ନୂଆଦିଲ୍ଲୀ,୨୯।୫: ଭାରତ ବିରୋଧରେ ଆତଙ୍କୀ ଆକ୍ରମଣ। ହେଲେ ସେପଟେ ଜାତିସଂଘରେ ନିଜର ଛବି ସୁଧାରୁଛି ପାକିସ୍ତାନ। ଗାଜାର ସ୍ଥିତିକୁ ନେଇ ଜାତିସଂଘର ସୁରକ୍ଷା ପରିଷଦରେ ପାକ୍ର କୁମ୍ଭୀର କାନ୍ଦଣା। କହିଲା, ଗାଜାର କରୁଣ ଚିତ୍କାରକୁ ଚପାଇଦେଲେ ଇତିହାସ ଆମକୁ କେବେ କ୍ଷମା କରିବନି। ନିରିହ ଲୋକଙ୍କ ଜୀବନକୁ ବଞ୍ଚାଇବାକୁ ସାରା ଦୁନିଆକୁ ଏକାଠି ହେବାକୁ ପଡିବ।’
ଅନ୍ତର୍ଜାତୀୟ ମଞ୍ଚରେ ପାକିସ୍ତାନର ଦୋମୁହାଁ ନୀତି। ଆତଙ୍କର ଜନ୍ମଭୂମି ପାକିସ୍ତାନ ଏବେ ଗାଜା ପ୍ରସଙ୍ଗରେ ନିଜର ଆତଙ୍କୀ ଭାବମୂର୍ତ୍ତିକୁ ସୁଧାରିବାର କରୁଛି ଜୋରଦାର ଚେଷ୍ଟା। ପାକିସ୍ତାନର ସ୍ଥାୟୀ ପ୍ରତିନିଧି ଅସୀମ ଇଫତିଖାତ ଅହମ୍ମଦ କହିଛନ୍ତି ତୁରନ୍ତ ଅସ୍ତ୍ରବିରତି, ବନ୍ଧକଙ୍କ ମୁକ୍ତି, ଏବଂ ନିର୍ଦୋଷ ନାଗରିକଙ୍କ ସୁରକ୍ଷା ଦିଆଗାଉ। ଗାଜାରେ ପାଲେଷ୍ଟାନୀୟଙ୍କ ହତ୍ୟା, ଅନାହାର ଏବଂ ଧ୍ବଂସଲୀଳାର ସାରା ଦୁନିଆ ମୁକଦର୍ଶକ। ଗାଜର ଚିତ୍କାର ଚପାଇ ହେବନି। ଏବେ ସମୟ ଆସିଛି ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ। ଆସନ୍ତା ମାସ ଜୁନ୍ରେ ଇସ୍ରାଏଲ-ପାଲେଷ୍ଟାଇନ୍ ବିବାଦକୁ ନେଇ ‘ଟୁ ଷ୍ଟେଟ୍ ସଲ୍ୟୁସନ୍’ ଉପରେ ଏକ ସ୍ବତନ୍ତ୍ର ସମ୍ମିଳନୀ ଆୟୋଜିତ ହେବାକୁ ଯାଉଛି। ଏହାକୁ ଦୃଷ୍ଟିରେ ରଖି ପାକିସ୍ତାନ କରିଛି ଏଭଳି ଅପିଲ। ସେପଟେ ଗାଜାରେ ସେନା କାର୍ଯ୍ୟାନୁଷ୍ଠାନକୁ ନେଇ ଇସ୍ରାଏଲକୁ ଚାରିଆଡେ ସମାଲୋଚନା କରାଯାଉଛି। ଆଉ ଏହି ବାହାନରେ ପାକିସ୍ତାନ ମଧ୍ୟ ନିଜର ଛବିକୁ ଦୁନିଆ ଆଗରେ ସଫା ରଖିବାର ଚେଷ୍ଟା କରୁଛି।
ସେପେଟେ ଗାଜାରେ ମଧ୍ୟ ଇସ୍ରାଏଲ ସେନାର ଜୋରଦାର ହମଲା ଜାରି ରହିଛି। ଗତ ୪୮ ଘଣ୍ଟା ମଧ୍ୟରେ ଗାଜାରେ ୧୦ ପାଲେଷ୍ଟାନୀୟଙ୍କୁ ହତ୍ୟା ଅଭିଯୋଗ ହୋଇଛି। ଏହି ସମସ୍ତେ ରିଲିଫ୍ ସାମଗ୍ରୀ ନେବା ବେଳେ ତାଙ୍କୁ ଗୁଳିମାଡ଼ ହୋଇଛି। କେବଳ ସେତିକି ନୁହେଁ ଇସ୍ରାଏଲୀ ସୈନିକଙ୍କ ଆକ୍ରମଣରେ ୬୨ରୁ ଅଧିକ ଲୋକ ଆହତ ହୋଇଛନ୍ତି। ଭୋକରେ ଆଉଟୁପାଉଟୁ ହଉଥିବା ଲୋକଙ୍କ ଉପରେ ଏଭଳି ଆକ୍ରମଣକୁ ଚାରିଆଡୁ ନିନ୍ଦା କରାଯାଇଛି।
