ନୂଆଦିଲ୍ଲୀ,୦୩/୦୮: ରବିବାର ବିଳମ୍ବିତ ରାତିରେ ପାକିସ୍ତାନରେ ଭୂମିକମ୍ପ ଅନୁଭୂତ ହୋଇଛି। ନ୍ୟାସନାଲ ସେଣ୍ଟର ଫର୍ ସିସମୋଲୋଜି (NCS) ଅନୁଯାୟୀ, ଏହି ଭୂମିକମ୍ପର ତୀବ୍ରତା ରିକ୍ଟର ସ୍କେଲରେ ୪.୮ ରେକର୍ଡ କରାଯାଇଛି । ଏହି ଭୂମିକମ୍ପ ରାତି ୧୨ଟା ୪୦ ରେ ହୋଇଥିଲା। 

NCS ସୋସିଆଲ ମିଡିଆ ପ୍ଲାଟଫର୍ମ X ରେ ପୋଷ୍ଟ କରି କହିଛି, 'ରବିବାର ରାତି ୧୨ଟା ୪୦ରେ ପାକିସ୍ତାନରେ ଭୂମିକମ୍ପ ଅନୁଭୂତ ହୋଇଥିଲା। ଭୂମିକମ୍ପର ତୀବ୍ରତା ୪.୮ ରେକର୍ଡ କରାଯାଇଛି । ଏହି ଭୂମିକମ୍ପର ଗଭୀରତା ଭୂପୃଷ୍ଠରୁ ୧୦ କିଲୋମିଟର ରହିଥିଲା।' ଭୂକମ୍ପ ଝଟକା ଏତେ ଶକ୍ତିଶାଳୀ ଥିଲା ଯେ, ଲୋକମାନେ ନିଦରୁ ଉଠି ଘରୁ ବାହାରକୁ ଆସିଥିଲେ।

ପାକିସ୍ତାନର ARY ନ୍ୟୁଜ୍ ରିପୋର୍ଟ କରିଛି ଯେ, ଶନିବାର ଏକ ଶକ୍ତିଶାଳୀ ଭୂମିକମ୍ପ ହୋଇଥିଲା, ଯାହାର ତୀବ୍ରତା ରିକ୍ଟର ସ୍କେଲରେ ୫.୪ ରେକର୍ଡ କରାଯାଇଥିଲା। ଭୂକମ୍ପ ଝଟକା ଖୈବର ପଖତୁନଖ୍ୱା, ପଞ୍ଜାବ ଏବଂ ଇସଲାମାବାଦରେ ଅନୁଭୂତ ହୋଇଥିଲା। ଏହି ଭୂମିକମ୍ପ ଲୋକମାନଙ୍କୁ ଭୟଭୀତ କରିଥିଲା ଏବଂ ଆତଙ୍କ ସୃଷ୍ଟି କରିଥିଲା। 

ପାକିସ୍ତାନରେ ପ୍ରାୟତଃ ବଡ଼ ବଡ଼ ଭୂମିକମ୍ପ ହୁଏ- 

ଯେଉଁ ଭୂମିକମ୍ପର କେନ୍ଦ୍ରସ୍ଥଳୀ ଭୂପୃଷ୍ଠରୁ ଅଧିକ ଗଭୀରତାରେ ଥାଏ, ସେଗୁଡ଼ିକ ଅଧିକ ବିପଦପୂର୍ଣ୍ଣ ହୋଇଥାଏ। କାରଣ ଏପରି ଭୂମିକମ୍ପରୁ ଆସୁଥିବା ତରଙ୍ଗରେ ଭୂମି ଅଧିକ ଥରିଥାଏ ଏବଂ ଘରଗୁଡ଼ିକର ଅଧିକ କ୍ଷତି ହେବାର ସମ୍ଭାବନା ରହିଥାଏ। ପାକିସ୍ତାନ ବିଶ୍ୱର ଏପରି ଏକ ଦେଶ, ଯେଉଁଠାରେ ଅନେକ ବଡ଼ ବଡ଼ ଭୂମିକମ୍ପ ଘଟୁଛି। ତେଣୁ, ଭୂମିକମ୍ପ ପାକିସ୍ତାନରେ ବହୁତ କ୍ଷତି କରିଥାଏ। 

ପାକିସ୍ତାନର କେଉଁ ରାଜ୍ୟଗୁଡ଼ିକ ଭୂମିକମ୍ପର ଶିକାର ହେବାର ସମ୍ଭାବନା ଅଧିକ?

ପାକିସ୍ତାନର ବେଲୁଚିସ୍ତାନ, ଖୈବର ପଖତୁନଖ୍ୱା ଏବଂ ଗିଲଗିଟ-ବାଲ୍ଟିସ୍ତାନ ଭଳି ରାଜ୍ୟଗୁଡ଼ିକ ୟୁରେସିଆନ୍ ପ୍ଲେଟର ଦକ୍ଷିଣ ପାର୍ଶ୍ୱରେ ଅବସ୍ଥିତ । ସେହିପରି ସିନ୍ଧ ଏବଂ ପଞ୍ଜାବ ଭାରତୀୟ ପ୍ଲେଟର ଉତ୍ତର-ପଶ୍ଚିମ ପାର୍ଶ୍ୱରେ ଅବସ୍ଥିତ । ଯାହା ଫଳରେ ଏହି ଅଞ୍ଚଳଗୁଡ଼ିକ ବାରମ୍ବାର ଭୂମିକମ୍ପର ଶିକାର ହୁଏ । ବେଲୁଚିସ୍ତାନ ଆରବ ଏବଂ ୟୁରେସିଆନ୍ ଟେକ୍ଟୋନିକ୍ ପ୍ଲେଟ ମଧ୍ୟରେ ସକ୍ରିୟ ସୀମା ନିକଟରେ ଅବସ୍ଥିତ । ଭାରତୀୟ ପ୍ଲେଟର ଉତ୍ତର-ପଶ୍ଚିମ ପାର୍ଶ୍ୱରେ ଅବସ୍ଥିତ ପଞ୍ଜାବ ଭଳି ଦୁର୍ବଳ ଅଞ୍ଚଳଗୁଡ଼ିକ ମଧ୍ୟ ଭୂକମ୍ପର ଶିକାର ହୋଇଥାଏ ।