସହଯୋଗ ମିଳୁଥିଲା। ଆତଙ୍କବାଦୀମାନେ ପାକିସ୍ତାନରେ ଥିବା ଅପରେଟିଭ୍ଙ୍କ ସହ ପ୍ରତ୍ୟକ୍ଷ ଭାବରେ ଯୋଗାଯୋଗରେ ଥିଲେ।
ପହଲଗାମ୍ ଆକ୍ରମଣର ସନ୍ଦିଗ୍ଧଙ୍କ ଡିଜିଟାଲ କନେକ୍ସନ ପାକିସ୍ତାନ ସ୍ଥିତ ମୁଜଫରାବାଦ ଓ କରାଚୀର ‘ସେଫ୍ ହାଉସ’ରେ ସହ ମିଳିଛି। ଯାହାଫଳରେ ସୀମାପାର ଆତଙ୍କବାଦୀଙ୍କ ସଂସ୍ପର୍ଶରେ ସାକ୍ଷ୍ୟ ମଜବୁତ ହୋଇଥିଲା। ସୁରକ୍ଷା ଅଧିକାରୀଙ୍କ ସୂଚନା ଅନୁସାରେ, ଅସ୍ତ୍ରଶସ୍ତ୍ରର ପ୍ରକୃତି ଓ ଆକ୍ରମଣର ସଠିକତାରୁ ଜଣାପଡୁଛି ଆତଙ୍କବାଦୀମାନେ ତାଲିମପ୍ରାପ୍ତ ସଞ୍ଚାଳକଙ୍କଠାରୁ ସାମରିକ ସହାୟତା ନେଇଥିଲେ। ଏପରିକି ନିଜ ପିଠିରେ ବଡ଼ ବଡ଼ ବ୍ୟାଗ୍ ଲଦିଥିଲେ। ଯେଉଁଥିରେ ଡ୍ରାଏ ଫ୍ରୁଟସ୍, ମେଡିସିନ୍ ଏବଂ ସଞ୍ଚାର ଉପକରଣ ରହିଥିଲା। ୬-୭ ଆତଙ୍କବାଦୀ ଏକ ଗୋଷ୍ଠୀ ଜଙ୍ଗଲରେ ଲୁଚି ରହିଥିଲା। ସେମାନେ ସ୍ଥାନୀୟ ଲୋକଙ୍କ ସହାୟତାରେ ପହଲଗାମ୍ରେ ରେକି କରିଥିଲେ। ୩-୪ ଆତଙ୍କୀ ଏକେ-୪୭ ରାଇଫଲରେ ଲଗାତାର ଫାୟାରିଂ କରିଥିଲେ। ଏହି ସମୟରେ ୨ ପାକିସ୍ତାନୀ ଆତଙ୍କବାଦୀ ଥିଲେ, ସେମାନେ ପସ୍ତୋ ଭାଷାରେ କଥା ହେଉଥିଲେ। ତାଙ୍କ ସହ ୨ ସ୍ଥାନୀୟ ଆତଙ୍କୀ ଆଦିଲ ଓ ଆସିଫ୍ ମଧ୍ୟ ଥିଲେ। ପାକିସ୍ତାନୀ ଆତଙ୍କୀ ବଡି କ୍ୟାମେରା ପିନ୍ଧି ପ୍ରଥମେ ସବୁ ରେକର୍ଡିଂ କରିଥିଲେ। ତାଙ୍କର ଉଦେଶ୍ୟ ଥିଲା ୨୬/୧୧ ମୁମ୍ବାଇ ଆକ୍ରମଣ ଭଳି କିଛି ବଡ଼ ହମଲା କରିବା।
