ମୁମ୍ୱାଇ, ୧୧।୧୧: ସଲମାନ ଓ ଶାହାରୁଖଙ୍କ ପରେ ଏବେ ଯୋଡ଼ି ହେଲା ମିଥୁନଙ୍କ ନାଁ । ମିଥୁନଙ୍କୁ ପାକିସ୍ତାନ ଡନ୍ଙ୍କ ଚେତାବନୀ । ଭିଡିଓ ମାଧ୍ୟମରେ ମିଥୁନଙ୍କୁ ସର୍ବସାଧାରଣ ଧମକ । ୧୦-୧୫ ଦିନ ଭିତରେ ଏକ ଭିଡିଓ ଛାଡ଼ି ତୁରନ୍ତ କ୍ଷମା ମାଗନ୍ତୁ, କ୍ଷମା ମାଗିନେବା ତାଙ୍କ ପାଇଁ ଭଲ ।
ନିକଟରେ ବଲିଉଡ ଅଭିନେତା ସଲମାନ ଖାନ ଓ ଶାହାରୁଖ ଖାନଙ୍କୁ ଧମକ ଆସିଥିଲା । ଏବେ ବଲିଉଡ ଅଭିନେତା ତଥା ବିଜେପି ନେତା ମିଥୁନ ଚକ୍ରବର୍ତ୍ତୀଙ୍କୁ ଧମକ ମିଳିଛି । ସୋସିଆଲ ମିଡିଆରେ ଏକ ଭିଡିଓ ସାମ୍ନାକୁ ଆସିଛି, ଯେଉଁଥିରେ ଦୁବାଇରେ ଥିବା ଜଣେ ପାକିସ୍ତାନୀ ମିଥୁନଙ୍କୁ ଧମକ ଦେଇଛନ୍ତି । ପାକିସ୍ତାନୀ ଡନ୍ ଶାହାଜାଦ ଭଟ୍ଟୀ ଏକ ଭିଡିଓ ଜାରି କରି ତାଙ୍କୁ କ୍ଷମା ମାଗିବାକୁ କହିଛନ୍ତି । ବାସ୍ତବରେ ଦୁବାଇରେ ଥିବା ପାକିସ୍ତାନୀ ଡନ୍ ଏକ ଭିଡିଓ ମାଧ୍ୟମରେ କରି ମିଥୁନଙ୍କୁ ସର୍ବସାଧାରଣରେ ଧମକ ଦେଇଛନ୍ତି । ଏହି ଭିଡିଓରେ ଶାହଜାଦ କହିଛନ୍ତି, ଆପଣ ୧୦-୧୫ ଦିନ ମଧ୍ୟରେ ଏକ ଭିଡିଓ ମାଧ୍ୟମରେ କ୍ଷମା ମାଗନ୍ତୁ । କ୍ଷମା ମାଗିବା ଆପଣଙ୍କ ପାଇଁ ଭଲ । ଯାହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହୋଇଛି ।
ଗତ ମାସରେ ମିଥୁନ ଚକ୍ରବର୍ତ୍ତୀ ଉତ୍ତର ୨୪ ପରଙ୍ଗନା ଜିଲ୍ଲାରେ ଏକ ଦଳୀୟ କାର୍ଯ୍ୟକ୍ରମ ସମୟରେ ଏକ ଭାଷଣ ଦେଇଥିଲେ । ଯାହାକୁ ନେଇ ଏତଲା ଦାଏର କରାଯାଇଥିଲା । ସେ କହିଥିଲେ, ମୁଁ ଜଣେ ଅଭିନେତା ନୁହଁ ବରଂ ୬୦ ଦଶକର ମିଥୁନ ଚକ୍ରବର୍ତ୍ତୀ ଭାବରେ କହୁଛି । ରାଜନୀତିର କୌଣସି କୌଶଳ ମୋ ପାଇଁ ନୂଆ ନୁହେଁ, ମୁଁ ରକ୍ତ ରାଜନୀତି କରିସାରିଛି । ମିଥୁନ ଆହୁରି କହିଛନ୍ତି, ମୁଁ ଜାଣେ, ମୁଁ କ‘ଣ କଲେ କ’ଣ ହୋଇପାରିବ । ମୁଁ କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କୁ ମଧ୍ୟ କହିଛି ଯେ, ଏଥିପାଇଁ ଯାହା ଦରକାର ତାହା କରିବି । ଏଠାରେ ଜଣେ ନେତା କହିଥିଲେ ଯେ, ହିନ୍ଦୁମାନଙ୍କୁ ବଧ କରି ଭାଗିରଥୀରେ ଭସାଇ ଦିଆଯିବ । ମୁଁ ଭାବିଲି ସିଏମ୍ କିଛି କହିବେ । କିନ୍ତୁ କିଛି ହେଲା ନାହିଁ । ବର୍ତ୍ତମାନ ମୁଁ କହୁଛି ତୁମକୁ ତୁମ ଭୂମିରେ କବର ଦେବି । ତେବେ କିଛି ଦିନ ହେବ ସଲମାନ ଖାନଙ୍କୁ କ୍ରମାଗତ ଭାବେ ଧମକ ଆସୁଛି । ସଲମାନଙ୍କ ପରେ ନିକଟରେ ଶାହାରୁଖ ଖାନଙ୍କୁ ମଧ୍ୟ ଧମକ ମିଳିଥିଲା ଏବଂ ବର୍ତ୍ତମାନ ମିଥୁନଙ୍କ ନାଁ ମଧ୍ୟ ଏହି ତାଲିକାରେ ଯୋଡ଼ି ହୋଇଛି । ମିଥୁନ ଏପର୍ଯ୍ୟନ୍ତ କୌଣସି ପ୍ରତିକ୍ରିୟା ଦେଇନାହାନ୍ତି ।
