ହାଇଦ୍ରାବାଦ,୨୬/୦୪: ପହଲଗାମ ଆତଙ୍କୀ ଆକ୍ରମଣରେ ଦେଶରେ କ୍ରୋଧର ନିଆଁ ଜଳୁଛି । ଆତଙ୍କୀଙ୍କୁ କଡ଼ା ଜବାବ ଦେବାକୁ ପ୍ରସ୍ତୁତି ଆରମ୍ଭ କରିଛି ଭାରତ । ପହଲଗାମ ହମଲାରେ ଯାଇଥିବା ୨୭ ନିରୀହ ଜୀବନର ପ୍ରତିଶୋଧ ନେବାକୁ ଦାବି ହୋଇଛି । ଯେବେ ଦେଶବାସୀ ଓ ସେମାନଙ୍କ ସୁରକ୍ଷା କଥା ଆସେ ବିରୋଧୀ ଓ ଶାସକ ଦଳ ଏକାଠୀ ହୋଇଯାଆନ୍ତି ତାର ଉଦାହରଣ ଦେଖିବାକୁ ମିଳିଛି । ପାକିସ୍ତାନ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଅନୁରୋଧ କରିଛନ୍ତି ତେଲେଙ୍ଗାନା ମୁଖ୍ୟମନ୍ତ୍ରୀ ରେବନ୍ତ ରେଡ୍ଡୀ ।
'ବୁଝାମଣା ନୁହେଁ ଜବାବ୍ ଦିଅ'- ଦେଶର ପ୍ରଧାନମନ୍ତ୍ରୀଙ୍କୁ ମୋର କେବଳ ଗୋଟିଏ ଅନୁରୋଧ, ଆମେ ଏକାଠୀ ହୋଇ ଦେଶବାସୀଙ୍କ ଉପରେ ଆକ୍ରମଣ କରିଥିବା ଆତଙ୍କବାଦୀଙ୍କୁ ଉଚିତ୍ ଜବାବ ଦେବା । ଆତଙ୍କୀଙ୍କ ବିରୋଧରେ ଲଢିବା ପାଇଁ ସମସ୍ତ ପ୍ରକାର ସହାୟତା ଯୋଗାଇ ଦେବାକୁ ପ୍ରସ୍ତୁତ । ଏବେ ବୁଝାମଣା ନୁହେଁ ମୁହଁତୋଡ ଜବାବ ଦେବାର ସମୟ ଆସିଛି । ପାକିସ୍ତାନକୁ ଦୁଇ ଭାଗ କରି ପିଓକେକୁ ଭାରତରେ ମିଶାଇ ଦେବାକୁ ପ୍ରଧାନମନ୍ତ୍ରୀଙ୍କୁ ଅପିଲ୍ କରୁଛି ବୋଲି କହିଛନ୍ତି ତେଲେଙ୍ଗାନା ମୁଖ୍ୟମନ୍ତ୍ରୀ ।
ରେବନ୍ତ ରେଡ୍ଡୀ ଆହୁରି କହିଛନ୍ତି, ''୧୯୬୭ରେ ଯେବେ ଚୀନ ଆକ୍ରମଣ କରିଥିଲା ସେବେ ଇନ୍ଦିରା ଗାନ୍ଧୀ ଜୀ କଡ଼ା ଜବାବ ଦେଇଥିଲେ । ପୁଣି ୧୯୭୧ରେ ପାକିସ୍ତାନ ହମଲା କରିଥିଲା । ସେବେ ବି ଇନ୍ଦିରା ଗାନ୍ଧୀ ମୁହଁତୋଡ଼ ଜବାବ ଦେଇ ପାକିସ୍ତାନକୁ ଦୁଇଭାଗ କରି ବାଂଲାଦେଶ କରିଥିଲେ । ଏବେ ପାକିସ୍ତାନକୁ ତାର ପ୍ରକୃତି ପାଇଁ ଜବାବ ଦେବାର ସମୟ ଆସିଛି । ଆମକୁ ନିର୍ଣ୍ଣାୟକ କାର୍ଯ୍ୟାନୁଷ୍ଠାନ ନେବାକୁ ହେବ । ବୁଝାମଣାର ସମୟ ଶେଷ ହୋଇଛି । ଏବେ ମୁହଁତୋଡ ଜବାବ ଦେବାର ସମୟ ଆସିଛି । ପହଲଗାମ ପରି ଭୟଙ୍କର ଆତଙ୍କୀ ଆକ୍ରମଣ ରୋକିବାକୁ କେନ୍ଦ୍ର ସରକାର ନିର୍ଣ୍ଣାୟକ କାର୍ଯ୍ୟାନୁଷ୍ଠାନ ଗ୍ରହଣ କରିବାର ଆବଶ୍ୟକତା ରହିଛି । ୧୪୦ କୋଟି ଜନତା ସରକାରଙ୍କ ସହିତ ଅଛନ୍ତି ।''
ଅଧିକ ପଢନ୍ତୁ...ସିନ୍ଧୁର ପାଣି ବହିବ ନ ହେଲେ ତାଙ୍କ ରକ୍ତ...ଜଳ ଚୁକ୍ତିକୁ ନେଇ ଭାରତକୁ ବିଲାୱଲ ଭୁଟୋଙ୍କ ଧମକ
ପହଲଗାମ ଆତଙ୍କୀ ହମଲା ବିରୋଧରେ ହାଇଦ୍ରାବାଦରେ ମୁଖ୍ୟମନ୍ତ୍ରୀ ରେବନ୍ତ ରେଡ୍ଡୀଙ୍କ ସମର୍ଥନରେ ଏକ କ୍ୟାଣ୍ଡେଲ ମାର୍ଚ୍ଚ ହୋଇଥିଲା । ଏଥିରେ ଏଆଇଏମଆଇଏମ ସାଂସଦ ଅସଦ୍ଦୁଦିନ ୱୱେସୀ, କଂଗ୍ରେସ ନେତା ସଲମାନ ଖୁର୍ସିଦଙ୍କ ସମେତ ଅନେକ ନେତା ସାମିଲ ହୋଇଥିଲେ ।
