ନୂଆଦିଲ୍ଲୀ, ୧।୫: ବିଶ୍ବର ସବୁଠୁ ବିପଦଜନକ ଆତଙ୍କବାଦୀ ଶକ୍ତି ହେଉଛି ପାକିସ୍ତାନ । କାବୁଲରୁ ଲଣ୍ଡନ ପର୍ଯ୍ୟନ୍ତ ସବୁଠି ପାକ୍ ସରକାର ପ୍ରାୟୋଜିତ ଆକ୍ରମଣ ଯୋଜନା ରହିଛି । ଆତଙ୍କବାଦୀଙ୍କୁ ପ୍ରୋତ୍ସାହନ ଦେବା ଓ ଆଶ୍ରୟ ଦେବାରେ ପାକିସ୍ତାନର ରେକର୍ଡ ରହିଛି । ୨୬/୧୧ ମୁମ୍ବାଇ ଆକ୍ରମଣ ଭଳି ସୀମାପାର ଆତଙ୍କୀ ଘଟଣାରେ ପାକିସ୍ତାନ ସରକାରଙ୍କ ଭୂମିକା ଥିବା ନିଜ ବୟାନରେ ସ୍ୱୀକାର କରିଛନ୍ତି ପାକିସ୍ତାନର ଏକାଧିକ ବରିଷ୍ଠ ନେତା ।
ଜମ୍ମୁ-କାଶ୍ମୀର ପହଲଗାମରେ ଆତଙ୍କବାଦୀ ଆକ୍ରମଣରେ ୨୬ ଜଣଙ୍କ ମୃତ୍ୟୁ ହୋଇଥିବା ବେଳେ ପ୍ରତିଦିନ ନୂଆ ନୂଆ ତଥ୍ୟ ସାମନାକୁ ଆସୁଛି । ଆକ୍ରମଣର ସପ୍ତାହକ ପରେ ସରକାରୀ ସୂତ୍ରର ରିପୋର୍ଟ ଅନୁଯାୟୀ, ଆତଙ୍କବାଦୀଙ୍କୁ ପ୍ରୋତ୍ସାହନ ଦେବା ଓ ଆଶ୍ରୟ ଦେବାର ରେକର୍ଡ ପାକିସ୍ତାନର ରହିଛି । କେବଳ ଏତିକି ନୁହେଁ, ଏହା ବିଶ୍ୱର ସବୁଠାରୁ ବିପଦଜନକ ଆତଙ୍କବାଦୀ ଶକ୍ତି ମଧ୍ୟରୁ ଗୋଟିଏ । ବିଶେଷ କରି ୨୦୧୧ ମସିହାରେ ଆମେରିକାର ଏକ ସାମରିକ ଅଭିଯାନରେ ଅଲକାଏଦା ନେତା ଓସାମା ବିନ୍ ଲାଡେନକୁ ପାକିସ୍ତାନର ଆବୋଟାବାଦରେ ଠାବ କରାଯାଇଥିଲା । ପୂର୍ବତନ ପ୍ରଧାନମନ୍ତ୍ରୀ ନୱାଜ ସରିଫ ଓ ଜେନେରାଲ ପରଭେଜ ମୁସାରଫଙ୍କ ସମେତ ପାକିସ୍ତାନର ବରିଷ୍ଠ ରାଜନେତାଙ୍କ ବୟାନରେ ସେମାନେ ସ୍ୱୀକାର କରିଛନ୍ତି ଯେ, ୨୬/୧୧ ମୁମ୍ବାଇ ଆକ୍ରମଣ ଭଳି ସୀମାପାର ଆତଙ୍କୀ ଘଟଣାରେ ସେମାନଙ୍କ ସରକାରଙ୍କ ଭୂମିକା ରହିଛି ।
ଆତଙ୍କବାଦୀଙ୍କୁ ପାଣ୍ଠି ଯୋଗାଣ ସମ୍ପର୍କରେ ପଚରାଯିବାରୁ ପାକିସ୍ତାନର ଜଣେ ବରିଷ୍ଠ ମନ୍ତ୍ରୀ କହିଛନ୍ତି ଯେ, ତାଙ୍କ ଦେଶ ଆମେରିକା ପାଇଁ ତୁଚ୍ଛ କାମ କରିଛି । ୨୦୦୮ ଓ ୨୦୧୧ରେ କାବୁଲରେ ଥିବା ଭାରତୀୟ ଓ ଆମେରିକୀୟ ଦୂତାବାସ ଉପରେ ଆକ୍ରମଣ, ୨୦୨୪ରେ ମସ୍କୋର ଏକ କନ୍ସର୍ଟ ହଲରେ ହୋଇଥିବା ଆକ୍ରମଣ ଏବଂ ୨୦୦୫ରେ ଲଣ୍ଡନରେ ହୋଇଥିବା ବୋମା ବିସ୍ଫୋରଣ ଭଳି ଆତଙ୍କବାଦୀ ଆକ୍ରମଣ ପାକିସ୍ତାନ ସରକାରଙ୍କ ଦ୍ୱାରା ପ୍ରାୟୋଜିତ ଥିଲା ବୋଲି ବିଶେଷ ସୂତ୍ରରୁ ଜଣାପଡ଼ିଛି । ଏକାଧିକ ମାମଲାରେ ଆତଙ୍କବାଦୀମାନଙ୍କୁ ପାକ୍ ନେଟୱର୍କର ଲଜିଷ୍ଟିକ୍ କିମ୍ବା ଆଦର୍ଶଗତ ସମର୍ଥନ ମିଳିଥାଇପାରେ ବୋଲି ତଦନ୍ତରୁ ଜଣାପଡ଼ିଛି । ଆତଙ୍କବାଦକୁ ପ୍ରୋତ୍ସାହିତ କରିବା ସହ ଇସଲାମାବାଦ ଓ ପାକ୍ ସେନାମାନଙ୍କୁ ଦକ୍ଷିଣ ଏସିଆରେ ଦଶନ୍ଧି ଧରି ‘ଜିହାଦୀ ନେତା’ରେ ପରିଣତ କରାଯାଇଛି । ୨୦୧୯ ଫେବୃଆରୀରେ ଜମ୍ମୁ-କାଶ୍ମୀରର ପୁଲୱାମାରେ ହୋଇଥିବା ଆକ୍ରମଣ ପାଇଁ ଦାୟୀ ଲସ୍କର ଓ ଜୈସ-ଏ-ମହମ୍ମଦ ସମେତ ଏକାଧିକ ଆତଙ୍କବାଦୀ ସଙ୍ଗଠନ ପାଇଁ ପାକିସ୍ତାନ ତା’ର ଅଞ୍ଚଳରେ ଏକାଧିକ ପ୍ରଶିକ୍ଷଣ ଶିବିର ସ୍ଥାପନ କରିବା ସହ ପାଣ୍ଠି ଯୋଗାଉଛି ।
