ନୂଆଦିଲ୍ଲୀ, ୧୧/୦୮ : ପାକିସ୍ତାନର ଖୈବର ପଖତୁନଖ୍ଵା ପ୍ରାନ୍ତରେ ଆତଙ୍କୀ ହମ୍ଲା। ସରକାରୀ ହାଇସ୍କୁଲକୁ ଟାର୍ଗେଟ୍ କରି ଆଇଡି ବିସ୍ଫୋରଣ କଲେ ଆତଙ୍କବାଦୀ। ରବିବାର ଏଭଳି ଘଟଣା ଘଟିଛି। ଏହି ଆତଙ୍କୀ ହମ୍ଲାରେ ସ୍କୁଲର ଶ୍ରେଣୀ ଗୃହ ଓ ବାଉଣ୍ଡରୀ ୱାଲ୍ ଛିନଛତ୍ର ହୋଇଯାଇଛି। ଏହି ବିସ୍ଫୋରଣରେ କେହି ମୃତାହତ ହୋଇନଥିବା ସୂଚନା ମିଳିଛି। ଏହି ଆତଙ୍କୀ ଆକ୍ରମଣ ପରେ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଛି। ଶିକ୍ଷାଦାନ ପ୍ରକ୍ରିୟା ପ୍ରଭାବିତ ହୋଇଛି।
ଏହି ମଧ୍ୟରେ ଆଉ ଏକ ବିସ୍ଫୋରଣର ଖବର ଆସିଛି। ୱାନା-ଅଜମ ବାରସାକ ହାଇୱେରେ ବିସ୍ଫୋରଣ କରି ଆତଙ୍କବାଦୀମାନେ ୩ଟି ବ୍ରିଜ୍ ଧ୍ଵଂସ କରି ଦେଇଛନ୍ତି। ଯାହାଫଳରେ ଯାତାୟାତ ବାଧାପ୍ରାପ୍ତ ହୋଇଛି। ସ୍ଥାନୀୟ ଲୋକମାନେ ଯା-ଆସ କରିବାକୁ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ସରକାର ସୁରକ୍ଷା ବ୍ୟବସ୍ଥା କଡ଼ାକଡ଼ି କରିବା ସହ ତଦନ୍ତ ନିର୍ଦ୍ଦେଶ ଦେଇଛନ୍ତି।
ଏହା ପୂର୍ବରୁ ଜୁନ ୬ ତାରିଖରେ କିଛି ଅଜ୍ଞାତ ଲୋକ ଟ୍ୟାଙ୍କ ଜିଲ୍ଲା ଗୁଲ ଇମାମ ଥାନା ଅକବରୀ ଗାଁରେ ଥିବା ଏକ ସରକାରୀ ହାଇସ୍କୁଲରେ ବିସ୍ଫୋରଣ କରିଥିଲେ। ଏହି ଆକ୍ରମଣରେ କିଛି କ୍ଲାସ୍ ରୁମ୍ ନଷ୍ଟ ହୋଇଯାଇଥିଲା। ସ୍ଥାନୀୟ ଏନଜିଓ ଗୁଡ଼ିକ ଦ୍ଵାରା ଦିଆଯାଇଥିବା ତଥ୍ୟ ମୁତାବକ, ୨୦୧୫-୨୫ ମଧ୍ୟରେ ୪୫୦ଟି ସ୍କୁଲରେ ଏଭଳି ବିସ୍ଫୋରଣ ହୋଇଛି। ଏହି କାରଣରୁ ବହୁ ଛାତ୍ରଛାତ୍ରୀ ପାଠପଢାରେ ଡୋରି ବାନ୍ଧିଦେଇଛନ୍ତି। ବାଳିକା ଶିକ୍ଷାକୁ ବିରୋଧ କରି ତହରିକ-ଏ-ତାଲିବାନ ପାକିସ୍ତାନର ଆତଙ୍କୀମାନେ ଏଭଳି ସ୍କୁଲ ଗୁଡ଼ିକୁ ଟାର୍ଗେଟ୍ କରୁଛନ୍ତି। ୨୦୧୯ ସୁଦ୍ଧା, ପାକିସ୍ତାନରେ ବାଳିକା ବିଦ୍ୟାଳୟ ଉପରେ ଅନେକ ଆକ୍ରମଣ ହୋଇଛି। ବିଶେଷକରି ସ୍ୱାତ ଉପତ୍ୟକା ଏବଂ ଉତ୍ତର-ପଶ୍ଚିମ ପାକିସ୍ତାନର ଅନ୍ୟାନ୍ୟ ଅଞ୍ଚଳରେ ସ୍କୁଲ ଗୁଡ଼ିକୁ ଟାର୍ଗେଟ୍ କରାଯାଉଛି। ଏହି ସବୁ ଅଞ୍ଚଳରେ ପାକିସ୍ତାନୀ ତାଲିବାନ ଦୀର୍ଘ ସମୟ ଧରି ନିୟନ୍ତ୍ରଣ ରଖିଥିଲେ।
