ନୂଆଦିଲ୍ଲୀ,୨୫/୦୧: ବାଂଲାଦେଶକୁ ଆଇସିସି ବିଶ୍ୱକପ୍ରୁ ଆଉଟ୍ କରିବା ପରେ ପାକିସ୍ତାନ ଅସନ୍ତୁଷ୍ଟ ଥିଲା । ସେ ନିଜେ ବିଶ୍ୱକପରୁ ଓହରିବ ବୋଲି କହିଆସୁଥିଲା । ବହିଷ୍କାର ଧମକ ଭିତରେ ବିଶ୍ୱକପ ଟିମ୍ ଘୋଷଣା କରିଛି ପାକିସ୍ତାନ କ୍ରିକେଟ ବୋର୍ଡ । ଭାରତ ଓ ଶ୍ରୀଲଙ୍କାରେ ହେବାକୁ ଥିବା ଏହି ପ୍ରତିଯୋଗିତାରୁ ଓହରିବାର ଧମକ ଦେଉଥିଲା । ହେଲେ ଶେଷରେ ଏଥିରେ ମୁଣ୍ଡ ନୁଆଁଇ ବିଶ୍ୱକପ୍ ଲାଗି ରବିବାର ୧୫ ଜଣିଆ ଦଳ ଘୋଷଣା କରିଛି ପାକିସ୍ତାନ । ୨୦୦୯ର ଏହି ବିଜେତା ଦଳର ନେତୃତ୍ୱ ଭାର ସଲ୍‌ମାନ ଅଲୀ ଆଘାଙ୍କୁ ମିଳିଛି ।

​​​​​​​ଦଳରେ ଦୁଇ ତାରକା ଖେଳାଳି ହାରିସ ରୌଫ୍‌ ଓ ମହମ୍ମଦ ରିଜୱାନଙ୍କୁ ସ୍ଥାନ ମିଳିନାହିଁ । ଖରାପ ପ୍ରଦର୍ସନ ସତ୍ତ୍ୱେ ବାବର ଆଜମଙ୍କୁ ଟିମ୍‌ରେ ସାମିଲ କରାଯାଇଛି । ରୌଫ୍‌ଙ୍କ ଅନୁପସ୍ଥିତିରେ ସାହିନ ଶାହ ଆଫ୍ରିଦି ଓ ନସୀମ ଶାହ ଦ୍ରୁତ ବୋଲିଂ ଭାର ସମ୍ଭାଳିବେ । ପାକିସ୍ତାନ ଗ୍ରୁପ୍‌-ଏ’ରେ ବିଜେତା ଭାରତ, ଆମେରିକା, ନେଦରଲାଣ୍ଡ୍‌ସ, ନାମିବ୍ୟା ସହ ରହିଛି । ହେଲେ ଏହି ଦଳ ଭାରତ ଗସ୍ତ ନକରି କଲମ୍ବୋରେ ସମସ୍ତ ମ୍ୟାଚ୍‌ ଖେଳିବ । ପାକିସ୍ତାନ ଫେବ୍ରୁଆରି ୭ରେ ନେଦରଲାଣ୍ଡ୍‌ସ ବିପକ୍ଷରୁ ଅଭିଯାନ ଆରମ୍ଭ କରିବ । ଏହା ପରେ ୧୦ରେ ଆମେରିକା, ୧୫ରେ ପାରମ୍ପରିକ ପ୍ରତିଦ୍ୱନ୍ଦ୍ୱୀ ଭାରତ ବିପକ୍ଷରେ ଖେଳିବ ।  ୧୮ରେ ନାମିବ୍ୟା ସହ ଗ୍ରୁପ୍‌ ମ୍ୟାଚ୍‌ ଖେଳିବ ।